ខ្សែបម្រើខ្មែរ-បារាំង វ៉ា សុថន (ឬ វ៉ា ឃ្វីនទីន) និងជាអតីតសមាជិកក្រុមជម្រើសជាតិកម្ពុជា បានសម្រេចត្រឡប់មកជួយក្រុមចាស់ភ្នំពេញក្រោន របស់ខ្លួននៅរដូវកាលឆ្នាំ២០១៩ នេះទាំងក្នុងពានរង្វាន់លីគកំពូលកម្ពុជានិងពានរង្វាន់សម្តេចតេជោ ហ៊ុន សែន ខណៈរូបគេបានបង្ហាញទស្សនៈគាំទ្រគ្រូបង្វឹកប្រចាំក្លិបខ្លួនទោះបីជាចាប់ផ្តើមប្រកួតមិនសូនបានល្អក៏ដោយ។
កីឡាករវ៉ា សុខថន បានបង្ហាញការយល់ឃើញជុំវិញរបស់ខ្លួនលើគ្រូបង្វឹក Leonardo Vitorino ដែលកំពុងតែរងសម្ពាធជាខ្លាំងក្រោយដឹកនាំក្រុមជើងឯក៦សម័យកាល ត្រឹមឈ្នះ១ប្រកួតនិងចាញ់៣ប្រកួត។ កីឡាកររូបនេះបាននិយាយថា « រាល់អ្វីៗទាំងអស់គឺយើងទទួលខុសត្រូវជាក្រុម យើងជួបបញ្ហាលំបាកជាមួយគ្នា ចំពោះគ្រូបង្វឹករបស់យើងគឺគាត់បានព្យាយាមខ្លាំងក្នុងការណែនាំពួកយើងរួចហើយក្នុងរយៈពេលពីមួយសប្តាហ៍ទៅមួយសប្តាហ៍ ។ ក្នុងវិស័យបាល់ទាត់គេតែងតែបន្ទោសគ្រូបង្វឹកមុនគេ នៅពេលដែលទទួលបានលទ្ធផលអវិជ្ជមាន ចំពោះខ្ញុំ ខ្ញុំគិតថាវាហាក់បីដូចជាលឿនពេកហើយក្នុងការវិនិច្ឆ័យទៅលើគាត់ ព្រោះគាត់មកទីនេះមកធ្វើការរៀបចំក្រុមថ្មីមួយ ដូច្នេះនៅពេលដែលយើងស្ថិតក្នុងដំណាក់កាលរៀបចំក្រុមថ្មី និងក្រុមដែលមានកីឡាករក្មេងៗច្រើនបែបនេះ វាមិនមែនជារឿងដែលងាយស្រួលនោះទេ »។
កីឡាករ វ៉ា សុថន បានបញ្ជាក់ថា «គ្រប់គ្នាក្នុងក្រុមរីករាយនឹងការហ្វឹកហាត់ជាមួយគាត់ ព្រោះការហ្វឹកហាត់របស់គាត់ល្អ យើងទាំងអស់គ្នាព្យាយាមអភិវឌ្ឍន៍ខ្លួនឲ្យកាន់តែខ្លាំងឡើងបន្ថែមទៀត។ មួយវិញទៀតលោក Leonardo តែងតែណែនាំយើងពីវិធីល្អៗ ហើយគាត់ក៏មានទំនាក់ទំនងល្អជាមួយបុគ្គលិក និងក្រុមកីឡាករទាំងអស់ផងដែរ។ គ្រប់គ្នាយល់ថា វាជារឿងដែលលំបាកក្នុងការប្រកួតប្រជែងយកជើងឯក ដែលអាចគិតថាវាជារឿងដែលមិនអាចទៅរួច ប៉ុន្តែគ្រូបង្វឹករបស់យើងនៅតែបន្តរកអ្វីដើម្បីកែប្រែពួកយើង ដែលធ្វើឲ្យខ្ញុំគិតថាវានឹងមានរឿងល្អមួយនៅក្នុងនោះនាពេលខាងមុខ ដោយអ្វីៗទាំងអស់គឺត្រូវស្ថិតលើពេលវេលា និងភាពជឿជាក់»។
សូមបញ្ជាក់ថា ឆ្លងកាត់ការប្រកួត៤លើកនៃលីគកំពូលកម្ពុជានាពេលកន្លងមកក្រុមភ្នំពេញក្រោន បានប្រកួតចាញ់ក្រុមបឹងកេតនៅលទ្ធផល ២-៣ ប្រកួតឈ្នះក្រុមយុវជនបាទីនៅលទ្ធផល ០-២ ប្រកួតចាញ់ក្រុមវិសាខានៅលទ្ធផល ១-៣ និងចុងក្រោយប្រកួតចាញ់ក្រុមស្វាយរៀងនៅលទ្ធផល ៥-១។ សម្រាប់ប្រកួតបន្តក្រុមដែលមានមូលដ្ឋាននៅរាជធានីភ្នំពេញមួយនេះត្រូវបើកទ្វារកីឡដ្ឋាន Smart RSN Stadium របស់ខ្លួនទទួលក្រុមទទួលក្រុមអាស៊ីអឺរ៉ុប នៅវេលាម៉ោង៦ល្ងាចថ្ងៃអាទិត្យទី២៨ខែមេសា ឆ្នាំ២០១៩៕
Source: Kampuchea Thmey Daily
0 Comments