កងកម្លាំងគាំទ្រដោយសហរដ្ឋអាមេរិកបាននិយាយកាលពីថ្ងៃអាទិត្យថា ពេលវេលាគឺអស់ហើយសម្រាប់ក្រុមជីហាដនិយមរដ្ឋឥស្លាមដែលកំពុងតស៊ូនៅក្នុងមូលដ្ឋានភាគខាងកើតប្រទេសស៊ីរីរបស់ពួកគេហើយកងកម្លាំងបានបន្តការវាយលុករបស់ពួកគេឡើងវិញនៅទីនោះ។
ក្រុមជ្រុលនិយមនេះធ្លាប់បានគ្រប់គ្រងលើមនុស្សរាប់លាននាក់នៅក្នុងប្រទេសស៊ីរីនិងអ៊ីរ៉ាក់ប៉ុន្ដែចាប់តាំងពីពេលនោះមក ពួកគេបានបាត់បង់ដីទាំងអស់នោះលើកលែងតែមូលដ្ឋានតាមមាត់ទន្លេនៅក្នុងភូមិ Baghouz ប៉ុណ្ណោះ។
កងកម្លាំងប្រជាធិបតេយ្យស៊ីរី (SDF) បានពន្យឺតយុទ្ធនាការរយៈពេលរាប់ខែរបស់ខ្លួនប្រឆាំងនឹងក្រុម IS នៅប៉ុន្មានសប្តាហ៍ថ្មីៗនេះដើម្បីអនុញ្ញាតឲ្យជនស៊ីវិលនិងជនជីហាដដែលចុះចាញ់ជាច្រើននាក់អាចចាកចេញពីតំបន់ដែលដួលរលំនេះបាន។
ប៉ុន្តែសម្ព័ន្ធភាពដឹកនាំដោយពួកឃើដដែលត្រូវបានគាំទ្រដោយការវាយប្រហារតាមអាកាសរបស់ក្រុមចម្រុះដឹកនាំដោយអាមេរិកបាននិយាយកាលពីថ្ងៃអាទិត្យថា ថ្ងៃផុតកំណត់សម្រាប់ការចុះចាញ់បានកន្លងផុតទៅហើយ ហើយការវាយលុកនឹងបន្តឡើងវិញ។
អ្នកនាំពាក្យរបស់ SDF លោក Adnan Afrin បាននិយាយថា “យើងមិនបានឃើញចលនាជនស៊ីវិលណាមួយនៅខាងក្នុងទេដូច្នេះកងកម្លាំងប្រជាធិបតេយ្យស៊ីរីបានបន្តប្រតិបត្តិការយោធារបស់ពួកគេប្រឆាំងនឹងក្រុមនេះឡើងវិញ”។
ប្រធានការិយាល័យព័ត៌មានរបស់ SDF លោក Mustefa Bali បាននិយាយថា ការវាយប្រហារពីអាកាសបានចាប់ផ្តើមឡើងជាថ្មីម្តងទៀតលើទីតាំងរបស់ក្រុម IS ហើយយុទ្ធជននៃភាគីទាំងពីរកំពុងជាប់នៅក្នុងការប៉ះទង្គិចដោយហិង្សា។
លោកបាននិយាយមុននេះ នៅលើបណ្តាញសង្គម Twitter ថា “ពេលវេលា ដែលយើងផ្តល់ឲ្យក្រុម ISIS ដើម្បីចុះចាញ់គឺបានចប់ហើយ”។ លោកបន្តថា “កងកម្លាំងរបស់យើងបានទទួលការបញ្ជាឲ្យមានសកម្មភាពយោធាដើម្បីបញ្ចប់ក្រុមភេរវករនៅក្នុងភូមិ Baghouz ដែលជាភូមិមួយស្ថិតនៅក្បែរព្រំដែនអ៊ីរ៉ាក់”។
គួរបញ្ជាក់ថា យោងតាមក្រុមអង្កេតការណ៍សិទ្ធិមនុស្សស៊ីរីបានឲ្យដឹងថា ចាប់តាំងពីខែធ្នូមក មនុស្សជិត៥៩,០០០នាក់បានចាកចេញពីមូលដ្ឋានក្រុម IS ចុងក្រោយបង្អស់ហើយប្រហែលមួយភាគដប់នៃពួកគេគឺជាជនសង្ស័យជីហាដនិយម៕ AFP
Source: Kampuchea Thmey Daily
0 Comments