លាភ រដ្ឋា អ្នកប្រដាល់ក្លិបដីឡូតិ៍មានរិទ្ធខេត្តបន្ទាយមានជ័យ និង អ្នកប្រដាល់ថៃ ឌឿក គែន(Deuk Ken) ពួកគេទាំងពីរ នឹងត្រូវឡើងទៅជួបគ្នានៅក្នុងវគ្គផ្ដាច់ព្រ័ត្រ បន្ទាប់ពីពួកគេបានឈ្នះលើគូប្រកួត ក្នុងការប្រកួតជុំចុងក្រោយ ក្នុងជម្រុះខ្សែក្រវាត់ខារ៉ាបាវ ទម្ងន់៥៧គីឡូក្រាម លើសង្វៀនSEATV កាលពីថ្ងៃទី០៩ ខែមីនា ឆ្នាំ២០១៩ នោះ។
លាភ រដ្ឋា គេបានវាយឈ្នះអ្នកប្រដាល់ថៃ យ៉ត វ៉ាន់ឌី (Yorth Vandy) ក្នុងទឹកទី៥ ដែលនេះជាសំណាងល្អរបស់ លាភ រដ្ឋា ព្រោះបើគេមិនអាចផ្ដួល យ៉ត វ៉ាន់ឌី មុនបញ្ចប់ទឹក៥បាននោះទេ នោះគេនឹងត្រូវចាញ់ប្រៀប វ៉ាន់ វឿន អ្នកប្រដាល់ក្លិបឃ្លាំងមឿងកីឡា ដោយសារ វ៉ាន់ វឿន គេក៏ឈ្នះ៤ប្រកួតដូចគ្នាដែរ គ្រាន់តែចាញ់ឈ្នះរឿងផ្ដួលគូប្រកួតក្នុងទឹកប៉ុណ្ណោះ។
អ្នកប្រដាល់ថៃ យ៉ត វ៉ាន់ឌី ដែលវាយចាញ់៣ប្រកួតទៅហើយនោះ ក្នុងការប្រកួតជាមួយ លាភ រដ្ឋា បែរជាវាយល្អ និងចង់ឈ្នះលើ លាភ រដ្ឋា ថែមទៀត។ តែជាអកុសល ក្នុងទឹកទី៥ ត្រូវ លាភ រដ្ឋា ទាត់ខូចជើងឆ្វេង ធ្វើឲ្យអ្នកប្រដាល់ថៃរូបនេះ បោះបង់ចោលការប្រកួត ជាហេតុនាំឲ្យ លាភ រដ្ឋា បានឡើងទៅផ្ដាច់ព្រ័ត្រ។
ចំណែក អ្នកប្រដាល់ថៃឌឿក គែន(Deuk Ken) គេក៏ត្រូវបានឡើងទៅផ្ដាច់ព្រ័ត្រដែរ ដោយជួបជាមួយលាភ រដ្ឋា បន្ទាប់ពីគេបានឈ្នះដៃគូ គឺអ្នកប្រដាល់កម្ពុជា តាញ់ មករា សមាគមកីឡាប្រដាល់ក្រសួងការពារជាតិ ដោយស្វ័យប្រវត្តិនោះ។ តាញ់ មករា គេចាញ់ដោយសារតែរក្សាទម្ងន់មិនបាន មិនត្រូវបានអនុញ្ញាតឲ្យធ្វើការប្រកួត។
ក្នុងចំណោមអ្នកប្រដាល់៤រូប ដែលចូលរួមប្រកួតដណ្ដើមខ្សែក្រវាត់ខារ៉ាបាវនេះ គឺមានតែ ឌឿក គែន ម្នាក់គត់ ដែលបានឈ្នះ១ប្រកួត ទោះបីជាការឈ្នះដោយស្វ័យប្រវត្តិក្តី។ ថៃ៣នាក់ផ្សេងទៀត សុទ្ធតែប្រកួតចាញ់អ្នកប្រដាល់ខ្មែរទាំងអស់ គ្មានម្នាក់ ណាបានឈ្នះនោះទេ។ ដូច្នេះហើយ ទើបជាសំណាងរបស់ឌឿក គែន ដែលបានឈ្នះលើ តាញ់ មករា ដោយស្វ័យប្រវត្តិនោះ។
សូមបញ្ជាក់ថា រូបមន្តប្រកួតដណ្ដើមខ្សែក្រវាត់ខារ៉ាបាវ នៅSEATVនេះ គឺពុំមានវគ្គពាក់កណ្ដាលផ្ដាច់ព្រ័ត្រនោះឡើយ។ ពោលគឺគេតម្រូវជ្រើសរើសយកតែអ្នកលេខ១ ក្នុងពូលខ្មែរម្នាក់ និងលេខ១ក្នុងពូលថៃម្នាក់ប៉ុណ្ណោះ សម្រាប់ឡើងទៅប្រកួតផ្ដាច់ព្រ័ត្រ។
