មនុស្សរាប់ពាន់នាក់ បានប្រមូលផ្ដុំគ្នានៅទូទាំងប្រទេសនូវែលហ្សេឡង់នៅថ្ងៃព្រហស្បតិ៍ដើម្បីគោរពដល់អ្នកស្លាប់ដោយសារសង្គ្រាមក្នុងពិធីពេលព្រឹកព្រហាមនៃទិវា Anzac Day ប្រចាំឆ្នាំខណៈមានការរឹតបន្តឹងសន្តិសុខ បន្ទាប់ពីការវាយប្រហារនៅព្រះវិហារទីក្រុង Christchurch។លោកស្រីនាយករដ្ឋមន្ត្រី Jacinda Ardern បាននិយាយថា ការសម្លាប់រង្គាលកាលពីថ្ងៃទី១៥ខែមីនាដែលបានសម្លាប់មនុស្សចំនួន៥០នាក់និងរងរបួសជាច្រើននាក់ បានបង្ហាញថា “នៅតែមានការបែងចែកជាច្រើននៅក្នុងពិភពលោក”។
ទិវា Anzac គឺកត់សម្គាល់អំពីការទៅដល់របស់កងទ័ពអូស្ត្រាលីនិងនូវែលហ្សេឡង់នៅឯ Gallipoli លើឧបទ្វីបទួរគីនៅថ្ងៃទី២៥ខែមេសាឆ្នាំ១៩១៥ក្នុងយុទ្ធនាការសង្គ្រាមលោកលើកទីពីរប្រឆាំងនឹងកងកម្លាំង Ottoman ដែលគាំទ្រដោយប្រទេសអាល្លឺម៉ង់។ ទាហានអូស្ត្រាលីនិងនូវែលហ្សេឡង់ជាង១០,០០០នាក់បានស្លាប់ប៉ុន្តែដោយសារតែការប្រយុទ្ធបានបរាជ័យក្នុងគោលបំណងយោធារបស់ខ្លួន វាបានផ្តល់នូវការរំលឹកដល់ភាពក្លាហាននិងមិត្តភាពជិតស្និទ្ធដែលផ្សារភ្ជាប់ប្រទេសទាំងពីរ។ពិធីពេលព្រឹកព្រលឹមស្រដៀងគ្នាត្រូវបានគេប្រារព្ធធ្វើឡើងនៅក្នុងប្រទេសអូស្ត្រាលី។
លោកស្រី Ardern បាននិយាយនៅក្នុងទីក្រុង Auckland ថា “រៀងរាល់ទិវា Anzac យើងបានចំណាយពេលវេលាដើម្បីឆ្លុះបញ្ចាំងនិងចងចាំ”។ ទន្ទឹមនោះ លោកស្រីបានអំពាវនាវឲ្យមានការអនុវត្តឡើងវិញចំពោះគោលការណ៍សេរីភាព ប្រជាធិបតេយ្យនិងសន្តិភាពដែលប្រទេសនេះបានប្រយុទ្ធដើម្បីនាំវាមក។
លោកស្រីបន្តថា ” ថ្មីៗនេះ សន្តិភាពរបស់យើងបានផ្លាស់ប្តូរយ៉ាងខ្លាំងដោយសាការវាយប្រហារភេរវកម្មនៅក្នុងទីក្រុង Christchurch ។ នៅពេលយើងជួបជុំគ្នាក្នុងទិវា Anzac នេះ យើងទទួលស្គាល់ថា នៅតែមានការបែងចែកជាច្រើននៅក្នុងពិភពលោកនាពេលសព្វថ្ងៃនេះ”។ ព្រះអង្គម្ចាស់ William របស់ចក្រភពអង់គ្លេសបានមកដល់ប្រទេសនូវែលហ្សេឡង់ដើម្បីចូលរួមក្នុងកម្មវិធីមួយនាពេលព្រឹកនៅទីក្រុង Auckland មុនពេលធ្វើដំណើរទៅកាន់ទីក្រុង Christchurch ដើម្បីជួបអ្នករស់រានមានជីវិតពីការវាយប្រហារ៕ AFP
Source: Kampuchea Thmey Daily
0 Comments