ភ្នំពេញ ៖ អតីតតំណាងរាស្ត្រ និងថ្នាក់ដឹកនាំអតីតបក្សប្រឆាំង (CNRP) មួយចំនួន ដែលទើបទទួលបានសិទ្ធិធ្វើនយោបាយឡើងវិញ កាលពីថ្មីៗនេះ បានបង្ហាញពីការឈឺចាប់ចំពោះអ្វីដែលថ្នាក់ដឹកនាំរបស់ខ្លួនផ្តល់ឲ្យ ក្រោយពីការខិតខំចំណាយពេលវេលារយៈពេល២០,៣០ឆ្នាំ គឺទទួលបានពាក្យមួយមាត់ ជាជនក្បត់ជាតិ ក្បត់បក្ស ហើយការលាបពណ៌បែបនេះ វាជាការបន្តការឈឺចាប់ និងបង្កការបែកបាក់នៅក្នុងសង្គម។
ការលើកឡើងរបស់អតីតតំណាងរាស្ត្រ និងថ្នាក់ដឹកនាំអតីតបក្សប្រឆាំងនេះ បានធ្វើឡើងនៅក្នុងសន្និសីទសារព័ត៌មានមួយកាលពីព្រឹក ថ្ងៃទី២៥ ខែមីនា ឆ្នាំ២០១៩ ដែលសន្និសីទនេះ ធ្វើឡើង ដើម្បីបញ្ជាក់ពីជំហររបស់ខ្លួន ក្រោយទទួលបានសិទ្ធិធ្វើនយោបាយឡើងវិញ (នៅសណ្ឋាគារសាន់វេរ) ។
លោក អ៊ូ ចាន់រ័ត្ន អតីតតំណាងរាស្ត្រមណ្ឌលតាកែវ និងជាសមាជិកគណៈកម្មាធិការអចិន្ត្រៃយ៍នៃអតីតគណបក្សសង្គ្រោះជាតិ គឺជាមនុស្សក្នុងចំណោម៥នាក់ ដែលទើបទទួលបានសិទ្ធិធ្វើនយោបាយឡើងវិញបានថ្លែងថា ការស្នើសិទ្ធិនយោបាយវិញនេះ គឺជាគន្លឹះបន្ទន់ឥរិយាបទមួយ ដើម្បីស្វែងរកការជជែកគ្នារវាងខ្មែរ និងខ្មែរ ក្នុងការដោះលែងលោក កឹម សុខា។
ទាក់ទងដល់ការចោទប្រកាន់របស់មនុស្សមួយចំនួន ក៏ដូចជាអតីតថ្នាក់ដឹកនាំអតីតគណបក្សសង្គ្រោះជាតិ ដែលមានលោក សម រង្ស៊ី ជាដើមថា មានការទិញទឹកចិត្ត ឬលក់ដូរនោះ លោក អ៊ូ ចាន់រ័ត្ន អះអាងថា នោះគឺជាការលាបពណ៌ឲ្យគ្នា ហើយការលាបពណ៌ឲ្យគ្នានេះ អត់មានអ្វីចំណេញដល់សង្គមជាតិនោះទេ ក្រៅពីការបញ្ចូលការឈឺចាប់ទៅក្នុងសង្គម នាំឲ្យមានការបែកបាក់នៅក្នុងសង្គម “មកដល់ថ្ងៃនេះ អត់មានពាក់ព័ន្ធដល់រឿងទិញដូរអីទាំងអស់ ហើយការលាបពណ៌ទាំងអស់នេះ ខ្ញុំសុំបំភ្លឺឡើងវិញ សូមឲ្យបញ្ឈប់”។
ឆ្លើយតបសំណួរថា ហេតុអីមិនរង់ចាំដំណោះស្រាយ ដែលអតីតថ្នាក់ដឹកនាំ CNRP កំពុងស្វែងរកនៅក្រៅប្រទេស ? លោក អ៊ូ ចាន់រ័ត្ន អះអាងថា ពួកលោកអគុណចំពោះការខិតខំរបស់ថ្នាក់ដឹកនាំ CNRP មួយចំនួន ប៉ុន្តែរហូតមកដល់ពេលនេះ យើងរកគន្លឹះចេញអត់ឃើញ ដោយសារមានការប្រឈមរវាងនិន្នាការទាំងពីរ (គណបក្សកាន់អំណាច និងគណបក្សប្រឆាំង) ហើយលោកគិតថា នេះជារឿងដែលត្រូវដោះស្រាយរវាងខ្មែរគ្នាឯង។ បើសិនជាសហគមន៍អន្តរជាតិគេប្រឹងប៉ុណ្ណឹងហើយ រវាងខ្មែរគ្នាឯងមិនព្រមជជែកគ្នា មិនព្រមចរចា ដើម្បីវាសនាអនាគតប្រទេសជាតិខ្លួនឯងនោះទេ គ្មានបរទេសណា គ្មានអន្តរជាតិណា គេមកសម្រេចចិត្តជំនួសយើងនោះទេ ដូច្នេះទាល់តែយើងបោះដៃរកគ្នា បន្ទន់ឥរិយាបទរកគ្នា ទើបមានដំណោះស្រាយ។