ដូច្នេះលាភ រដ្ឋា និង ឌឿក គែន ពួកគេទាំងពីរ នឹងត្រូវជួបប្រកួតគ្នានៅវគ្គផ្ដាច់ព្រ័ត្រ ដើម្បីប្រជែងគ្នាយកចំណាត់ថ្នាក់ជើងឯកម្ចាស់ខ្សែក្រវាត់ខារ៉ាបាវ ទម្ងន់៥៧គីឡូក្រាម នាពេលខាងមុខ។
គួរបញ្ជាក់ឲ្យដឹងផងដែរថា អ្នកប្រដាល់ថៃ ឌឿក គែន ទោះបីជាមិនបានប្រកួតជាមួយ តាញ់ មករា ក្នុងព្រឹត្តិការណ៍ខ្សែក្រវាត់ក៏ដោយ ក៏នៅតែត្រូវគេតម្រូវឲ្យធ្វើការប្រកួតជាមួយ លីន វិរៈ អ្នកប្រដាល់ក្លិបបូរីរាជសីហ៍មានរិទ្ធ ដែរ។ ឯ លទ្ធផលនោះ គឺឌឿក គែនវាយចាញ់ លីន វិរៈ ក្នុងទឹកទី២ ដោយត្រូវ វិរៈ វាយឲ្យសន្លប់ដោយកែងនោះ។
ចំណែកគូប្រកួតក្រៅព្រឹត្តិការណ៍ខ្សែក្រវាត់វិញ ធា នុរាជ អ្នកប្រដាល់ក្លិបមកុដរាជសីហ៍ បានផ្ដួល ទី ពន្លែត អ្នកប្រដាល់ក្លិបអង្គរមានជ័យខេត្តសៀមរាបក្នុងទឹកទី២ ដោយការទាត់បកក្រោយ(នាគវ័ធកន្ទុយ)ចាំគុម្ពថ្គាម ពន្លែត បណ្ដាលឲ្យ ពន្លែត ដួលសន្លប់ លែងក្រោយ។ រឿន សុខលី អ្នកប្រដាល់ក្លិបការិយាល័យទី៥ កងទ័ពជើងគោក បានវាយឈ្នះ ប្រាក់ ឌីណា ក្លិបតាឯកដំបងដែកមានរិទ្ធដោយពិន្ទុ។
•ធឿន ធី ធ្លាក់ជាស្ថាពរ ក្រោយចាញ់ Chhav Vallit ឯ លន បញ្ញា ឡើងទៅផ្ដាច់ព្រ័ត្រក្រោយឈ្នះYorth Katangyou ក្នុងជម្រុះជុំចុងក្រោយ
ក្រោយពីបញ្ចប់ការប្រកួតជម្រុះជុំចុងក្រោយ នៃព្រឹត្តិការណ៍ដណ្ដើមខ្សែក្រវាត់ជើងឯកWurkz ទម្ងន់៦០គីឡូក្រាម នៅសង្វៀនទូរទស្សន៍SEATV កាលពីរសៀលថ្ងៃអាទិត្យ ទី១០ ខែមីនា ឆ្នាំ២០១៩ អ្នកប្រដាល់កម្ពុជា ធឿន ធី ក្លិបអង្គរមានជ័យខេត្តសៀមរាប ត្រូវបានធ្លាក់ជាស្ថាពរ បន្ទាប់ពីវាយចាញ់អ្នកប្រដាល់ថៃ Chhav Vallit ក្នុងទឹកទី៣នោះ។
ចំណែក អ្នកប្រដាល់កម្ពុជា លន បញ្ញា សមាគមកីឡាប្រដាល់ក្រសួងការពារជាតិវិញ គេត្រូវបានឡើងទៅប្រកួតផ្ដាច់ព្រ័ត្រ ក្រោយពីរូបគេបានវាយឈ្នះអ្នកប្រដាល់ថៃYorth Katangyou ដោយពិន្ទុដាច់នោះ។
