អ្នកប្រដាល់ស្រករក្រោយ ជ័រ ពៅ ក្លិបថ្មគោលពោធិ៍សែនជ័យ នឹងត្រូវជួបប្រកួតជាមួយសួង សុវណ្ណថា អ្នកប្រដាល់ក្លិបបូរីរាជសីហ៍មានរិទ្ធ ក្នុងនាមជាគូឯក សម្រាប់ការប្រកួតនារសៀលថ្ងៃសៅរ៍ ទី០៩ ខែមីនា ឆ្នាំ២០១៩នេះ នៅលើសង្វៀនបាយ័នស្ទឹងមានជ័យ។
ជាលើកទី១ហើយ ដែល ជ័រ ពៅ ឡើងជាគូឯកនេះ។ ហើយក៏ជាលើកទី១ដែរ សម្រាប់ការជួបប្រកួតជាមួយ សួង សុវណ្ណថា នេះ។ ជ័រ ពៅ ជាអ្នកប្រដាល់ស្រករក្រោយ តែគេមានថ្វីដៃល្អ និងខ្លាំង ហើយធ្លាប់វាយជាមួយអ្នកប្រដាល់ថៃថែមទៀតនាពេលកន្លងមក។
សួង សុវណ្ណថា ជាអ្នកប្រដាល់ជើងចាស់ គេមានកម្រិតសមត្ថភាពបច្ចេកទេសលើ ជ័រ ពៅ ច្រើនគួរសមដែរ។ តែយ៉ាងណាបើធៀបជាមួយ ជ័រ ពៅ សួង សុវណ្ណថា អាចចាញ់ ជ័រ ពៅ។
ជ័រ ពៅ គេមានកណ្ដាប់ដៃល្អ ទាត់ក៏ល្អ និងខ្លាំងដែរ។ ពិសេសនោះ ជ័រ ពៅ គេមានតែមលើ សុវណ្ណថា ត្រង់គេខ្ពស់ជាង ដែលអំណោយផលក្នុងការប្រើជង្គង់ និងកែង។ ប៉ុន្តែយ៉ាងណា បញ្ហាកម្លាំងកាយសម្បទាវិញនោះ ជ័រ ពៅ ក៏អាចឈ្នះសុវណ្ណថាដែរ ព្រោះជ័រ ពៅ គេក្មេងជាង។
រវាងសួង សុវណ្ណថា និង ជ័រ ពៅ ជួបប្រកួតគ្នាលើកនេះ មិនអាចទស្សន៍ទាយមុនបានថា នរណាឈ្នះ នរណាចាញ់នោះឡើយ។
ការប្រកួតចុងក្រោយ ជ័រ ពៅ គឺគេវាយឈ្នះអ្នកប្រដាល់ជើងចាស់ង៉ែត វុធ ក្នុងទឹកទី២ ឯការប្រកួតចុងក្រោយរបស់សួង សុវណ្ណថាវិញ គេប្រកួតឈ្នះដោយការស៊ីឡាកថន ភឿត អ្នកប្រដាល់ក្លិបឃ្លាំងមឿងកីឡាក្នុងទឹកទី២។
និយាយរួម រវាងពួកគេទាំងពីរនាក់នេះ សួង សុវណ្ណថា គេមានផ្លែល្អជាងជ័រ ពៅ ដោយសារគេមានបទពិសោធន៍លើសង្វៀនច្រើនជាង ជ័រ ពៅ។ ចាំមើល ការជួបគ្នារវាង ជ័រ ពៅ និង សួង សុវណ្ណថា នេះ តើអ្នកណាជាអ្នកឈ្នះនោះ?។
អេ រ៉ាវ៉ាន់ចាន់រាជ អ្នកប្រដាល់ក្លិបកុសលកីឡា ត្រូវគេផ្គូឲ្យប្រកួតជាមួយគួន ប៊ុនហ៊ីម អ្នកប្រដាល់ជើងចាស់ក្លិបពន្លឺសាមគ្គីមកពីខេត្តបាត់ដំបង។ ពួកគេប្រកួតគ្នាក្នុងទម្ងន់៥៧គីឡូក្រាម។ ពីរនាក់នេះ មិនធ្លាប់ដែលប៉ះគ្នាម្តងណានៅឡើយទេពីមុនមក។
