ក្រុម​ជម្រើសជាតិ​នារី​ក្រោម​អាយុ​១៥​ឆ្នាំ​បន្ត​ជា​លើកចុងក្រោយ​ក្នុង​ពានរង្វាន់​អន្តរជាតិ​មួយ​នៅ​សឹង្ហ​បុរី

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) បានសម្រេច​បញ្ជូន​ក្រុមបាល់ទាត់​ជម្រើសជាតិ​នារី​កម្ពុជា អាយុ​ក្រោម​អាយុ​១៥​ឆ្នាំ (U15) ទៅ​ចូលរួម​ប្រកួត​ក្នុង​កម្មវិធី​ពានរង្វាន់​អន្តរជាតិ UEFA-FAS U15′ Girls’ Tournament 2019 នៅ​ប្រទេស​សឹង្ហ​បុរី ខណៈ​ក្រុម​នេះ​ដឹកនាំ​ដោយ​លោក អ៊ុំ សាវង្ស គ្រូ​ជំនួយ​នៅ​ក្លិប​ក្រសួងការពារជាតិ​។​

យោង​តាម​ការ​បញ្ជាក់​ពី​វិ​ប​សាយ​ផ្លូវការ​របស់​សហព័ន្ធ​កីឡាបាល់ទាត់​សឹង្ហ​បុរី ( FAS) បាន​លើក​ឡើង​ថា ​ពានរង្វាន់​អន្តរជាតិ UEFA-FAS U15′ Girls’ Tournament 2019 ចាប់ពី​ថ្ងៃទី​១៧​ដល់​២១ ខែមីនា ឆ្នាំ​២០១៩ នៅលើ​ទីលាន​កីឡដ្ឋាន Our Tampines Hub​ប្រទេស សឹង្ហ​បុរី ស្រប​ពេល​ពានរង្វាន់​នេះដែរ​នឹង​មាន​ក្រុម​មកពី​តំណាង​ប្រទេស​ចំនួន​៤​គឺ កម្ពុជា ម៉ុ​ល​ដូ​វ៉ា ហ្គា​ម និង​ម្ចាស់ផ្ទះ​សិង្ហ​បុរី​។

​ចំណែក​លទ្ធផល​នៃ​ការប្រកួត​បើកឆាក​ដំបូង​គឺ​នៅ​ថ្ងៃទី ១៧ មីនា​ក្រុម​កម្ពុជា បាន​ចាញ់​ក្រុម​ម៉ុ​ល​ដូ​វ៉ា ៥​ទល់​០ ហើយ​ក្រុម​ម្ចាស់ផ្ទះ​សឹង្ហ​បុរី ឈ្នះ​ក្រុម​ហ្គា​ម ៧​ទល់​០ ហើយ​ថ្ងៃទី​២ គឺ​នៅ​ថ្ងៃទី​១៩ ខែមីនា ឆ្នាំ​២០១៩ ក្រុម​ហ្គា​ម ចាញ់​ក្រុម​ម៉ុ​ល​ដូ​វ៉ា ៥​ទល់​០ ហើយ​ក្រុម​កម្ពុជា ចាញ់​ក្រុម​សឹង្ហ​បុរី ១​ទល់​០​។ សម្រាប់​ប្រកួត​ចុងក្រោយ​នៅ​ថ្ងៃទី​២១ ខែមីនា ឆ្នាំ​២០១៩ ក្រុម​កម្ពុជា បន្ត​ចាញ់​ក្រុម​ហ្គា​ម ២​ទល់​១ ហើយ​ក្រុម​សឹង្ហ​បុរី ចាញ់​ក្រុម​ម៉ុ​ល​ដូ​វ៉ា ៣​ទល់​០​។

រូបមន្ត​នៃ​ការប្រកួត​នេះ​គឺ​តម្រូវ​ឲ្យ​ក្រុម​ទាំង​៤​ប៉ះគ្នា​ដើម្បី​សន្សំ​ពិន្ទុ ហើយ​ក្រុម​ណា​ទទួល​បាន​ពិន្ទុ​ច្រើន​ជាង​គេ​ក្រុម​នោះ​នឹង​ឈ្នះ​ជើងឯក​តែម្តង​។ ជា​លទ្ធផល​ជើងឯក​បាន​ទៅ​ក្រុម​ម៉ុ​ល​ដូ​វ៉ា មាន​៩​ពិន្ទុ​ហើយ​ជើងឯក​រង​បាន​ទៅ​ក្រុម​ម្ចាស់​សឹង្ហ​បុរី មាន​៦​ពិន្ទុ ខណៈ​ក្រុម​ហ្គា​ម ឈរ​លេខ​៣​មាន​៣​ពិន្ទុ និង​ក្រុម​កម្ពុជា នៅ​បាត​តារាង​មិនមាន​ពិន្ទុ​កាន់​នោះទេ​។

​ពានរង្វាន់​បាល់ទាត់​នេះ​ដែរ ​គឺជា​ផ្នែក​មួយ​នៃ UEFA ASSIST ដែល​បង្កើត​ឡើង​ដោយ​សហព័ន្ធ​កីឡាបាល់ទាត់​សឹង្ហ​បុរី តាំងពី​ឆ្នាំ ២០១៧ មក​ម្ល៉េះ ក្នុង​គោលដៅ​ដើម្បី​ពង្រឹងសមត្ថភាព បច្ចេកទេស ដល់​កីឡាករ​យុវជន​ទាំង​ផ្នែក​បុរស និង​នារី​។ សម្រាប់​ក្រុមបាល់ទាត់​សឹង្ហ​បុរី បានកំណត់​កាលបរិច្ឆេទ​នៃ​ការប្រកួត​នេះ​គឺ​ដើម្បី​សម្រាប់​ជាការ​ត្រៀមខ្លួន​របស់​ក្រុម U15​នារី របស់ខ្លួន​ចូលរួម​ប្រកួត​ក្នុង​ពាន​រង្វាន់​ជើង​ឯក​តំបន់​អាស៊ាន​ AFF Under-15 Girl Championship៕

Source: Kampuchea Thmey Daily