ភ្នាក់ងារប្រឆាំងគ្រឿងញៀនរបស់អង្គការសហប្រជាជាតិបាននិយាយកាលពីថ្ងៃចន្ទថា ផលិតកម្មមេតំហ្វេតាមីនកំពុងតែកើនឡើងយ៉ាងឆាប់រហ័សនៅតំបន់អាស៊ីអាគ្នេយ៍ខណៈតម្លៃបានធ្លាក់ចុះហើយការប្រើប្រាស់កំពុងរីករាលដាល។
របាយការណ៍មួយដែលត្រូវបានចេញផ្សាយដោយការិយាល័យអង្គការសហប្រជាជាតិស្តីពីគ្រឿងញៀននិងឧក្រិដ្ឋកម្ម (UNODC) បាននិយាយថា ថ្វីបើការរឹបអូសថ្នាំញៀនដែលគេស្គាល់ថាទឹកកកនិងយ៉ាម៉ានៅក្នុងទម្រង់ផ្សេងៗបានឈានដល់កម្រិតខ្ពស់កាលពីឆ្នាំមុនក៏ដោយក៏តម្លៃតាមដងផ្លូវនៅតែធ្លាក់ចុះ។
ទីភ្នាក់ងារនេះបានឲ្យដឹងថា មេតំហ្វេតាមីនបានក្លាយជាក្តីបារម្ភអំពីគ្រឿងញៀនដ៏ធំសម្រាប់ប្រទេសចំនួន១២ក្នុងចំណោម១៣ប្រទេសនៅតំបន់អាស៊ីបូព៌ានិងអាស៊ីអាគ្នេយ៍ពោលគឺកើនឡើងពី៥ទសវត្សរ៍មុន។ ករណីលើកលែងតែមួយគត់គឺនៅប្រទេសវៀតណាមដែលជាកន្លែងហេរ៉ូអ៊ីនត្រូវបានគេចាត់ទុកថាជាបញ្ហាចម្បង។
ទីភ្នាក់ងាររបស់ UN បាននិយាយថា គ្រាន់តែនៅក្នុងប្រទេសថៃ មេតំហ្វេតាមីនចំនួន៥១៥លានគ្រាប់ត្រូវបានរឹបអូសនៅក្នុងឆ្នាំ២០១៨ពោលគឺស្មើនឹង១៧ដងនៃបរិមាណគ្រឿងញៀនសរុបដែលត្រូវរឹបអូសបានកាលពីមួយទសវត្សរ៍មុននៅក្នុងប្រទេសចំនួន១៣រួមបញ្ចូលគ្នា។ ការផ្គត់ផ្គង់ភាគច្រើនគឺមកពីប្រទេសមីយ៉ាន់ម៉ាដែលស្ថិតនៅជិតខាង។
លោក Tun Nay Soe អ្នកសម្របសម្រួលកម្មវិធីអន្តរតំបន់របស់ទីភ្នាក់ងារនេះបាននិយាយថា “ទិន្នន័យស្តីពីការរឹបអូស តម្លៃ ការប្រើប្រាស់និងសកម្មភាពបានចង្អុលបង្ហាញអំពីការពង្រីកជាបន្តនៃទីផ្សារមេតំហ្វេតាមីននៅតំបន់អាស៊ីបូព៌ានិងអាស៊ីអាគ្នេយ៍”។
ស្របពេលជាមួយគ្នានេះដែរ របាយការណ៍នេះបានព្រមានថា ក្រុមឧក្រិដ្ឋកម្មដែលមានការរៀបចំនៅក្នុងតំបន់បានបង្កើនការចូលរួមរបស់ពួកគេក្នុងការផលិតនិងការជួញដូរមេតំហ្វេតាមីននិងថ្នាំដទៃទៀតនៅក្នុងតំបន់ត្រីកោណមាសដែលជាតំបន់ព្រំដែនរវាងប្រទេសមីយ៉ាន់ម៉ា ឡាវនិងថៃដែលធ្លាប់ជាប្រភពដ៏សំខាន់នៃអាភៀននិងហេរ៉ូអ៊ីន។
ភ្នាក់ងារគ្រឿងញៀននេះបានព្រមានថា ឱសថសំយោគផ្សេងទៀតក៏កំពុងទទួលបានការអូសទាញនៅក្នុងទីផ្សារអាស៊ីផងដែរ។
លោក Jeremy Douglas តំណាងប្រចាំតំបន់សម្រាប់តំបន់អាស៊ីអាគ្នេយ៍និងប៉ាស៊ីហ្វិករបស់អង្គការ UNODC បាននិយាយថា ក្រៅពីមេតំហ្វេតាមីនដែលកំពុងទទួលបានការយកចិត្តទុកដាក់បំផុតដោយសារតែការកើនឡើងនៃការរឹបអូសនិងការធ្លាក់ថ្លៃតាមចិញ្ចើមផ្លូវនោះ ឱសថសំយោគនិងថ្នាំដទៃទៀតក៏ត្រូវបានគេរកឃើញផងដែរនៅទូទាំងតំបន់៕ AP
Source: Kampuchea Thmey Daily
0 Comments