ចំពោះការចោទប្រកាន់ថា ក្បត់បក្សជាដើម លោក អ៊ូ ចាន់រ័ត្ន បានបញ្ជាក់ថា “បើរាប់ទៅមិនជាប៉ុន្មានទេ នៅក្នុងហ្វេសប៊ុកម៉ាងៃៗ វាជាការលាបពណ៌ទាំងមេដឹកនាំ ទាំងសកម្មជន ហើយឥឡូវនេះ បង្រៀនដល់ប្រជាពលរដ្ឋខ្មែរឲ្យចង្អុលមុខគ្នាទៅវិញទៅមក ហើយចោទថាក្បត់ ខ្ញុំឃើញថា ជារឿងមួយដែលគួរឲ្យសោកស្តាយមែនទែន។ មុននឹងចោទមនុស្សម្នាក់ថា ក្បត់ជាតិ ក្បត់បក្ស ក្បត់រាស្ត្រ វាជាពាក្យធ្ងន់មែនទែន ពីអតីតកាលមក លឺអ្នកណាក្បត់ជាតិម្នាក់ៗ រឿងធំណាស់ តែឥឡូវនេះយើងយកមកលាបពណ៌ឲ្យគ្នាទៅវិញទៅមក ទៅជារឿងសាមញ្ញ រឿងអីមិនទៅជាសង្គមមួយបាក់បែក ធ្វើឲ្យយើងរកឯកភាពជាតិមិនឃើញ ដោយសារអី ដោយសារផ្នត់គំនិតយើង ការសាបព្រោះរបស់អ្នកនយោបាយធំៗ ធ្វើឲ្យមនុស្សមើលឃើញគ្នាសុទ្ធតែសត្រូវ សុទ្ធតែជនក្បត់ ក្រៅពីក្រុមអញពីរបីនាក់ហ្នឹងសុទ្ធតែក្បត់ទាំងអស់ អ្នកណាមិនដើរតាមខ្លួន អ្នកណាមិនស្របតាមមតិខ្លួនក្បត់ជាតិ ក្បត់បក្ស ក្បត់រាស្ត្រ ដូច្នេះនេះវាជាការបន្តការឈឺចាប់នៅក្នុងសង្គម ខ្ញុំឃើញចឹង”។
តាមលោក អ៊ូ ចាន់រ័ត្ន កន្លងមកអ្នកចូលរួមជាមួយគណបក្សប្រឆាំង២០, ៣០ឆ្នាំ ចំណាយទាំងថវិកា ទាំងពេលវេលា ពីក្រុមគ្រួសារ ដល់ពេលសុំសិទ្ធិធ្វើនយោបាយឡើងវិញ បានពាក្យមួយមាត់គត់ គឺក្បត់ជាតិ ក្បត់បក្ស ក្បត់រាស្ត្រ អត់អរគុណអ្វីដែលគ្នាបានខំធ្វើ២០, ៣០ឆ្នាំ ហើយគ្នាអត់ដែលបានអីទេ យើងយល់ហើយ អ្នកនៅក្នុងបក្សប្រឆាំងពិបាកណាស់ អត់ស្រួលទេ តែយើងធ្វើនេះ ដើម្បីលទ្ធិប្រជាធិបតេយ្យ។ បើយើងនៅតែបន្តអូសបន្លាយចំពោះស្ថានការនយោបាយបែបនេះឲ្យរ៉ាំរ៉ៃយូរទៅៗ វានឹងធ្វើឲ្យការបែកបាក់កាន់តែខ្លាំងទៅៗ ហើយបើយើងនៅតែបន្តយុទ្ធសាស្ត្រ ដែលមិនមែនជាការបង្រួបបង្រួមទេ ការបែកបាក់ នឹងបន្តទៅទៀត បើសិនពួកលោកមិនស្នើសុំសិទ្ធិធ្វើនយោបាយឡើងវិញនោះទេ។
ចំណែកលោកស្រី ទេព សុទ្ធី ក៏ដូចជាអ្នកផ្សេងៗទៀត ដែលទទួលបានសិទ្ធិធ្វើនយោបាយដែរនោះបានលើកឡើងថា ការស្នើសុំ ក៏ដូចជាទទួលយកនីតិសម្បទាឡើងវិញនេះ គឺជាសិទ្ធិរបស់បុគ្គលម្នាក់ៗ ដែលយើងត្រូវតែចេះប្រើសិទ្ធិរបស់ខ្លួន ហើយបញ្ជាក់ថា នឹងមិនមានការបង្កើតគណបក្សថ្មីណាមួយនោះទេ ហើយនៅតែឈរលើស្មារតីនៃបង្រួបបង្រួម CNRP ដដែល និងនៅតែប្រកាន់ជំហរបន្តជីវិតនយោបាយជាមួយ CNRP ដដែល បើទោះបីជា CNRP មិនមានរូបរាងនៅក្នុងប្រទេសកម្ពុជាក៏ដោយ។
