ភ្នំពេញ ៖ អាចចាត់ទុកថាជារឿងក្ដីមិនប្រក្រតី ខណៈនៅព្រឹកថ្ងៃទី២១ ខែមីនា ឆ្នាំ២០១៩នេះ ចៅក្រមសាលាដំបូងរាជធានីភ្នំពេញ ឈ្មោះ កូយ សៅ បានសម្រេចបិទទ្វារកាត់ក្ដីសំណុំរឿងអាណិកជនខ្មែរនៅអាមេរិកម្នាក់ ដែលជាប់ចោទពីបទហិង្សាដោយចេតនា មានស្ថានទម្ងន់ទោស បទគំរាមកំហែង ថានឹងសម្លាប់ បទបង្ខាំងមនុស្សខុសច្បាប់ និងបទធ្វើទារុណកម្មផ្លូវភេទ។
សវនាការនេះ គឺចៅក្រម កូយ សៅ មិនអនុញ្ញាតឲ្យសាធារណជន អ្នកសារព័ត៌មាន រួមទាំងសមត្ថកិច្ចផង ចូលស្ដាប់ដំណើរការកាត់ទោសនេះទេ គឺចៅក្រម សម្រេចបិទទ្វារបន្ទប់សវនាការដោយមានតែជនត្រូវចោទម្នាក់ប៉ុណ្ណោះ ជាមួយនឹងចៅក្រម តំណាងអយ្យការ និងក្រឡាបញ្ជីក្នុងដំណើរការកាត់ទោស ដែលភាសាសាមញ្ញ គេហៅថា« ចងមុងកាត់ក្ដី »។
ជនត្រូវចោទ ដែលតុលាការបិទទ្វារកាត់ក្ដីនេះ ឈ្មោះ ព្រឿង សំអឿន ហៅ សេម ភេទប្រុស អាយុ៣៩ឆ្នាំ ជាអាណិកជនខ្មែរ រស់នៅសហរដ្ឋអាមេរិក តែបានមករស់នៅកម្ពុជា ប្រកបមុខរបរជាគ្រូបង្រៀនលំហាត់ប្រាណ នៅក្នុងក្លឹបស៊ុបភឺហ្វីត។
តាមអង្គហេតុ នៃរឿង, ជននេះ បានបង្ខាំងទុកនារីម្នាក់ ធ្វើទារុណកម្មផ្លូវភេទ ដែលនាងមាន ឈ្មោះម ហ ភេទស្រី អាយុ២២ឆ្នាំ មុខរបរជានិស្សិត ព្រមទាំងបានទូរស័ព្ទទៅក្រុមគ្រួសារ របស់ជនរងគ្រោះ ប្រើពាក្យសំដីមិនសមរម្យ ប៉ះពាល់ដល់កិត្តិយសជនរងគ្រោះ និងគំរាម បង្ហោះវីដេអូរួមភេទជាមួយគ្នាទៀតផង។
បន្ទាប់ពីសមត្ថកិច្ចចាប់ខ្លួនមកជននេះ បានសារភាពថា ខ្លួន និងនារីរងគ្រោះ បានស្គាល់គ្នារយៈពេល១ឆ្នាំមកហើយ ខណៈដែលនារីរងគ្រោះ តែងមកហាត់ប្រាណនៅក្នុងក្លឹបស៊ុបភឺហ្វីតរាល់ថ្ងៃ ហើយខ្លួនជាគ្រូបង្រៀនលំហាត់ប្រាណនៅទីនោះ។
ក្រោយមក ពួកគេ បានស្រលាញ់គ្នាជាសង្សារ ហើយតែងតែទូរស័ព្ទណាត់ជួបគ្នា ដើម្បីរួមភេទជាញឹកញាប់ក្នុង១សប្ដាហ៍ ២ទៅ ៣ដង ហើយក្នុងពេលរួមភេទម្តងៗ ជនកំណាចតែងតែថតជាវីដេអូទុកផងដែរ។ លើកដំបូង ពួកគេរួមភេទ ជាមួយគ្នាក្នុងផ្ទះសំណាក់ម្តុំផ្សារ សុវណ្ណា ហើយក្រោយៗមកទៀត បានជួលបន្ទប់ខុនដូរមួយឈ្មោះ MHM បន្ទប់លេខ១៦៤ សង្កាត់ទួលទំពូង១ ខណ្ឌចំការមន រាជធានីភ្នំពេញ ដើម្បីណាត់ជួបគ្នារួមភេទ ដោយឡែកនារីរងគ្រោះបានប្រាប់សមត្ថកិច្ចថា ដំបូងឡើយរូបនាងពិតជាបានស្រឡាញ់ ជនសង្ស័យប្រាកដមែន តែរយៈកាលក្រោយៗមក រូបនាងមានការភ័យខ្លាចជាខ្លាំង ព្រោះតែសង្សារនេះជាមនុស្សមានរោគចិត្ត ព្រោះពេល រួមភេទជាមួយគ្នាម្តងៗ គេមិនត្រឹមតែថតវីដេអូទុកប៉ុណ្ណោះទេ ថែមទាំងក្តិច ខ្ញាំ ខាំ ច្របាច់ មួលកដៃ និងវាយនាងបែកមាត់ជាញឹកញាប់នៅពេលនាងឈឺពេកទ្រាំមិនបានក៏ស្រែក។ ក្រោយមក នាងធុញទ្រាន់ ក៏ទៅភ្ជាប់ពាក្យជាមួយកំលោះម្នាក់ទៀត ប៉ុន្តែជនសង្ស័យបានដឹងថា នាង មានគូដណ្ដឹង ក៏បានចាប់បង្ខាំងប្រើហិង្សាលើរូប នាងចំនួន៦ដង និងគំរាមបង្ហោះវីដេអូរួមភេទជាមួយគ្នាផងដែរ។
