កណ្តាល ៖ ក្រុមក្មេងស្ទាវចំនួន៣នាក់ ក្នុងចំណោម៤នាក់ ត្រូវបានសមត្ថកិច្ចនគរបាលស្រុកពញាឮឃាត់ខ្លួន ពីបទប្រើប្រាស់ថ្នាំញៀនខុសច្បាប់ កាលពីព្រឹកថ្ងៃទី២៣ ខែមីនា ឆ្នាំ២០១៩ នៅផ្ទះទំនេរក្នុងចម្ការមួយ ស្ថិតនៅភូមិទេព្យប្រណម ឃុំវិហារលួង ស្រុកពញាឮ ខេត្តកណ្តាល។
សមត្ថកិច្ចបានឲ្យដឹងថា ក្រុមជនដែលត្រូវបានឃាត់ខ្លួនខាងលើរួមមាន ៖
១.ឈ្មោះ អូន នរិទ្ធីយ៉ា ភេទប្រុស អាយុ២៦ឆ្នាំ ជនជាតិខ្មែរ គ្មានមុខរបរ មានទីលំនៅភូមិប្រក់ក្តារ ឃុំវិហារលួង ស្រុកពញាឮ ខេត្តកណ្តាល។
២. ឈ្មោះ ទន ដេវីត ភេទប្រុស អាយុ១៩ឆ្នាំ គ្មានមុខរបរ មានទីលំនៅភូមិព្រែកជីក ឃុំកោះចិន ស្រុកពញាឮ ខេត្តកណ្ដាល។
៣.ឈ្មោះ ម៉ៅ ស៊ីណាក់ ភេទប្រុស អាយុ៣០ឆ្នាំ ជនជាតិខ្មែរ មុខរបរកម្មករសំណង់ មានទីលំនៅ ភូមិព្រែកក្តាម២ ឃុំកោះចិន ស្រុកពញាឮ ខេត្តកណ្តាល។
នៅថ្ងៃទី២៣ ខែមីនា ឆ្នាំ២០១៩ វេលាម៉ោង៩និង៣០នាទីព្រឹក ប្រជាជន បានឃើញក្រុមជនសង្ស័យមកជួបជុំគ្នាទាំងព្រឹក ដើម្បីជក់ថ្នាំញៀន ក៏បានរាយការណ៍សមត្ថកិច្ច។
ក្រោយពីទទួលបានព័ត៌មានខាងលើរួចមក ផ្នែកជំនាញ បានសហការជាមួយកម្លាំងប៉ុស្តិ៍រដ្ឋបាលវិហារលួង ចុះមកកន្លែងកើតហេតុតាមការចង្អុលបង្ហាញនោះ គឺនៅក្នុងផ្ទះទំនេរ ក្នុងចម្ការមួយ ស្ថិតនៅភូមិប្រក់ក្តារ ឃុំវិហារលួង បានឡោមព័ទ្ធចូលទៅឆែកឆេរ នៅក្នុងផ្ទះនោះ ឃាត់ខ្លួនជនសង្ស័យនៅកន្លែងកើតហេតុបានចំនួន៣នាក់ និងម្នាក់ទៀតរត់គេចខ្លួន។
នៅក្នុងការបង្ក្រាបនោះ សមត្ថកិច្ច ពុំបានរកឃើញថ្នាំញៀនទេ រកឃើញតែសំបកដប និងទុយយោជ័រ ដែលពួកគេកែច្នៃធ្វើជាឧបករណ៍សម្រាប់សេព(ជក់) ដែលពួកគេបានកំពុងតែធ្វើសកម្មភាពរួចរាល់នៅទីនោះ និងមានសំបកថង់ថ្នាំញៀនបន្សល់ទុកដែលគេប្រើប្រាស់អស់។
នៅចំពោះមុខសមត្ថកិច្ច ជនសង្ស័យបានសារភាពថា ថ្នាំញៀនដែលពួកខ្លួនយកមកជក់នៅពេលកើតហេតុនេះ គឺឈ្មោះអាអណ្តើក ដែលបានរត់គេចខ្លួននោះជាអ្នកទិញយកមក ហើយបានហៅពួកខ្លួនឲ្យមកជក់ថ្នាំញៀននេះរួមគ្នា៕
Source: Kampuchea Thmey Daily
0 Comments