ទាក់ទងបញ្ហានេះ លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា បានមានប្រសាសន៍កាលពីរសៀលថ្ងៃទី២៥ មីនា ថា សង្គមមួយត្រូវការរួមរស់ទាំងអស់គ្នា ទោះបីមានគំនិតខុសគ្នា ក៏អាចរស់ជាមួយគ្នាបានដែរ។ លោកបញ្ជាក់យ៉ាងនេះថា “បើខ្មែរចង់រស់ជួបជុំគ្នា អ្នកនយោបាយត្រូវតែឈប់ក្លាយជាឧបករណ៍បរទេស ហើយស្ម័គ្រចិត្តចូលក្នុងសង្គមវិញ។ EBA និង GSP មិនមែនរបស់យើងទេ ពេលណាគេត្រូវយកវិញ គឺគេយកហើយ សំខាន់ខ្មែរត្រូវស្គាល់តម្លៃអត្តសញ្ញាណជាតិរបស់ខ្លួន និងភាពក្រីក្ររបស់ប្រជាជន មិនគួរដើម្បីនយោបាយទុច្ចរិត ដើរញុះញង់បរទេសឲ្យបន្ទាបតម្លៃជាតិសាសន៍ខ្លួនទេ។ ប្រការសំខាន់របស់សង្គមខ្មែរត្រូវថែរក្សាសន្តិភាព បង្កើនគុណភាពធនធានមនុស្ស និងបង្កើនពហុទីផ្សារ លើការផលិតខុសៗគ្នា”។
សូមបញ្ជាក់ថា រហូតមកដល់ពេលនេះ អតីតតំណាងរាស្ត្រ និងអតីតថ្នាក់ដឹកនាំអតីតគណបក្សសង្គ្រោះជាតិ ចំនួន០៩នាក់ហើយ ដែលត្រូវបានព្រះមហាក្សត្រផ្តល់នីតិសម្បទាឡើងវិញ នោះ រួមមាន ទី១, លោក គង់ គាំ អតីតទីប្រឹក្សាជាន់ខ្ពស់គណបក្សសង្គ្រោះជាតិ ទី២, លោក គង់ បូរ៉ា អតីតតំណាងរាស្ត្រគណបក្សសង្គ្រោះជាតិមណ្ឌលព្រៃវែង ទី៣, លោក ស៊ីម សុវណ្ណនី ហៅ ស៊ីម សុវណ្ណនី អតីតសមាជិកគណៈកម្មាធិការនាយក របស់អតីតគណបក្សសង្គ្រោះជាតិ (CNRP) ទី៤, លោក កង គឹមហាក់ អតីតតំណាងរាស្ត្រមណ្ឌលកំពង់ចាម និងជាសមាជិកគណៈកម្មាធិការនាយកអតីតគណបក្សសង្គ្រោះជាតិ ទី៥, លោក ជីវ កត្តា អតីតតំណាងរាស្ត្រមណ្ឌលកំពង់ចាម និងជាសមាជិកគណៈកម្មាធិការនាយកអតីតគណបក្សសង្គ្រោះជាតិ ទី៦, លោក អ៊ូ ចាន់រ័ត្ន អតីតតំណាងរាស្ត្រមណ្ឌលតាកែវ និងជាសមាជិកគណៈកម្មាធិការអចិន្ត្រៃយ៍នៃអតីតគណបក្សសង្គ្រោះជាតិ ទី៧, លោក ច័ន្ទ សិលា ជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ ទី៨, លោកស្រី ទេព សុទ្ធី អតីតតំណាងរាស្ត្រមណ្ឌលតាកែវ និងជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ និងទី៩, លោក រៀល ខេមរិន្ទ្រ អតីតតំណាងរាស្ត្រអតីតគណបក្សសង្គ្រោះជាតិមណ្ឌលស្វាយរៀង និងជាសមាជិកគណៈកម្មាធិការនាយកនៃអតីតគណបក្សសង្គ្រោះជាតិ។
ទន្ទឹមនឹងការស្នើសុំ ក៏ដូចជាការទទួលយកសិទ្ធិធ្វើនយោបាយឡើងវិញនេះ ពួកគេទទួលបានការឆ្លើយតបពីមេដឹកនាំ ក៏ដូចជាសកម្មជនផ្កាប់មុខមួយចំនួនមកវិញថា ជាជនក្បត់ជាតិ ក្បត់បក្ស ក្បត់រាស្ត្រ ហើយអ្វីដែលពួកគាត់បានខិតខំរយៈពេល២០, ៣០ឆ្នាំ ក្លាយទៅជាឥតន័យបន្តិចសោះ៕
Source: Kampuchea Thmey Daily
0 Comments