ភ្នំពេញ ៖ យុវជនងប់ងុលថ្នាំញៀនម្នាក់ ត្រូវបានសមត្ថកិច្ចឃាត់ខ្លួនតាមបណ្តឹងរបស់ប្រជាពលរដ្ឋម្នាក់ ចោទប្រកាន់ថា បានទម្លុះទម្លាយរបងផ្ទះប៉ុនប៉ងចូលលួចទ្រព្យសម្បត្តិក្នុងសកម្មភាពជាក់ស្តែងកាលពីព្រលប់ថ្ងៃទី២០ ខែមីនា ឆ្នាំ២០១៩ នៅក្នុងការដ្ឋានសំណង់មួយកន្លែងមានទីតាំងនៅភូមិទំនប់ សង្កាត់ភ្នំពេញថ្មី ខណ្ឌសែនសុខ។
លោក សាយនី យូសុន អាយុ៣៩ឆ្នាំ មុខរបរមេការសំណង់ ជាដើមចោទនិងជាម្ចាស់ទីតាំងផ្ទះកើតហេតុបាននិយាយថា នៅមុនពេលកើតហេតុគាត់កំពុងតែនៅក្នុងការដ្ឋានសំណង់ក្រោយមកនៅវេលាម៉ោង១៧ស្រាប់តែឮសម្លេងក្រាកៗ នៅខាងក្រោយក៏ទៅមើលស្រាប់តែឃើញជនសង្ស័យខាងលើកំពុងតែចាប់ហែកស័ង្កសីដែលហ៊ុមព័ទ្ធរបងការដ្ឋានសំណង់អស់ចំនួន១ផ្ទាំងប្រវែង៤ម៉ែត្រ ពេលនោះក៏នាំគ្នាចាប់ខ្លួនយកមកប្រគល់ឲ្យសមត្ថកិច្ចមូលដ្ឋានចាត់ការតាមច្បាប់តែម្តង។
ជនសង្ស័យខាងលើឈ្មោះ ម៉ា រដ្ឋា ហៅង៉ូវ ភេទប្រុស អាយុ២៥ឆ្នាំ គ្មានមុខរបរច្បាស់លាស់ មានទីលំនៅភូមិត្រពាំងស្វាយ សង្កាត់គោកឃ្លាង ខណ្ឌសែនសុខ។
ប៉ូលិសនិយាយថា ជនសង្ស័យក្នុងអំពើចោរកម្មនេះ មានផ្ទុកសារធាតុថ្នាំញៀននៅក្នុងខ្លួនដោយសារតែគេលួចដើម្បីយកលុយទៅទិញថ្នាំញៀនសេពដោយខុសច្បាប់។ ជនប្រភេទនេះលួចគ្មានរើសមុខទេ ប្រទះអីយកហ្នឹងឲ្យតែម្ចាស់មិននៅគេនឹងធ្វើសកម្មភាពគាស់ផ្ទះលួចទ្រព្យសម្បត្តិគេដូច្នេះតែម្តង៕
Source: Kampuchea Thmey Daily
0 Comments