កំពង់ស្ពឺ ៖ រឿងអាស្រូវរបស់លោកអធិការរង នគរបាលស្រុកសំរោងទង ត្រូវបានបែកធ្លាយបញ្ច្រាសខ្យល់ថា បាននៅពីក្រោយខ្នងល្បែងស៊ីសងដ៏ធំ (មេកន្ទុយលេខវៀតណាម) ដោយប្រើគ្រប់មធ្យោបាយដើម្បីឱ្យកូនកញ្ច្រែងដាក់លេខឆ្នោតឱ្យខ្លួន។
តាមពិតមេឆ្នោតវៀតណាមដ៏ធំម្នាក់នោះ ជាមន្ត្រីនគរបាលពាក់ស័ក្ដិថ្នាក់វរសេនីយ៍ និងមានតួនាទីជាអធិការរង ប៉ុន្តែបែរជារកស៊ីល្មើសច្បាប់ (ល្បែងស៊ីសង) ទទួលស៊ីលេខឆ្នោតវៀតណាមបែបនេះ ដែលប្រាសចាកពីតួនាទី ភារកិច្ចរបស់ខ្លួនជាមន្ត្រីអ្នកអនុវត្តន៍ច្បាប់ ព្រមទាំងផ្ទុយពីបទបញ្ជាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ឱ្យគ្រប់កម្លាំងនគរបាលរាជធានី ខេត្ត អធិការនគរបាលក្រុង ស្រុកត្រូវលុបបំបាត់ល្បែងស៊ីសងគ្រប់ប្រភេទក្នុងទឹកដីដែលខ្លួនកំពុងគ្រប់គ្រងតែម្តង។
លោកអធិការរង នគរបាលស្រុកសំរោងទង ដែលកំពុងធ្លាយរឿងអាស្រូវបញ្ច្រាសខ្យល់ពាក់ព័ន្ធល្បែងស៊ីសងកន្ទុយលេខវៀតណាមនោះ ត្រូវបានប្រភពបង្ហើបប្រាប់ឱ្យដឹងថា មានឈ្មោះ ហង្ស សំរេច ឋានន្តរស័ក្តិថ្នាក់វរសេនីយ៍ទទួលបន្ទុកអន្តោប្រវេសន៍ ត្រូវជាប្អូនថ្លៃលោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ។
ពាក់ព័ន្ធមន្ត្រីនគរបាលម្នាក់ ដែលរងការចោទប្រកាន់ថានៅពីក្រោយខ្នងល្បែងស៊ីសង (ឆ្នោតវៀតណាម) ជាអធិការរង ស្រុកសំរោងទង និងជាប្អូនថ្លៃផងនោះ លោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានឆ្លើយវិញថា «លោកមិនគាំទ្រ អំពើល្មើសច្បាប់ នៅក្នុងដែនដីលោកទេ បើលោកស៊ើបដឹង លោកនឹងចាត់វិធានការណ៍ តាមផ្លូវច្បាប់ បើទោះជា បុគ្គលនោះ ជាប់សាច់ឈាមលោកក៏ដោយ......»។
សេចក្តីរាយការណ៍ពីមហាជន បានលើកឡើងថា មេឆ្នោតវៀតណាមដ៏ធំប្រចាំស្រុកសំរោង សព្វថ្ងៃនេះមានតួនាទីជាប៉ូលិសថ្នាក់អធិការរង ប៉ុន្តែមិនដឹងមានខ្សែខាងណាទេ បានប្រើប្រាស់គ្រប់រូបភាព និងមធ្យោបាយដើម្បីប្រមូលកូនកញ្ច្រែង (អ្នកទទួលកត់ឆ្នោត) ដាក់លេខឱ្យខ្លួនដើម្បីស៊ីសង បើមិនដាក់ឱ្យទេនោះពិតជាមានបញ្ហាមិនខាន។
នាយនគរបាលជាន់ខ្ពស់ ដែលទទួលរង ការរិះគន់ពីសំណាក់ប្រជាពលរដ្ឋ ពាក់ព័ន្ធករណីល្បែងស៊ីសង គឺលោកវរសេនីយ៍ ហង្ស សំរេច បានប្រើប្អូនរបស់ខ្លួនឈ្មោះ ហៀងជាអ្នកចាត់ចែងការងារលុយកាក់ និងបញ្ជីស្នាមផ្សេងៗ។
