ភ្នំពេញ ៖ ក្រសួងសុខាភិបាលបានចេញសេចក្តីក្រើនរំលឹកដល់សាធារណជន និងអាជ្ញាធរគ្រប់លំដាប់ថ្នាក់ទាំងអស់ឲ្យមានការប្រុងប្រយ័ត្នខ្ពស់ចំពោះជំងឺគ្រុនឈាមព្រោះនៅឆ្នាំ២០១៩នេះជំងឺគ្រុនឈាមអាចនឹងផ្ទុះឡើង។
ការក្រើនរំលឹករបស់ក្រសួងសុខាភិបាលនេះបានធ្វើឡើងបន្ទាប់ពីគេសង្កេតឃើញថា មាន ករណីជំងឺគ្រុនឈាមនៅទូទាំងប្រទេស ក្នុងដើមឆ្នាំ២០១៩នេះ មានការកើនឡើងគួរឲ្យកត់សម្គាល់បើប្រៀបធៀបទៅនឹងពេលវេលាដូចគ្នាកាលពីឆ្នាំ២០១៨កន្លងទៅ។
ម្យ៉ាងទៀតតាមតាមការវិភាគអេពីដេមីសាស្ត្រ និងការប៉ាន់ប្រមើលលើស្ថានភាពជំងឺគ្រុនឈាមរបស់អង្គការសុខភាពពិភពលោក បង្ហាញថាជំងឺគ្រុនឈាម ប្រហែលជាអាចនឹងផ្ទុះឡើង នៅក្នុងឆ្នាំ២០១៩នេះ ដែលតម្រូវឲ្យប្រជាពលរដ្ឋ និងអាជ្ញាធរមូលដ្ឋានគ្រប់លំដាប់ថ្នាក់ មានការប្រុងប្រយ័ត្នយកចិត្តទុកដាក់ចូលរួមយ៉ាងសកម្មក្នុងការអនុវត្តន៍វិធានការមានដូចខាងក្រោមដើម្បីជៀសផុតពីភាពអាចមានការផ្ទុះឡើងនូវជំងឺគ្រុនឈាម នៅក្នុងឆ្នាំនេះ និងឆ្នាំបន្តបន្ទាប់ទៀត។
បើតាមសេចក្តីក្រើនរំលឹករបស់ក្រសួងសុខាភិបាល ចេញផ្សាយកាលពីថ្ងៃទី០៤ ខែមីនា ឆ្នាំ២០១៩បានឲ្យដឹងថា កត្តាមួយក្នុងចំណោមកត្តាជាច្រើនដែលបង្កឲ្យមានជំងឺគ្រុនឈាមនោះ គឺបម្រែបម្រួលអាកាសធាតុ និងវត្តមានជម្រកមូសខ្លា នៅតាមផ្ទះសម្បែង ឬទីធ្លាសាធារណៈ។
ក្រសួងសុខាភិបាល បានអះអាងថា ជំងឺគ្រុនឈាម ជាជំងឺអាចកើតឡើងលើមនុស្សគ្រប់វ័យ ដែលបង្កឡើងដោយមូសខ្លាញីខាំបឺតឈាមអ្នកដែលមានវីរុសនឈាម ចម្លងពីមនុស្សម្នាក់ទៅម្នាក់ទៀត។ មូសខ្លា កកើតកូនចៅនៅក្នុងទឹកថ្លាស្អាត និងចូលចិត្តរស់នៅជិតមនុស្ស ហើយហើរក្នុងចំងាយមិនលើសពី១៥០ម៉ែត្រពីជម្រកកកើតមូស។
ជំងឺគ្រុនឈាមមានរោគសញ្ញាដូចតទៅគឺ ២ទៅ៣ថ្ងៃក្រោយពីមូសខ្លាញីខាំ អ្នកជំងឺមានក្តៅខ្លួនពី ៣៩ ទៅ ៤០ អង្សាសេអមដោយរោគសញ្ញាផ្សេងៗទៀតដូចជា មុខក្រហម ឈឺប្រឡង់កែវភ្នែកចាក់ទៅក្រោយ ឈឺក្បាល ចង់ក្អួតឬកួត ឈឺពោះ ឈឺសាច់ដុំ ឈឺសន្លាក់ដៃជើង ស្នាមអុចៗក្រហមលើស្បែក ឬ មានហូរឈាមតាមអញ្ចាញធ្មេញជាដើម។
