ភ្នំពេញ ៖ នៅថ្ងៃទី៨ ខែមីនា ឆ្នាំ២០១៩នេះ សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនចោរឆក់២នាក់ ទៅតុលាការ ដើម្បីធ្វើការសាកសួរ។
ជនសង្ស័យទាំង២នាក់ ទី១- ឈ្មោះ សួន រឿងរ៉ាក់ ភេទប្រុស អាយុ១៧ឆ្នាំ។ ទី២-ឈ្មោះ ទិត្យ ច័ន្ទដារ៉ា ភេទប្រុស អាយុ១៦ឆ្នាំ។ ពួកគេទាំង២នាក់ខាងលើ ត្រូវបានកម្លាំងល្បាតមូលដ្ឋានអាវុធហត្ថខណ្ឌដូនពេញឃាត់ខ្លួនបាន កាលពីថ្ងៃទី៤ ខែមីនា ឆ្នាំ២០១៩ នៅចំណុចផ្លូវលេខ៦១ កែងផ្លូវ៩២ សង្កាត់វត្តភ្នំ ខណ្ឌដូនពេញ រាជធានីភ្នំពេញ បន្ទាប់ពីពួកគេបានធ្វើសកម្មភាពឆក់កាបូបរបស់ប្រជាពលរដ្ឋដែលធ្វើដំណើរលើដងផ្លូវ។
សមត្ថកិច្ចបានបញ្ជាក់ថា ពួកគេទាំង២នាក់ បានសារភាពឲ្យដឹងថា នៅថ្ងៃកើតហេតុ រូបគេទាំង២នាក់ បានជិះម៉ូតូ១គ្រឿង ម៉ាក ហុងដា សេ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ ភ្នំពេញ 1HI-0770 ចេញពីផ្ទះនៅម្តុំទួលសង្កែ ដោយគោលបំណងជិះដើររកឆក់សម្ភារៈមានតម្លៃពីប្រជាពលរដ្ឋដែលធ្វើដំណើរលើដងផ្លូវ លុះពេលជិះដល់រង្វង់មូលគួចកាណុង បានជួបបក្ខពួក៣នាក់ទៀត មានឈ្មោះ ង៉ោល(គេចខ្លួន),ឈ្មោះ ខូច(គេចខ្លួន) និង១នាក់មិនស្គាល់ឈ្មោះ(គេចខ្លួន) ជិះម៉ូតូ២គ្រឿង ម៉ាក Beat ពណ៌ខៀវលាយស និងពណ៌ក្រហម ហើយបានបបួលគ្នាជិះដើររកឆក់ទាំងអស់គ្នា ក្រោយពេលជិះដល់ចំណុចផ្លូវ៩៤ កែងរង្វង់មូលវត្តភ្នំ ក៏ឃើញស្ត្រីម្នាក់អង្គុយលើម៉ូត ម៉ាកហុងដា ពណ៌ខ្មៅ មានស្ពាយកាបូបតូចចំហៀង ពួកគេបានជិះទៅក្បែរជនរងគ្រោះ ក៏ធ្វើសកម្មភាពឆក់តែម្តង។ ក្នុងពេលនោះ មានសមត្ថកិច្ចអាវុធហត្ថខណ្ឌដូនពេញ ល្បាតក្នុងភូមិសាស្ត្ររបស់ខ្លួនឃើញ បានដេញតាមពួកគេដល់ចំណុច មុខសណ្ឋាគារសាន់វ៉េ ទើបឃាត់ខ្លួនបាន ចំណែកបក្ខពួកផ្សេងទៀតបានរត់គេចខ្លួនបាត់។
ឈ្មោះ សួន រឿងរ៉ាក់ បានប្រាប់បន្ថែមថា កន្លងមក កាលអំឡុងខែមករា ដល់ខែមីនា ឆ្នាំ២០១៩ រូបគេធ្លាប់ធ្វើសកម្មភាពឆក់ទូរស័ព្ទដៃ ពីប្រជាពលរដ្ឋបានចំនួន៤លើក ជាមួយបក្ខពួកឈ្មោះ ញ៉ា(គេចខ្លួន), ឈ្មោះ ខួច (គេចខ្លួន) និងឈ្មោះ រ៉ា (គេចខ្លួន) នៅចំណុចរង្វង់មូលគួចកាណុង និងរង្វង់មូលវត្តភ្នំ។
ឈ្មោះ ទិត្យ ច័ន្ទដារ៉ា ប្រាប់បន្ថែមថា កន្លងមកកាលអំឡុងខែធ្នូ ឆ្នាំ២០១៨ រូបគេធ្លាប់ធ្វើសកម្មភាពឆក់ទូរស័ព្ទដៃពីជនបរទេស២លើក ជាមួយបក្ខពួកឈ្មោះ វណ្ណ (គេចខ្លួន) ដោយប្រើប្រាស់មធ្យោបាយម៉ូតូ២គ្រឿង ម៉ាកហុងដា សេ១២៥ ស៊េរីឆ្នាំ២០១៩ដើម្បីធ្វើសកម្មភាព៕
Source: Kampuchea Thmey Daily
0 Comments