ទោះបីការប្រកួតជម្រុះខ្សែក្រវាត់ជើងឯកWurkz ទម្ងន់៦០គីឡូក្រាមនេះ នៅសល់មួយសប្ដាហ៍ទៀតក្តី ក៏ពូលកីឡាករខ្មែររកឃើញអ្នកលេខ១ ក្នុងពូលរួចទៅហើយដែរ គឺលន បញ្ញា ហ្នឹងឯង ដែលឡើងទៅនោះ ព្រោះ៤ប្រកួត គេឈ្នះ៣ ចាញ់១ ដែលអ្នកប្រដាល់២រូបបូកទាំង ធឿន ធី ទៀត ពុំអាចរកពិន្ទុស្មើគេបានឡើយ។ តែសម្រាប់ពូលកីឡាករថៃ នៅមិន ទាន់ដឹងថា នរណាបានឡើងនោះទេ ព្រោះនៅប្រទាញប្រទង់គ្នា រវាង Chhai Yo និង Supper Man។
ដោយឡែក ការប្រកួតក្រៅពីគូខ្សែក្រវាត់នេះ ឡុង ពិសិដ្ឋ អ្នកប្រដាល់ក្លិបខ្លារខិនមានរិទ្ធ បានប្រកួតចាញ់ ព្រឿង សុចើត អ្នកប្រដាល់ស្រករក្រោយនៃក្លិបមជ្ឈមណ្ឌលកីឡា ខ.ភ.ម ដោយពិន្ទុ។ អេ រាជសីហ៍ អ្នកប្រដាល់ក្លិបអេភូថងកីឡា ឈ្នះ ឡុង និមិត្តអ្នកប្រដាល់ក្លិបសាលវ័ន្តកីឡាក្នុងទឹកទី៤។
•ម៉ឺន មេឃា ផ្ដួលអ្នកប្រដាល់ថៃចេន សឹក ក្នុងទឹកទី២
អ្នកប្រដាល់ជើងខ្លាំងកម្ពុជាវ័យក្មេង ម៉ឺន មេឃា ក្លិបអេភូថងកីឡា ដែលគេផ្គូឲ្យជួបប្រកួតជាមួយអ្នកប្រដាល់ថៃចំណូលថ្មី ចេន សឹក (Chen Sak) នៅក្នុងកម្មវិធីប្រដាល់ Boostrong Fighter On Fire លើសង្វៀនSEATV ថ្ងៃទី១០ ខែមីនា ឆ្នាំ២០១៩នោះ បានទទួលជ័យជម្នះក្នុងទឹកទី២។
ម៉ឺន មេឃា បានប្រើកណ្ដាប់ដៃ ដាល់ ចេន សឹក ឲ្យសន្លប់លើរេញ។ ចេន សឹក គេមិនធ្លាប់មកប្រកួតនៅស្រុកខ្មែរម្តងណានៅឡើយទេកន្លងមក។ អ្នកប្រដាល់ថៃរូបនេះ ត្រូវម៉ឺន មេឃា សន្ធាប់ដាល់រហូតដល់ត្រូវដួលសន្លប់លែងក្រោកតែម្តង។ ចេន សឹក នេះ មានកម្ពស់ប្រហាក់ប្រហែល ម៉ឺន មេឃា គឺ១,៧១ម៉ែត្រ ខណៈដែល មាឃា១,៧០ម៉ែត្រ ហើយកំណត់ត្រាប្រកួតក៏ច្រើនជាង មេឃា គឺ៥៧លើក ឈ្នះ៤៥លើក ចាញ់១២លើក មិនដែលស្មើ។
ជ័យ ស៊ីនេត អ្នកប្រដាល់ក្លិបឃ្លាំងមឿងកីឡា ប្រកួតចាញ់ ឃឹម ពេជ្រចិន្តា អ្នកប្រដាល់ក្លិបកុលបុត្រគុនខ្មែរខណ្ឌទួលគោក ដោយពិន្ទុ។ ឯ សំខាន់ ប៉ាវចិន អ្នកប្រដាល់ក្លិបរ៉ាហាប់ស្វាយប៉ាក ក៏ប្រកួតចាញ់ ធឹម ទាន់ អ្នកប្រដាល់ក្លិបរាជសីហ៍ខេត្តរតនគិរី ក្នុងទឹកទី១ដែរ។ ហើយ អេលីត សុវណ្ណម៉ាយ អ្នកប្រដាល់ក្លិបឆ្មាសសែនសុខគុនខ្មែរ វាយចាញ់ សល់ ស្រស់ អ្នកប្រដាល់ក្លិបសាលវ័ន្តកីឡា ដោយដោយពិន្ទុ៕
Source: Kampuchea Thmey Daily
0 Comments