ភ្នំពេញ ៖ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជាបានអះអាងថា មានមូលហេតុជាច្រើន ដែលកម្ពុជាយើងសម្រេចធ្វើជាផ្ទះនៃកិច្ចប្រជុំកំពូលអាស៊ី-អឺរ៉ុប (ASEM) នៅឆ្នាំក្រោយ ពីព្រោះកិច្ចប្រជុំនេះ ត្រូវបានចាត់ទុកជាវេទិកាផ្លូវការតែមួយគត់ សម្រាប់កិច្ចសន្ទនា និងកិច្ចសហប្រតិបត្តិការរវាងទ្វីបអាស៊ី និងអឺរ៉ុប ដែលផ្ដោតលើការងារពង្រឹងភាពជាដៃគូជំរុញឲ្យមានសន្តិភាព និងលើកកម្ពស់ការអភិវឌ្ឍសេដ្ឋកិច្ចសង្គមប្រកបដោយចីរភាព។
ការបញ្ជាក់របស់ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជាបែបនេះ ខណៈដែលឯកឧត្តមអញ្ជើញជាអធិបតីក្នុងទិវាកិច្ចប្រជុំអាស៊ី-អឺរ៉ុប ស្តីពី "កម្ពុជាឆ្ពោះទៅកិច្ចប្រជុំកំពូលអាស៊ី-អឺរ៉ុប លើកទី១៣ ឆ្នាំ២០២០ និងគោលនយោបាយការបរទេសកម្ពុជា ក្នុងបរិបទសកលបច្ចុប្បន្ន" ដែលកិច្ចប្រជុំនេះ រៀបចំឡើងនៅវិទ្យាស្ថានជាតិអប់រំ កាលពីព្រឹកថ្ងៃទី១១ ខែមីនា ឆ្នាំ២០១៩ ដែលសហការរៀបចំដោយក្រសួងអប់រំ យុវជន និងកីឡា និងក្រសួងការបរទេស និងសហប្រតិបត្តិការអន្តរជាតិ។
ថ្លែងទៅកាន់អ្នកចូលរួម ឯកឧត្តមឧបនាយករដ្ឋមន្ត្រី ប្រាក់ សុខុន លើកជាសំណួរថា ហេតុអ្វីបានជាកម្ពុជាទទួលធ្វើជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប (ASEM) លើកទី១៣ នៅឆ្នាំ ២០២០ ហើយកិច្ចប្រជុំកំពូលនេះមានសារៈសំខាន់ដូចម្ដេចខ្លះ ?។
ឯកឧត្តមឧបនាយករដ្ឋមន្ត្រី ប្រាក់ សុខុន បានលើកឡើងថា កិច្ចប្រជុំកំពូលអាស៊ី-អឺរ៉ុប (ASEM) ត្រូវបានចាត់ទុកជាវេទិកាផ្លូវការតែមួយគត់សម្រាប់កិច្ចសន្ទនា និងកិច្ចសហប្រតិបត្តិការរវាងទ្វីបអាស៊ី និងអឺរ៉ុប ដែលផ្ដោតលើការងារពង្រឹងភាពជាដៃគូជំរុញឲ្យមានសន្តិភាព និងលើកកម្ពស់ការអភិវឌ្ឍសេដ្ឋកិច្ចសង្គមប្រកបដោយចីរភាព។ កិច្ចប្រជុំនេះ មានវិសាលភាពគ្របដណ្ដប់លើទិដ្ឋភាពនយោបាយ និងសន្តិសុខកិច្ចសហប្រតិបត្តិការសេដ្ឋកិច្ច និងទិដ្ឋភាពវប្បធម៌សង្គម ហើយយន្តការនេះ គឺជាវេទិកាដ៏ល្អប្រសើរសម្រាប់ថ្នាក់ដឹកនាំដោះស្រាយបញ្ហាប្រឈមសកលនានាផងដែរ.
