កាលពីថ្ងៃចន្ទ សមាជិកសភាគណបក្សប្រជាធិបតេយ្យអាមេរិក បានបើកការស៊ើបអង្កេតដ៏មានមហិច្ឆតាបំផុតរបស់ពួកគេចូលទៅក្នុងការចោទប្រកាន់អំពីការរារាំងយុត្តិធម៌និងការរំលោភបំពានអំណាចដោយលោក Donald Trump ដោយសំដៅទៅលើបុគ្គលរាប់សិបនាក់នៅក្នុងរង្វង់ខាងក្នុងរបស់លោកប្រធានាធិបតី។
ប្រធានគណៈកម្មាធិការយុត្តិធម៌សភាដ៏មានឥទ្ធិពលបានផ្ញើលិខិតទៅសមាជិកគ្រួសាររបស់លោកប្រធានាធិបតីរួមទាំងកូនប្រុសឈ្មោះ Don Jr និង Eric ក៏ដូចជាអ្នកជំនិតនយោបាយនិងអង្គភាពពាក់ព័ន្ធនានាផងដែរ។
លិខិតនោះបានទាមទារឲ្យមានឯកសារដែលអាចជួយបំភ្លឺអំពីកំហុសរបស់រដ្ឋបាលនិងលោក Trump ខ្លួនឯងផ្ទាល់។
កូនប្រសារឈ្មោះ Jared Kushner និងមន្ត្រីហិរញ្ញវត្ថុជាយូរមកហើយរបស់ក្រុមហ៊ុន Trump Organization ឈ្មោះ Allen Weisselberg គឺស្ថិតក្នុងចំណោមមនុស្សនិងអង្គការចំនួន៨១ដែលបានទទួលលិខិតពីប្រធានខាងបក្សប្រជាធិបតេយ្យរបស់ក្រុមប្រឹក្សានេះឈ្មោះ Jerry Nadler ។
ពួកគេក៏រួមមានអតីតជំនួយការសេតវិមានលោក Steve Bannon និងលោក Hope Hicks, មេធាវីផ្ទាល់ខ្លួនរបស់លោក Trump នាពេលបច្ចុប្បន្នឈ្មោះ Jay Sekulow, អតីតអគ្គរដ្ឋអាជ្ញាលោក Jeff Sessions និងស្ថាបនិក WikiLeaks លោក Julian Assange ផងដែរ។
សំណើនេះគឺជាការបង្កើនការស៊ើបអង្កេតដ៏សំខាន់បំផុតលើលោក Trump ចាប់តាំងពីគណបក្សប្រជាធិបតេយ្យបានចូលកាន់កាប់សភាតំណាងរាស្ដ្រកាលពីដើមខែមករាហើយបានព្យាយាមរកឲ្យឃើញថាតើលោក Trump ឬរដ្ឋបាលរបស់គាត់បានចូលរួមក្នុងការរាំងស្ទះយុត្តិធម៌ឬអំពើពុករលួយជាសាធារណៈដែរឬក៏អត់។
លោក Nadler បាននិយាយនៅក្នុងសេចក្តីថ្លែងការណ៍មួយថា “នេះគឺជាពេលវេលាដ៏សំខាន់មួយសម្រាប់ប្រទេសរបស់យើងហើយយើងមានការទទួលខុសត្រូវក្នុងការស៊ើបអង្កេតលើបញ្ហាទាំងនេះនិងរៀបចំសវនាការសម្រាប់សាធារណជនដើម្បីបញ្ចេញការពិតទាំងអស់”។
ទោះបីជាយ៉ាងណាក៏ដោយ អ្នកនាំពាក្យសេតវិមានលោកស្រី Sarah Sanders បានរិះគន់ការស៊ើបអង្កេតនេះថាជា “ភាពអាម៉ាស់និងការរំលោភបំពាន”៕ AFP
Source: Kampuchea Thmey Daily
0 Comments