មន្ត្រីតុលាការព្រហ្មទណ្ឌអន្តរជាតិ (ICC) បាននិយាយកាលពីថ្ងៃចន្ទថា មនុស្សដែលទទួលខុសត្រូវចំពោះអំពើឃោរឃៅដែលបានបង្ខំឲ្យប្រជាជនមូស្លីមរូហ៊ីងយ៉ារាប់ពាន់នាក់ភៀសខ្លួនចេញពីរដ្ឋរ៉ាក់ឃីនរបស់ប្រទេសមីយ៉ាន់ម៉ាគឺនឹងត្រូវឃុំខ្លួន។
បន្ទាប់ពីដំណើរទស្សនកិច្ចមួយទៅជំរំជនភៀសខ្លួនបង់ក្លាដែស, លោក Phakiso Mochochoko នៃ ICC បាននិយាយថាការពិតដែលថាប្រទេសមីយ៉ាន់ម៉ាមិនមែនជាហត្ថលេខីនៃតុលាការអន្ដរជាតិដែលមានមូលដ្ឋាននៅទីក្រុងឡាអេនោះគឺនឹងមិនមានឧបសគ្គអ្វីដល់ការស៊ើបអង្កេតទេ។
នាយកតុលាការរូបនេះបានប្រាប់អ្នកយកព័ត៌មានក្នុងរដ្ឋធានីដាកាថា “វាអាចបង្ហាញពីបញ្ហាប្រឈមបន្តិចបន្តួចសម្រាប់យើងក្នុងការស៊ើបអង្កេតប៉ុន្តែយើងបានប្រឈមមុខនឹងស្ថានការណ៍បែបនេះរួចទៅហើយកាលពីអតីតកាលហើយយើងអាចដោះស្រាយវាបាន”។
លោក Mochochoko បានធ្វើអត្ថាធិប្បាយបែបនេះបន្ទាប់ពីបានដឹកនាំគណៈប្រតិភូទៅកាន់ស្រុក Cox's Bazar ភាគអាគ្នេយ៍របស់ប្រទេសបង់ក្លាដែសដែលជាជំរំផ្ទុកជនភៀសខ្លួនរ៉ូហ៊ីងយ៉ាប្រហែលមួយលាននាក់។
ទោះបីជាយ៉ាងណាក៏ដោយ គណៈប្រតិភូបានបញ្ជាក់ថា ដំណើរទស្សនកិច្ចរបស់ខ្លួនទៅកាន់ជំរំនេះមិនមែនជាផ្នែកមួយនៃការស៊ើបអង្កេតណាមួយនោះទេប៉ុន្តែដើម្បីស្វែងរកនូវការយល់ដឹងអំពីការវាយតម្លៃជាបន្តបន្ទាប់ពីការិយាល័យរបស់រដ្ឋអាជ្ញា Fatou Bensouda ថាតើត្រូវធានាឲ្យមានការស៊ើបអង្កេតពេញលេញមួយឬក៏យ៉ាងណា។
ជនជាតិរ៉ូហ៊ីងយ៉ាប្រហែល៧៤០,០០០នាក់បានភៀសខ្លួនចេញពីរដ្ឋរ៉ាក់ឃីនទៅកាន់ប្រទេសបង់ក្លាដែសចាប់តាំងពីខែសីហាឆ្នាំ២០១៧មកបន្ទាប់ពីការបង្ក្រាបដ៏ឃោរឃៅដោយយោធាដែលត្រូវបានមន្ត្រី UN ពណ៌នាថាជា “ការបោសសម្អាតជនជាតិភាគតិច”។ មនុស្សរាប់ពាន់នាក់ទៀតបានមកដល់នៅប៉ុន្មានឆ្នាំមុនៗបន្ទាប់ពីមានអំពើហិង្សាប្រឆាំងជនជាតិរ៉ូហ៊ីងយ៉ា។
លោក Mochochoko បាននិយាយថា ការស៊ើបអង្កេតបឋមនេះនឹងផ្តោតទៅលើការទទួលខុសត្រូវរបស់បុគ្គល។ លោកលើកឡើងថា “វាផ្តោតលើអ្នកដែលទទួលខុសត្រូវ អ្នកដែលបង្រៀន អ្នកដែលបញ្ជា អ្នកដែលធ្វើអ្វីផ្សេងទៀតនិងអ្នកដែលជួយសម្រួលដល់ការប្រព្រឹត្តបទឧក្រិដ្ឋ”។
គួរបញ្ជាក់ថា ដំណើរទស្សនកិច្ចនេះបានធ្វើឡើងបន្ទាប់ពីចៅក្រមកាលពីឆ្នាំមុនបានសម្រេចថា បើទោះបីជាប្រទេសមីយ៉ាន់ម៉ាមិនបានចុះហត្ថលេខាលើ ICC ដែលមានមូលដ្ឋាននៅទីក្រុងឡាអេក៏ដោយក៏តុលាការនៅតែមានយុត្តាធិការលើឧក្រិដ្ឋកម្មប្រឆាំងនឹងជនជាតិរ៉ូហ៊ីងយ៉ាព្រោះប្រទេសបង់ក្លាដែសគឺជាសមាជិក៕ AFP
Source: Kampuchea Thmey Daily
0 Comments