ភ្នំពេញ ៖ ជាងកញ្ចក់ជនជាតិចិនម្នាក់ បានភ្លាត់ស្នៀតធ្លាក់ពីលើអាគារជាន់ទី 4បណ្ដាលឲ្យស្លាប់បង្កការភ្ញាក់ផ្អើលកាលពីល្ងាចថ្ងៃទី១៩ ខែមីនា ឆ្នាំ២០១៩ នៅពីលើអាគារកំពុងសាងសង់ក្បែររ៉ារថភ្លើងក្នុងសង្កាត់ស្រះចក ខណ្ឌដូនពេញ។
សមត្ថកិច្ចបានឲ្យដឹងថា កាលពីវេលាម៉ោង១៦ និង៤០នាទីថ្ងៃខែខាងលើ មានករណី ជនជាតិចិនធ្លាក់ពីលើអគារសំណង់ជាន់ទី៤ បណ្តាលឲ្យស្លាប់ នៅចំណុចអគារសំណង់RHB ផ្លូវលេខ១០៦ កែងផ្លូវសហព័ន្ធរុស្សី ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ។
អត្តសញ្ញាណសព ឈ្មោះ ZOU ZHIMENG ភេទប្រុស អាយុ៥៨ឆ្នាំ ជនជាតិចិន មុខរបរជាងកញ្ចក់ ស្នាក់នៅផ្ទះជួលលេខ១០២អឺ៤ ផ្លូវលេខ១០៨ ភូមិ១ សង្កាត់វត្តភ្នំ ខណ្ឌដូនពេញ រាជធានីភ្នំពេញ កាន់លិខិតឆ្លងដែនលេខ EF5829677។
សមត្ថកិច្ចបានឲ្យដឹងទៀតថា ដំណើររឿងនោះ ដោយឆ្លងតាមការបំភ្លឺរបស់ ឈ្មោះ ថាន ថន ភេទប្រុស អាយុ២៥ឆ្នាំ មុខរបរកម្មករជាងកញ្ចក់ ឈ្មោះ អ៊ុល ស៊ាងហ៊ាន់ ភេទប្រុស អាយុ១៩ឆ្នាំ មុខរបរ កម្មករជាងកញ្ចក់ និងឈ្មោះ ZOU JUNPING ភេទប្រុស អាយុ៣៤ឆ្នាំ ជនជាតិចិន មុខរបរជាងកញ្ចក់(ជាកូនបង្កើតសព) បានឲ្យសមត្ថកិច្ចដឹងថា មុនពេលកើតហេតុ ថ្ងៃទី១៩ ខែមីនា ឆ្នាំ២០១៩ វេលាម៉ោង១៦និង៤០នាទី ជនរងគ្រោះឈ្មោះ ZOU ZHIMENG ភេទប្រុស អាយុ៥៨ឆ្នាំ បានឡើងចាប់កញ្ចក់នៅខាងក្រៅអគារសំណង់RHBជាន់ទី៤ ដោយជិះកន្ត្រាក់ខ្សែរ៉ត។ ពេលនោះជនរងគ្រោះបានដោះទំពក់ខ្សែក្រវាត់ចេញ ហើយឆ្លងចូលក្នុងអគារ ដើម្បីកាត់ដែក រួចក៏ឈោងយកដបទឹកផឹកនៅក្នុងកន្ត្រាក់ខ្សែរ៉ត ស្រាប់តែផុងជើងធ្លាក់ពីជាន់ទី៤មកទើរលើដំបូលបេតុងអគារកាប៊ីនភ្លើង ជាប់នឹងអគារសំណង់RHB បណ្ដាលឲ្យរងរបួសធ្ងន់ បញ្ជូនទៅសង្គ្រោះនៅមន្ទីរពេទ្យកាល់ម៉ែត ក្រោយពីគ្រូពេទ្យធ្វើការពិនិត្យរួច ប្រាប់ថាជនរងគ្រោះបានស្លាប់បាត់ហើយ។
សមត្ថកិច្ចបញ្ជាក់ថា ឆ្លងតាមការសន្និដ្ឋាន និងវាយតម្លៃតាមការពិនិត្យរបស់លោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យ អមសាលាដំបូងរាជធានីភ្នំពេញ និងការិយាល័យជំនាញបច្ចេកទេសវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ សពស្លាប់ដោយសារធ្លាក់ពីលើអគារជាន់ទី៤ របួសធ្ងន់ធ្ងរ។
បច្ចុប្បន្ន សព បានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅវត្តទឹកថ្លា សង្កាត់ទឹកថ្លាខណ្ឌសែនសុខ រាជធានីភ្នំពេញ៕
Source: Kampuchea Thmey Daily
0 Comments