តាមឯកឧត្តមឧបនាយករដ្ឋមន្ត្រី ប្រាក់ សុខុន ចាប់តាំងពីកិច្ចប្រជុំកំពូលលើកដំបូងនាខែមីនាឆ្នាំ១៩៩៦ នៅទីក្រុងបាងកក ដែលមានរដ្ឋជាស្ថាបនិកត្រឹមតែ២៦ប៉ុណ្ណោះ វេទិកានេះបានពង្រីកសមាជិកភាពរបស់ខ្លួនរហូតដល់ទៅ៥៣ប្រទេស និងដៃគូ។ បូកបញ្ចូលគ្នាទៅ វេទិកា ASEM នេះ បានតំណាងឲ្យប្រមាណ៦៥ ភាគរយនៃសេដ្ឋកិច្ចពិភពលោក, ៦០ភាគរយនៃប្រជាជន, ៥៥ភាគរយ នៃពាណិជ្ជកម្ម និង៧៥ភាគរយនៃទេសចរណ៍ពិភពលោក។ ឯកឧត្តមឧបនាយករដ្ឋមន្ត្រីបន្តថា កម្ពុជាបានចូលរួមក្នុងយន្តការនេះ ចាប់តាំងពីកិច្ចប្រជុំកំពូលអាស៊ី-អឺរ៉ុបលើកទី៥ ដែលបានធ្វើឡើងកាលពីឆ្នាំ២០០៤ នៅប្រទេសវៀតណាមមកម្ល៉េះ ដែលយើងចាត់ទុកកិច្ចប្រជុំនេះ ជាវេទិកាដ៏សំខាន់មួយសម្រាប់កិច្ចសហប្រតិបត្តិការរវាងតំបន់ និងតំបន់ដែលផ្តល់ផលប្រយោជន៍ជាច្រើនដល់កម្ពុជា។ ទី១, កិច្ចប្រជុំកំពូលអាស៊ី-អឺរ៉ុប បានផ្ដល់ឲ្យកម្ពុជា នូវឱកាសល្អក្រៃលែង ដើម្បីលើកកម្ពស់មុខមាត់របស់ខ្លួននៅលើឆាកអន្តរជាតិ។ ទី២, វេទិកានេះផ្តល់ឱកាសដល់កម្ពុជាក្នុងការពង្រឹងកិច្ចសហប្រតិបត្តិការទ្វេភាគីរវាងកម្ពុជាជាមួយសមាជិកដទៃទៀត តាមរយៈកិច្ចប្រជុំកម្រិតខ្ពស់នានា នៃដំណើរការរបស់ ASEM និងជំរុញសេដ្ឋកិច្ច និងជំរុញកិច្ចសហប្រតិបត្តិការលើវិស័យជាក់លាក់ សម្រាប់ការអភិវឌ្ឍសេដ្ឋកិច្ចកម្ពុជារួមមានការផ្លាស់ប្ដូរពាណិជ្ជកម្មការវិនិយោគទេសចរណ៍ និងវប្បធម៌ជាដើម។ ទី៣, កិច្ចប្រជុំអាស៊ី-អឺរ៉ុប បានរួមចំណែកលើកស្ទួយការអភិវឌ្ឍធនធានមនុស្សរបស់កម្ពុជាទាំងក្នុងវិស័យសាធារណៈ និងឯកជន។ ទី៤, ការតភ្ជាប់នៃកិច្ចប្រជុំអាស៊ី-អឺរ៉ុប គឺជាវេទិកាដ៏រស់រវើកបំផុតសម្រាប់កម្ពុជា ដើម្បីការលើកកម្ពស់ការផ្លាស់ប្ដូររវាងប្រជាជន និងប្រជាជននៅក្នុងបរិបទ ដែលតំបន់អាស៊ី-អឺរ៉ុប កំពុងតែមានការតភ្ជាប់គ្នាកាន់តែខ្លាំងឡើងខ្លាំងឡើង។
ឯកឧត្តមឧបនាយករដ្ឋមន្ត្រីបានលើកឡើងទៀតថា ជាច្រើនឆ្នាំកន្លងមកនេះ កម្ពុជាបានចូលរួមចំណែកយ៉ាងសកម្មនៅក្នុងសកម្មភាពនានានៃដំណើរការរបស់ ASEM ។ ជាក់ស្ដែងកម្ពុជានឹងធ្វើជាម្ចាស់ផ្ទះនៃព្រឹត្តិការណ៍ ASEM ចំនួន២បន្ថែមលើព្រឹត្តិការណ៍នេះ ដែលរួមមាន "វគ្គបណ្ដុះបណ្ដាលលើកទី៧ ក្រោមគំនិតផ្ដួចផ្ដើមនៃវគ្គបណ្ដុះបណ្ដាលការទូតអាស៊ីអឺរ៉ុប" និង "កិច្ចសន្ទនាស្ដីពីការអភិវឌ្ឍន៍ប្រកបដោយចីរភាពនៃកិច្ចប្រជុំអាស៊ីអឺរ៉ុបលើកទី៨ ក្រោមប្រធានបទការលើកកម្ពស់ភាពជាដៃគូរទឹក ដើម្បីកំណើន និងការអភិវឌ្ឍន៍ប្រកបដោយចីរភាព"។ ជាមួយគ្នានោះ ក៏មានសកម្មភាព និងព្រឹត្តិការណ៍ជាច្រើនទៀត ដែលបណ្តាប្រទេសជាសមាជិក ASEM ផ្សេងទៀតកំពុងធ្វើជាម្ចាស់ផ្ទះ ហើយកម្ពុជាមានគណៈប្រតិភូចូលរួមផងដែរ។