យោងតាមការស្រាវជ្រាវបាណកសាស្ត្រ របស់កម្មវិធីជាតិប្រយុទ្ធនឹងជំងឺគ្រុនឈាមនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រនៃក្រសួងសុខាភិបាល រួមសហការជាមួយមន្ទីរសុខាភិបាលរាជធានី-ខេត្ត បានបញ្ជាក់ឲ្យឃើញថា មូសខ្លាចូលចិត្តពង និងបង្កបង្កើតកូនចៅ ក្នុងសំបកកង់ឡាននិងសំបកកង់ម៉ូតូចាស់ៗ ចំនួន១១ដង ច្រើនជាងវត្ថុដក់ទឹក ឬដាក់ទឹកផ្សេងៗ។
នៅក្នុងខែមករា ឆ្នាំ២០១៩កន្លងមកនេះ កម្មវិធីជាតិប្រយុទ្ធនឹងជំងឺគ្រុនឈាមបានធ្វើការអង្កេតបាណកសាស្ត្រនៅតាមទីតាំងដែលជ្រើសរើសសម្រាប់ធ្វើការសិក្សា និងពិនិត្យតាមដានស្ថានភាពមូសខ្លាក្នុងរាជធានីភ្នំពេញ នារដូវប្រាំងនេះ ដែលលទ្ធផលបានបង្ហាញឲ្យឃើញថា មូសស្ទើរតែទាំងអស់សុទ្ធតែ ជាមូសអង្កាម។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅក្នុងសេចក្តីក្រើនរំលឹកក្រសួងសុខាភិបាលដោយអំពាវនាវនិងណែនាំដល់ប្រជាពលរដ្ឋគ្រប់រូបត្រូវចូលរួមលប់បាត់ជម្រកមូសខ្លាដោយប្រកាន់ខ្ជាប់នូវការរស់នៅគំរូល្អគឺខ្ញុំនិងគ្រួសារខ្ញុំជាគ្រួសារគំរូព្រោះផ្ទះខ្ញុំនិងលំនៅឋានរបស់ខ្ញុំគ្មានដង្កូវទឹក។
ជាមួយគ្នានេះដែរ លោករដ្ឋមន្ត្រីបានណែនាំដល់ប្រជាពលរដ្ឋត្រូវសំអាតលំនៅឋានឲ្យបានស្អាតលុបបំបាត់កុំឲ្យមានវត្ថុដែលអាចដក់ទឹកបានដូចជាសំបកកង់ឡាន កង់ ដូងព្រោះវត្ថុទាំងនេះជាជម្រកនៃការកកើតដង្កូវទឹកហើយវិវត្តន៍ទៅជាមូសខ្លាដែលជាភ្នាក់ងារចម្លងជំងឺគ្រុនឈាម។
លោករដ្ឋមន្ត្រីបានលើកឡើងទៀតថា នៅពេលសង្ស័យថាមានកើតជំងឺគ្រុនឈាមត្រូវប្រញាប់ទៅកាន់មន្ទីរពេទ្យឬមណ្ឌលសុខភាពដែលនៅជិតផ្ទះបំផុត ដើម្បីឲ្យគ្រូពេទ្យពិនិត្យព្យាបាលឲ្យបានទាន់ពេលវេលាបើទុកយូរអាចធ្វើឲ្យអ្នកជំងឺរងគ្រោះថ្នាក់ដល់អាយុជីវិតបាន៕
Source: Kampuchea Thmey Daily
0 Comments