គួន ប៊ុនហ៊ីម មិនជាអ្នកប្រដាល់ខ្លាំង ឬល្បីឈ្មោះនោះទេ តែគេវាយខ្លាំង កណ្ដាប់ដៃរហ័ស ជើងទាត់ក៏ខ្លាំងដែរ។ ប៉ុន្តែអ្នកប្រដាល់រូបនេះ មានចិត្តប្រដាល់មិនសូវធំនោះទេ។ គេប្រកួតចុងក្រោយនេះ វាយចាញ់ បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាកក្នុងទឹកទី១។
អេ រ៉ាវា់ចាន់រាជ ជាអ្នកប្រដាល់ខ្លាំងស្រករក្រោយ គេមានចិត្តប្រដាល់ធំ។ គេធ្លាប់ជួបអ្នកប្រដាល់ជើងចាស់ប៉ុន្មាននាក់ហើយ ហើយវាយឈ្នះថែមទៀត គឺមិនធម្មតាឡើយ។ ប្រកួតលើកចុងក្រោយនេះ គេវាយឈ្នះ ម៉ន ខួច ក្លិបការិយាល័យទី៥ កងទ័ពជើងគោក ក្នុងទឹកទី១។
ទោះជាយ៉ាងណាក្តី សម្រាប់ការការជួបគ្នារវាង អេ រ៉ាវ៉ាន់ចាន់រាជ និង គួន ប៊ុនហ៊ីម នេះ ពុំមានអ្នកណាហ៊ានទាយមុនថា នរណាឈ្នះ នរណាចាញ់នោះឡើយ។
ជន សាវុធ អ្នកប្រដាល់ក្លិបកងពលដឹកជញ្ជូនលេខ៩០ ត្រូវជួបប្រកួតជាមួយម៉ន វណ្ណី អ្នកប្រដាល់ក្លិបការិយាល័យទី៥ កងទ័ពជើងគោក។ អ្នកប្រដាល់ទាំងពីរនាក់នេះ ជួបគ្នាក្នុងប្រភេទទម្ងន់៥៤ គីឡូក្រាម។ ពួកគេទាំងពីរនេះ ពុំធ្លាប់ដែលប៉ះគ្នាទេកន្លងមក។
ម៉ន វណ្ណី នេះ ជាអ្នកប្រដាល់ស្រករក្រោយ ជន សាវុធ ទេ តែគេវាយសម្រុកខ្លាំង កម្លាំងស៊ុហ្វក៏ខ្លាំង និងរឹងមាំដែរ។ ជាទម្លាប់ប្រកួតកន្លងមក ពីរ ឬបីទឹកដំបូងនោះ ម៉ន វណ្ណី សម្រុកវាយទៅលើគូប្រកួតគ្មានបន្ធូដៃឡើយ គូប្រកួតទប់មិនបានពេលនោះទេ គឺនឹងត្រូវសន្លប់ក្រោមកណ្ដាប់ដៃ ឬកែងរបស់ម៉ន វណ្ណី មិនខាន តែបើសិនជាគូប្រកួតទប់បានវិញនោះ វណ្ណី អាចនឹងចាញ់វិញមិនខាន។
ទោះជាយ៉ាងណា តាមការវិភាគរបស់ក្រុមវិភាគប្រដាល់នោះ រវាងអ្នកប្រដាល់ទាំងពីរនាក់នេះ ប្រហាក់ប្រហែលគ្នាប៉ុណ្ណោះ ដូច្នេះរឿងនរណាឈ្នះ នរណាចាញ់ មិនអាចសន្និដ្ឋានមុនបានទេ។
សំណាង ចាន់នឿន អ្នកប្រដាល់ក្លិបកងចក្ររាជសីហ៍មានរិទ្ធ ត្រូវគេផ្គូឲ្យជួបប្រកួតជាមួយ សយ សុខ អ្នកប្រដាល់ក្លិបវិបុលដារិទ្ធពោធិ៍សែនជ័យ ប្រកួតក្នុងទម្ងន់៥៤គីឡូក្រាមដែរ។ រវាងអ្នកប្រដាល់ទាំងពីរនេះ មិនធ្លាប់ប៉ះគ្នាទេកន្លងមក។ ចាំមើល ពីរនាក់នេះ តើនរណាឈ្នះ?៕
Source: Kampuchea Thmey Daily
0 Comments