នៅថ្ងៃទី១៥ ខែកញ្ញា ឆ្នាំ២០១៨ ខណៈដែលនារីរងគ្រោះ និងជនសង្ស័យនៅជាមួយគ្នា ស្រាប់តែគូដណ្ដឹងនារីរងគ្រោះ បានឆាតមក ក៏ត្រូវជនសង្ស័យឆែកឃើញ កើតក្តីប្រចណ្ឌ ក៏ឈ្លោះប្រកែកគ្នា ហើយជនសង្ស័យបានឆាតទៅគំរាមគូដណ្តឹងនារីរងគ្រោះឲ្យឈប់ទាក់ទងនាងជាបន្ទាន់។
បន្ទាប់មក ជនសង្ស័យ បានបង្ខាំងនារីរងគ្រោះទុកក្នុងបន្ទប់ខុនដូមិនឲ្យចេញទៅណា ព្រមទាំងបានចាប់បោចសក់ និងរុញផ្ទប់ នាងនឹងជញ្ជាំង ហើយបានខាំនាង២កន្លែង គឺដៃ១កន្លែង និងកំប៉េះគូទ១កន្លែង។
ក្រោយមកទៀត ជននេះ បានកាត់អាវយឺតជាចម្រៀកបម្រុងយកមក ចងដៃ ចងជើងនាង តែដោយសារនារីរងគ្រោះអង្វរពេក ទើបរូបគេមិនបានចង ហើយក៏បង្ខំនារីរងគ្រោះឲ្យទូរស័ព្ទទៅនិយាយជាមួយគូដណ្ដឹងថា ពួកគេទាំង២នាក់ រស់នៅជាមួយគ្នាជារៀងរាល់ថ្ងៃ បើនាងមិនទូរស័ព្ទទៅទេ គេនឹងយកកន្ត្រៃមក កាត់សក់ចេញឲ្យអស់ ហើយសម្លាប់ចោលតែម្តង។
ហេតុតែខ្លាចគេសម្លាប់នារីរងគ្រោះបង្ខំ ចិត្តទូរស័ព្ទទៅគូដណ្ដឹង និយាយតាមការគំរាម របស់ជនសង្ស័យហើយ ខណៈដែលបុរសអប្រិយ បង្ខាំងនាងទុកនៅក្នុងបន្ទប់ និងយកកាំបិតចុងស្រួច គំរាមនាងមិនឲ្យចេញទៅណាជាដាច់ខាត។
លុះដល់ ថ្ងៃទី១៦ ខែកញ្ញា ឆ្នាំ២០១៨ ម្ដាយមីងរបស់នារីរងគ្រោះ ដែលបាត់ដំណឹងក្មួយស្រីពេញមួយយប់ ក៏បានដាក់ពាក្យបណ្ដឹងនៅបញ្ជាការដ្ឋានកងរាជអាវុធហត្ថរាជធានីភ្នំពេញឲ្យជួយស្រាវជ្រាវ រហូតឈានទៅដល់រកឃើញទីតាំងបង្ខាំងរូបនាង ដោយសហការជាមួយសមត្ថកិច្ច អាវុធហត្ថខណ្ឌចំការមន។
ពេលប៉េអិមចុះទៅដល់ ជនកំណាចមិនព្រមបើកទ្វារទេ ថែមទាំងគំរាមសមត្ថកិច្ចថា រូបគេនឹងសម្លាប់នារីរងគ្រោះចោលក្នុងបន្ទប់ទៀតផង។ បន្ទាប់មកជនសង្ស័យ បានយកស្ប្រ៉ៃយ៍បាញ់ទៅលើទ្វារកញ្ចក់ មិនឲ្យសមត្ថកិច្ចមើលឃើញដល់ក្នុងបន្ទប់ បម្រុងរត់គេចខ្លួន តែមិនអាចចេញទៅណារួច ក៏ត្រូវបានកម្លាំងសមត្ថកិច្ចអាវុធហត្ថទម្លាយទ្វារចូលទៅឃាត់ខ្លួន និងរំដោះនារីរងគ្រោះបានតែម្តង។
បន្ទាប់មក សមត្ថកិច្ច កសាងសំណុំរឿងបញ្ជូនជនកំណាចនេះ ឡើងតុលាការឃុំខ្លួនរហូតដល់ថ្ងៃកាត់ក្ដីនេះ ស្រាប់តែចៅក្រមតុលាការបិទទ្វារកាត់ក្ដីក្រោមរូបភាពសវនាការអសាធារណៈ៕
Source: Kampuchea Thmey Daily
0 Comments