ក្រៅតែពីលោក ហង្ស សំរេច អធិការរង នគរបាលស្រុកសំរោង ជាមេឆ្នោតវៀតណាមនោះ នៅមេឆ្នោតផ្សេងៗទៀតក៏រកស៊ីដូចនេះ ប៉ុន្តែការបង្ក្រាបមិនចេះនោះទេ ព្រោះមានមន្ត្រីខិលខូចខ្លះជួយបិទបាំងដើម្បីលាភសក្ការៈផ្ទាល់ខ្លួនផ្ទុយពីបទបញ្ជាថ្នាក់លើ។
ជុំវិញការរិះគន់ខាងលើពាក់ព័ន្ធនឹងមន្ត្រីនគរបាលឈ្មោះ ហង្ស សំរេច នៅពីក្រោយល្បែងកន្ទុយលេខវៀតណាម លោកស្នងការនគរបាលខេត្តកំពង់ស្ពឺ លោកឧត្តមសេនីយ៍ទោ សម សាមួន បានបកស្រាយថា «បើសរសេរសូមត្រឹមបុគ្គលអ្នកប្រព្រឹត្តបានហើយ! ខ្ញុំទទួលស្គាល់បុគ្គលនោះជាប្អូនថ្លៃខ្ញុំមែន ប៉ុន្តែទាក់ទិននឹងមុខរបរខុសច្បាប់ខ្ញុំមិនមានការពាក់ព័ន្ធទេ។ ដូចនេះអ្នកមើលអាចនឹងយល់ច្រឡំ។ ខ្ញុំនឹងចំណាត់ការស្រាវជ្រាវ និងសូមសំណូមពរសមត្ថកិច្ចនានាជួយចំណាត់ការរឿងនេះ»។
លោកស្នងការបញ្ជាក់ថា «បុគ្គលរូបនេះ ត្រូវតែទទួលទោស ប្រសិនបើរកឃើញថាបាននៅពីក្រោយល្បែងរបៀបនេះពិតមែន»។
ពាក់ព័ន្ធរឿងអាស្រូវរបស់លោកវរសេនីយ៍ ហង្ស សំរេច អធិការរងនគរបាលស្រុកសំរោងទង កាងល្បែងកន្ទុយលេខនេះ ស្នងការដ្ឋាន នគរបាលខេត្តកំពង់ស្ពឺ បានចេញសេចក្តីបំភ្លឺភ្លាមៗថា «ស្នងការដ្ឋាន នគរបាលខេត្តកំពង់ស្ពឺ សូមធ្វើការប្រកាស យ៉ាងដាច់អហង្ការ ចំពោះបុគ្គលណាដែលបានយកតួនាទីនិងកំពុងប្រព្រឹត្តខ្លួនជាប់ពាក់ព័ន្ធទៅនឹងបទល្មើស ឬស្ថិតនៅពីក្រោយខ្នងនៃបទល្មើស សូមធ្វើការដកខ្លួនជាបន្ទាន់ និងបញ្ឈប់សកម្មភាពទាំងឡាយណាដែលផ្ទុយនឹងច្បាប់រដ្ឋ មិនត្រូវយកឈ្មោះថ្នាក់ដឹកនាំស្នងការ ទៅប្រើប្រាស់ជាដាច់ខាត»។
ក្នុងនាមស្នងការដ្ឋាននគរបាលខេត្ត សូមធ្វើការអំពាវនាវលើកទឹកចិត្តដល់គ្រប់ស្ថាប័នមានសមត្ថកិច្ចអ្នកអនុវត្ដច្បាប់ទាំងអស់ មេត្តាជួយសហការ និងបង្ក្រាបករណីមានជន ឬបុគ្គលណាដែលអះអាងថា ជាបងប្អូនខ្សែស្រឡាយថ្នាក់ដឹកនាំនៅស្នងការដ្ឋាននគរបាលខេត្ដ ត្រូវតែអនុវត្តច្បាប់មុនគេ និងត្រូវបញ្ជូនខ្លួនជននោះទៅតុលាការដើម្បីធ្វើការផ្ដន្ទាទោសតាមច្បាប់ជាធរមាន៕
Source: Kampuchea Thmey Daily
0 Comments