រកឃើញរថយន្តRANGE ROVER ដែលបុកនិស្សិតស្រីនៅខណ្ឌទួលគោកហើយ

Cambodia News March 27, 2019

ភ្នំពេញ ៖ យោងតាមប្រភពពីលោកអនុសេនីយ៍ឯក ឯម ភារី នាយនគរបាលប៉ុស្តិ៍ស្ទឹងមានជ័យទី៣បានឲ្យដឹងថា រថយន្តម៉ាកRANGE ROVERពណ៌ខ្មៅពាក់ស្លាកលេខភ្នំពេញ2AF 77 77 ដែលបានបើកបុកនិស្សិតស្រីម្នាក់នៅខណ្ឌទួលគោកបណ្ដាលឲ្យស្លាប់កាលពីរសៀលថ្ងៃទី២៦ ខែមីនាមកនោះ ឥឡូវរកឃើញហើយ។

លោកនាយប៉ុស្តិ៍បានបន្តថា រថយន្តខាងលើនេះ ត្រូវបានកម្លាំងនគរបាលប៉ុស្តិ៍ស្ទឹងមានជ័យទី៣ប្រទះឃើញនៅតាមបណ្តោយផ្លូវ៣៧១ មុខយានដ្ឋានជួសជុលរថយន្តយីហោឯក វុទ្ធី ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ខណៈដែលមានមនុស្សប្រុងយករថយន្តស្ទូចមកស្ទូចដឹកចេញពីមុខយានដ្ឋានខាងលើ។ ការរកឃើញនេះគឺនៅវេលាម៉ោង០០និង២៥នាទីរំលងអធ្រាត្រឈានចូលថ្ងៃទី២៧ខែមីនា។

លោកនាយនគរបាលប៉ុស្តិ៍ស្ទឹងមានជ័យទី៣ បានបន្តថា បន្ទាប់ពីមានហេតុការណ៍គ្រោះថ្នាក់ចរាចរណ៍បង្កឲ្យមានមនុស្សស្លាប់នៅខណ្ឌទួលគោក កាលពីរសៀលថ្ងៃទី២៦ ខែមីនារួចមក កម្លាំងនគរបាលតាមបណ្តាខណ្ឌនិងប៉ុស្តិ៍រដ្ឋបាលទាំងអស់ បានចេញឃ្លាំចាំចាប់រថយន្តបង្កខាងលើឲ្យតែបាន។ ប៉ុន្តែការឃ្លាំចាំចាប់រថយន្តដែលមានភិនភាគខាងលើគឺរហូតដល់ម៉ោង០០និង២៥នាទីរំលងអធ្រាត្រឈានចូលថ្ងៃទី២៧ខែមីនា ទើបប្រទះឃើញនៅចំណុចមុខយានដ្ឋានឯក វុទ្ធីនេះតែម្តង។ភ្លាមៗរថយន្តខាងលើ ត្រូវបានកម្លាំងនគរបាលការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញយកទៅរក្សាទុកដោះស្រាយតាមផ្លូវច្បាប់។

គួររំលឹកថា កាលពីវេលាម៉ោង១២និង៥នាទីរសៀលថ្ងៃទី២៦ ខែមីនា មានរថយន្តមួយគ្រឿងម៉ាកRANGE ROVER ពណ៌ខ្មៅពាក់ស្លាកលេខភ្នំពេញ 2AF 77 77 បានបើកបរយ៉ាងលឿន ហើយបុកម៉ូតូគុបជ្រុងពណ៌ខៀវពាក់ស្លាកលេខកណ្ដាល1J 52 54នៅចំណុចផ្លូវ៣១៧កែងផ្លូវ៥២៨ស្ថិតក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ បណ្តាលឲ្យអ្នកបើកបរម៉ូតូឈ្មោះឌុំ រីដា ភេទស្រីអាយុ២២ឆ្នាំ មានទីលំនៅភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល បានស្លាប់ភ្លាមៗ ហើយរថយន្តបង្កដែលសាក្សីថាបើកបរលឿននោះ បានបើកគេចបាត់ស្រមោលរហូតដល់លោកស្នងការនគរបាលរាជធានីភ្នំពេញចេញបញ្ជាឲ្យតាមបណ្តាខណ្ឌទាំង១២ចាប់ឲ្យបានមិនឲ្យរួចគេចបាននោះឡើយ៕