សៀមរាប ៖ លោកវរសេនីយ៍ឯក ទេព ពុំសែន អធិការនគរបាលស្រុកពួកបានឲ្យដឹងថា នៅវេលាម៉ោង០១និង១៥នាទីរសៀល ថ្ងៃទី១០ ខែមីនា ឆ្នាំ២០១៩នេះ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តបុកម៉ូតូ លើផ្លូវជាតិលេខ៦ ត្រង់ចំណុចភ្លើងស្តុប មុខផ្សារពួក ក្បែររូបសំណាកយាយកាន់កណ្ដៀវ ស្ថិតក្នុងភូមិអូរតាប្រាក់ ឃុំពួក ស្រុកពួក បណ្ដាលឲ្យមនុស្សម្នាក់ បានស្លាប់ភ្លាមៗនៅកន្លែងកើតហេតុ។
លោកអធិការរូបនេះបានឲ្យដឹងទៀតថា ហេតុការណ៍នេះ គឺរថយន្តម៉ាក Isuzu ពណ៌ស ពាក់ស្លាកលេខ សៀមរាប 3A - 1758 បើកបរដោយជនមិនស្គាល់អត្តសញ្ញាណ ព្រោះក្រោយពេលកើតហេតុបានរត់គេចខ្លួន បើកបរក្នុងទិសដៅពីកើតទៅលិច ហើយចំណុចភ្លើងស្តុប បានបត់ស្ដាំខ្វះការប្រុងប្រយ័ត្ន បានបុកម៉ូតូម៉ាកហុងដាឌ្រីម ផលិតឆ្នាំ2007 ពណ៌ ខ្មៅ ពាក់ស្លាកលេខ សៀមរាប 1A-9427 បើកបរដោយ ឈ្មោះ សាន់ សាមឿយ ភេទស្រី អាយុ៣២ឆ្នាំ ស្លាប់នៅកន្លែងកើតហេតុ រស់នៅភូមិគោកថ្មី ឃុំពួក ស្រុកពួក បើកបរក្នុងទិសដៅពីកើតទៅលិច ហើយបត់ស្តាំស្របគ្នាជាមួយនឹងរថយន្ត។
ក្រោយពេលកើតហេតុកម្លាំងនគរបាលជំនាញបានចុះវាស់វែងកន្លែងកើតហេតុ ដើម្បីកសាងសំណុំរឿង និងដកហូតវត្ថុតាងពាក់ព័ន្ធមានរថយន្ត និង ម៉ូតូ ដែលខូចខាតស្រាលដូចគ្នា យកមករក្សាទុកនៅអធិការដ្ឋាននគរបាលស្រុក រីឯសាកសពជនរងគ្រោះ ត្រូវបានប្រគល់ជូនក្រុមគ្រួសារ ដើម្បីធ្វើបុណ្យតាមប្រពៃណី៕
Source: Kampuchea Thmey Daily
0 Comments