ភ្នំពេញ ៖ ស្ត្រីចំណាស់ម្នាក់ បានស្លាប់ភ្លាមៗ យ៉ាងអាណោចអាធ័ម នៅកន្លែងកើតហេតុ ខណៈដែលកំពុងដើរហាត់ប្រាណតាមផ្លូវ ត្រូវបានម៉ូតូកង់បីឥណ្ឌា បើកមកបុកពីក្រោយ ហើយបើករត់គេចទៅបាត់ស្រមោល បន្សល់ទុកសពនៅកន្លែងកើតហេតុ កាលពីវេលាម៉ោង៥និង២០នាទីព្រឹក ថ្ងៃទី២១ ខែមិនា ឆ្នាំ២០១៩នេះ នៅតាមបណ្ដោយផ្លូវបេតុង ភូមិចម្ការឪឡឹក១ សង្កាត់កាកាបទី១ ខណ្ឌពោធិ៍សែនជ័យ ។
ក្នុងហេតុការណ៍នេះត្រូវបានមហាជនលើកឡើងថា ជីវិតពិតជាមើលមិនឃើញមែន ដូចជាករណីសពជនរងគ្រោះនេះអីចឹង គាត់ខំដើរហាត់ប្រាណដើម្បីសុខភាព ព្រោះតែចង់បានអាយុវែងយឺនយូរតទៅទៀត តែមិនគួរណា ចៃដន្យបែរជាក្លាយជាអាយុខ្លី ដោយសារម៉ូតូកង់បីបើកមកបុកដូច្នោះទេ។
សពស្ត្រីរងគ្រោះក្រោយពីសមត្ថកិច្ចស្រាវជ្រាវ ភ្លាមៗ ត្រូវបានស្គាល់អត្តសញ្ញាណ មានឈ្មោះ យ៉ែម សារី ហៅអូន អាយុ៦១ឆ្នាំ មុខរបរនៅផ្ទះ ស្នាក់នៅជាមួយកូន នៅភូមិចម្ការឪឡឹក២ ខណ្ឌសង្កាត់កាកាបទី២ ខណ្ឌពោធិ៍សែនជ័យ ជួនស្នាក់នៅជាមួយកូនម្នាក់ទៀត នៅភូមិត្រពាំងត្នោត ឃុំម្កាក់ ស្រុកអង្គស្នួល ខេត្តកណ្តាល មានស្រុកកំណើតនៅស្រុកមុខកំពូល ខេត្តកណ្ដាល។
យោងតាមសម្តីក្រុមគ្រួសារបានឲ្យដឹងថា ស្ត្រីរងគ្រោះ ជួនស្នាក់នៅជាមួយកូននៅស្រុកអង្គស្នួល ជួនមកស្នាក់នៅជាមួយកូននៅក្នុងភូមិចម្ការឪឡឹក២ ហើយជនរងគ្រោះ បន្ទាប់ពីមកស្នាក់នៅជាមួយកូននៅទីនេះ ជួយមើលថែចៅៗ ជារៀងរាល់ព្រឹក និងតែងតែដើរហាត់ប្រាណ ហើយនៅព្រឹកថ្ងៃកើតហេតុនេះ គាត់ដើរចេញក្រៅហាត់ប្រាណតាមផ្លូវដូចសព្វដង ស្រាប់តែជួបគ្រោះថ្នាក់បែបនេះតែម្តង។
តែបើតាមប្រជាពលរដ្ឋរស់នៅក្បែរកន្លែងកើតហេតុបានឲ្យដឹងថា មុនកើតហេតុ ជនរងគ្រោះ ដើរហាត់ប្រាណ តាមផ្លូវបេតុងខាងលើ ពីជើងទៅត្បូង អស់មួយសន្ទុះ ក៏បានដើរវិលត្រឡប់មកវិញ ក្នុងទិសដៅពីត្បូងទៅជើង ហើយឆ្លៀតចូលទិញនំឆាខ្វៃចំនួន២គូ កាន់នៅដៃផង លុះដើរដល់ចំណុចកើតហេតុ ស្រាប់តែមានម៉ូតូកង់បីឥណ្ឌា ពណ៌ស មួយគ្រឿង បើកពីត្បូងទៅជើងស្របទិស បុកពីក្រោយ ផ្លោងរមៀល ជនរងគ្រោះ បោកក្បាលស្លាប់ភ្លាមៗនៅកន្លែង ហើយម៉ូតូបង្ក បន្ថែមល្បឿនបើករត់ទៅទិសខាងជើងបាត់ស្រមោល។
ក្រោយកើតហេតុ បន្ទាប់ពីស្លាប់ស្ត្រីដើរហាត់ប្រាណម្នាក់ផ្អើលពលរដ្ឋ សមត្ថកិច្ចចុះទៅពិនិត្យដល់កន្លែង ទើបរកក្រុមគ្រួសារឃើញ គឺជាពលរដ្ឋដែលស្នាក់នៅកន្លែងកើតហេតុ ហើយភាគីបង្កបានគេចខ្លួនបាត់ ។
បច្ចុប្បន្ន សពស្ត្រីរងគ្រោះ ត្រូវបានសមត្ថកិច្ច ធ្វើកំណត់ហេតុប្រគល់ជូនក្រុមគ្រួសារចាត់ចែងដឹកយកទៅធ្វើបុណ្យតាមប្រពៃណីនៅឯស្រុកកំណើត៕
Source: Kampuchea Thmey Daily
0 Comments