ឯកឧត្តមឧបនាយករដ្ឋមន្ត្រី ប្រាក់ សុខុន បានលើកជាសំណួរទៀតថា ការធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ីអឺរ៉ុប គឺឈរលើគោលការណ៍ស្ម័គ្រចិត្ត និងប្ដូរវេនគ្នារៀងរាល់២ឆ្នាំម្ដង ដោយម្ដងធ្វើនៅអាស៊ី ម្ដងធ្វើនៅអឺរ៉ុប។ កិច្ចប្រជុំកំពូលអាស៊ី-អឺរ៉ុប លើកចុងក្រោយបានធ្វើឡើងនៅខែតុលា ២០១៨ នៅទីក្រុងប្រ៊ុចសែល ដែលនៅទីនោះ សម្តេចតេជោនាយករដ្ឋមន្ត្រីបានប្រកាសជាផ្លូវការ ពីការទទួលយកធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ ហើយការប្រកាសនេះ បានទទួលការផ្តល់តម្លៃ និងអបអរសាទរជាខ្លាំងពីថ្នាក់ដឹកនាំ ASEM ទាំងអស់។
ឯកឧត្តមឧបនាយករដ្ឋមន្ត្រីបញ្ជាក់ដែរថា វាពិតជាភារកិច្ចប្រកបដោយមហិច្ឆតា ដែលយើងទទួលធ្វើជាម្ចាស់ផ្ទះនៃកិច្ចប្រជុំកំពូលដ៏ធំបែបនេះ ពីព្រោះថា នឹងមានការចូលរួមពីថ្នាក់ដឹកនាំកំពូលដល់ទៅ៥៣រូប ហើយប្រាកដណាស់ថា កិច្ចប្រជុំនេះត្រូវការប្រភពធនធានច្រើន ដើម្បីដោះស្រាយការប្រឈមក្នុងការរៀបចំដូចជាបញ្ហាថវិកាធនធានមនុស្សការផ្គត់ផ្គង់ផ្នែកបច្ចេកទេស ហេដ្ឋារចនាសម្ព័ន្ធរូបវន្ត ពិធីការកំរិតខ្ពស់ និងបញ្ហាសន្តិសុខដ៏ល្អិតល្អន់បំផុត ប៉ុន្តែយើងក៏ទទួលស្គាល់ដែរថា ជាមួយនឹងកិច្ចខិតខំប្រឹងប្រែងទាំងនេះកម្ពុជាយើង នឹងបានប្រយោជន៍មកវិញច្រើនផងដែរ ដែលកិច្ចប្រជុំនេះនឹងក្លាយជាព្រឹត្តិការណ៍ប្រវត្តិសាស្ត្រដ៏ធំបំផុត មិនធ្លាប់មានក្នុងប្រវត្តិសាស្ត្រសម័យថ្មីរបស់កម្ពុជា ហើយវាពិតជាកិត្តិយសដ៏វិសេសវិសាលខ្លាំងណាស់សម្រាប់ប្រជាជាតិយើង។ យើងធ្លាប់មានបទពិសោធន៏ក្នុងការរៀបចំដោយជោគជ័យនូវកិច្ចប្រជុំកំពូលថ្នាក់តំបន់ និងថ្នាក់អនុតំបន់ជាច្រើន ដូចជាកិច្ចប្រជុំកំពូលអាស៊ាន ឆ្នាំ២០០២ ឆ្នាំ២០១២ ជាដើម ប៉ុន្តែវាមិនមានទ្រង់ទ្រាយធំដូចកិច្ចប្រជុំកំពូលអាស៊ីអឺរ៉ុបនាលើកនេះឡើយ ដូច្នេះក្នុងឋានៈជារាជរដ្ឋាភិបាលមួយប្រជាជាតិមួយយើងទាំងអស់គ្នាប្តេជ្ញាចិត្តថា នឹងខិតខំឲ្យអស់ពីសមត្ថភាព ដើម្បីធានាឲ្យកិច្ចប្រជុំកំពូលនេះដំណើរការទៅដោយរលូន និងទទួលបានជោគជ័យ៕
Source: Kampuchea Thmey Daily
0 Comments