ប៉ៃលិន ៖ កាលពីវេលាម៉ោង១៧និង៥០នាទី ថ្ងៃអាទិត្យ ៥កើត ខែផល្គុន ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែមីនា ឆ្នាំ២០១៩ មានករណីគ្រោះថ្នាក់ចរាចរណ៍មួយរវាងម៉ូតូបុកជាមួយម៉ូតូ ក្នុងស្ថានភាពបញ្ច្រាសទិសគ្នា បណ្ដាលឲ្យមនុស្ស៥នាក់រងរបួសធ្ងន់ ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត និងខ្លះទៀតបញ្ជូនបន្តទៅសង្គ្រោះនៅខេត្តបាត់ដំបង។
ហេតុការណ៍ខាងលើនេះ បានកើតឡើងនៅចំណុចមុខទឹកស្អាត ស្ថិតនៅភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន។
លោកវរសេនីយ៍ទោ យ៉ែម សារិទ្ធ អធិការនគរបាលក្រុងប៉ៃលិន បានឲ្យដឹងថា ករណីគ្រោះថ្នាក់ចរាចរណ៍រវាងម៉ូតូបុកជាមួយម៉ូតូខាងលើ បណ្តាលមកពីកត្តាមនុស្សបើកបរខ្វះការប្រុងប្រយ័ត្ន ដោយបើកបរមិនប្រកាន់ស្តាំ និងបណ្ដាលឲ្យមនុស្សប្រុស ស្រីចំនួន៥នាក់ រងរបួសធ្ងន់តែម្តង។
ដោយភាគីម៉ូតូបង្ក ឈ្មោះ ជា សុខេន ភេទប្រុស អាយុ១៧ឆ្នាំ មុខរបររកស៊ី ដោយបើកបរម៉ូតូ ម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៧ ពាក់ស្លាកលេខប៉ៃលិន១C-២៣៥១ ទិសដៅពីត្បូងទៅទិសខាងជើង ជាអ្នកបើកបរម៉ូតូ រងរបួសធ្ងន់ រួមជាមួយអ្នកដំណើរម្នាក់ទៀត ឈ្មោះ រឹម រិទ្ធ ភេទប្រុស អាយុ២០ឆ្នាំ មុខរបររកស៊ី រងរបួសធ្ងន់ ទាំងពីរនាក់រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោកអធិការ បានបន្តថា ចំណែកភាគីជនរងគ្រោះជិះគ្នាបីនាក់ ទី១-ឈ្មោះ រស់ សេរីវឌ្ឌ្យ ភេទប្រុស អាយុ៣០ឆ្នាំ មុខរបរពេទ្យទាហាន ជាអ្នកបើកបរម៉ូតូ ម៉ាកស្គុបពី ពណ៌ខ្មៅ ពាក់ស្លាកលេខភ្នំពេញ១BC-៦០០៦ បើកបរម៉ូតូពីជើងទៅត្បូង រងរបួសធ្ងន់ ,ទី២-ឈ្មោះ ធី ភេទស្រី អាយុ២៥ឆ្នាំ មុខរបរមេផ្ទះ រងរបួសធ្ងន់ ទាំងពីរនាក់ជាប្តីប្រពន្ធនឹងគ្នា និងទី៣-ឈ្មោះ គន្ធា ភេទស្រី អាយុ១៤ឆ្នាំ មុខរបរសិស្ស រងរបួសធ្ងន់ ទាំងអស់គ្នា មានទីលំនៅភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
លោកបានបន្តទៀតថា ទាំងជនបង្ក និងជនរងគ្រោះ ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ចំណែកខ្លះទៀតបញ្ជូនបន្តទៅសង្គ្រោះនៅខេត្តបាត់ដំបងផងដែរ។
បច្ចុប្បន្នករណីគ្រោះថ្នាក់ចរាចរណ៍ខាងលើ ត្រូវបានកម្លាំងសមត្ថកិច្ចជំនាញ ផ្នែកសណ្ដាប់ធ្នាប់ចរាចរណ៍ នៃអធិការដ្ឋាននគរបាលក្រុងប៉ៃលិន យកម៉ូតូទាំងពីរគ្រឿង មករក្សាទុក ជាបណ្ដោះអាសន្ន នៅអធិការដ្ឋាននគរបាលក្រុងប៉ៃលិន ដើម្បីរង់ចាំការដោះស្រាយគ្នាតាមនីតិវិធី៕
Source: Kampuchea Thmey Daily
0 Comments