ភ្នំពេញ ៖ យោងតាមប្រភពព័ត៌មានប្រាប់ឲ្យដឹងថា ការសាងសង់ស្ពានអាកាស និងផ្លូវក្រោមដីនៅរង្វង់មូលចោមចៅ នេះ ត្រូវបានបែងចែកជា៣ផ្នែក គឺ ស្ពានទី១-ជាស្ពានមេតភ្ជាប់ចរាចរ ពីមហាវិថីសហព័ន្ធរុស្ស៊ី មកផ្លូវជាតិលេខ៣ មានប្រវែង៤០៨ម៉ែត្រ ទទឹង១៥ម៉ែត្រ៨ ដែលមានចរាចរ២គន្លងទៅ ២គន្លងមកជម្រាល និងកម្ពស់អតិបរមា ដែលអាចចរាចរក្រោមស្ពានបាន៥ម៉ែត្រកន្លះ។ ស្ពានទី២-បំបែកចេញពីស្ពានអាកាសមេ បត់ឆ្វេងតភ្ជាប់ចរាចរ ពីមហាវិថីសហព័ន្ធរុស្ស៊ី ឆ្ពោះទៅផ្លូវសម្រាប់ចរាចរ ១ទិស ដែលមាន ១គន្លងរថយន្ត និងមួយគន្លងទោចក្រយាយន្ត សរុប២០២ម៉ែត្រ។ ស្ពានទី៣ ជាស្ពានកោងបត់ឆ្វេង តភ្ជាប់ចរាចរផ្លូវវេងស្រេង មកផ្លូវជាតិលេខ៣។ ចំពោះផ្លូវក្រោមដី ជាផ្លូវកោងតភ្ជាប់ចរាចរ ពីផ្លូវវេងស្រេង មកផ្លូវជាតិលេខ៤។
សូមបញ្ជាក់ឲ្យដឹងថា ការសាងសង់ស្ពានអាកាស និងផ្លូវក្រោមដីនៅរង្វង់មូលចោមចៅនេះ គឺជាគម្រោងរបស់រាជរដ្ឋាភិបាលកម្ពុជា តាមរយៈរដ្ឋបាលរាជធានីភ្នំពេញ ដោយទទួលម៉ៅការសាងសង់ ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយចាប់ដំណើរការសាងសង់ក្នុងរយៈពេល៣០ខែ និងចំណាយថវិកាសាងសង់ ចំនួន២២លានដុល្លារ៕
Source: Kampuchea Thmey Daily
0 Comments