ភ្នំពេញ ៖ គណបក្សប្រជាជនកម្ពុជា ខណ្ឌច្បារអំពៅ ដឹកនាំដោយ លោក ចេង មុនីរ៉ា ជាប្រធាន រួមនឹងក្រុមហ៊ុនPrimce Real Gstate Group បាននាំយកអំណោយទៅផ្តល់ជូនប្រជាពលរដ្ឋ ដែលកំពុងខ្វះខាតជីវភាពចំនួន២៨០គ្រួសារ ដើម្បីដោះស្រាយជីវភាពប្រចាំថ្ងៃ។
យោងតាមប្រសាសន៍ លោក ចេង មុនីរ៉ា ប្រធានគណបក្សប្រជាជនកម្ពុជាខណ្ឌច្បារអំពៅបានមានប្រសាសន៍ថា នៅព្រឹកថ្ងៃទី១០មីនានេះ រូបលោក បានដឹកនាំក្រុមការងារគណបក្សប្រជាជនកម្ពុជាខណ្ឌច្បារអំពៅ រួមជាមួយក្រុមហ៊ុនខាងលើ បាននាំយកអំណោយទៅផ្ដល់ជូនប្រជាពលរដ្ឋចំនួន២៨០គ្រួសារ ដែលកំពុងរស់នៅក្នុងសហគមន៍ដើមស្លែងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។
លោកប្រធានគណបក្សបានបន្តថា ជារៀងរាល់សប្ដាហ៍ គណៈកម្មាធិការបក្សប្រជាជនកម្ពុជាខណ្ឌច្បារអំពៅ តែងនាំយកអំណោយពីសប្បុរសជនដែលផ្តល់មកទីស្នាក់ការបក្ស ដើម្បីយកទៅផ្តល់ជូនប្រជាពលរដ្ឋដែលកំពុងខ្វះខាតជីវភាពពុំដែលខកខាន និងពុំប្រកាន់និន្នាការនយោបាយឡើយ គឺឲ្យតែប្រជាពលរដ្ឋរស់នៅក្នុងមូលដ្ឋានខណ្ឌច្បារអំពៅ។
ជាក់ស្ដែងដូចថ្ងៃនេះ គឺក្រុមហ៊ុនPrimce RealGstate Group បាននាំយកអំណោយមកផ្តល់ដល់ទីស្នាក់ការកណ្តាលគណបក្សប្រជាជនកម្ពុជាខណ្ឌច្បារអំពៅ ដើម្បីយកទៅផ្តល់បន្តដល់ប្រជាពលរដ្ឋដែលមានជីវភាពខ្វះខាត ព្រោះក្រុមហ៊ុន ក៏ដូចជាសប្បុរសជនលោកជឿជាក់មកលើគណៈកម្មាធិការបក្សខណ្ឌច្បារអំពៅ តែងចុះជួយប្រជាពលរដ្ឋក្នុងមូលដ្ឋានមិនដែលលោះពេល និងមិនប្រកាន់និន្នាការនយោបាយទៀតផង។
លោក ចេង មុនីរ៉ា បានបញ្ជាក់ទៀតថា គណបក្សប្រជាជនកម្ពុជា គឺមិនទុកឲ្យប្រជាពលរដ្ឋណាម្នាក់ត្រូវដាច់ស្បៀងអាហារនោះឡើយ។ ហើយអំណោយដែលត្រូវប្រគល់ជូនប្រជាពលរដ្ឋដែលកំពុងខ្វះខាតជីវភាពទាំង២៨០គ្រួសារនាថ្ងៃនេះ គឺក្នុងមួយគ្រួសារទទួលបានមី១កេស ទឹកត្រី១យួរ ត្រីខ១០កំប៉ុង ប្រេងឆា១លីត្រ មីសួ១គីឡូក្រាម និងស្បោងយួរ១ ជាវត្ថុអនុស្សាវរីយ៍មានរូបសញ្ញាគណបក្សប្រជាជនកម្ពុជាទៀតផង៕
Source: Kampuchea Thmey Daily
0 Comments