ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានបើកសិក្ខាសាលាពិគ្រោះយោបល់ត្រីភាគីថ្នាក់ជាតិលើសេចក្តីព្រាងវិសោធនកម្មច្បាប់ស្តីពីសហជីពចំនួន១០មាត្រាដើម្បីប្រមូលធាតុចូលជាមូលដ្ឋានឲ្យបានគ្រប់ជ្រុងជ្រោយពីគ្រប់ភាគីពាក់ព័ន្ធជាពិសេសភាគីតំណាងកម្មករនិយោជិតនិងនិយោជកសំដៅធានាបានប្រសិទ្ធភាពខ្ពស់ក្នុងការអនុវត្តច្បាប់ស្តីពីសហជីព។
ដើម្បីដោះស្រាយបញ្ហាប្រឈម និងកង្វល់នានាក្នុងការអនុវត្តច្បាប់ស្តីពីសហជីពដែលជាបទប្បញ្ញត្តិច្បាប់ថ្មី បើប្រៀបធៀបជាមួយច្បាប់ស្តីពីការងារក្រសួងការងារនិងបណ្តុះបណ្តាលវិជ្ជាជីវៈក៏បានរៀបចំកិច្ចប្រជុំកម្រិតបច្ចេកទេស និងសិក្ខាសាលាពិគ្រោះយោបល់ ដើម្បីធ្វើវាយតម្លៃការអនុវត្តច្បាប់ស្តីពីសហជីពជាបន្តបន្ទាប់ ជាមួយតំណាងកម្មករនិយោជិត សហជីព និយោជក និងសមាគមនិយោជក ដោយសហការជាមួយអង្គការ ILO និងបានដាក់ ចេញជាសេចក្តីណែនាំនានា ក្នុងគោលបំណងលើកកម្ពស់ការយល់ដឹងអំពីច្បាប់ស្តីពីសហជីព និងបន្តពង្រឹងការអនុវត្តច្បាប់ស្តីពីសហជីពនេះឲ្យបានកាន់តែមានប្រសិទ្ធភាពខ្ពស់។
ថ្លែងនៅក្នុងពិធីបើកសិក្ខាសាលាពិគ្រោះយោបល់ត្រីភាគីថ្នាក់ជាតិ លើសេចក្តីព្រាងវិសោធនកម្មច្បាប់ស្តីពីសហជីពកាលពីព្រឹកថ្ងៃទី២៥ខែមេសាឆ្នាំ២០១៩នៅសណ្ឋាគារសាន់វ៉េលោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានស្វាគមន៍យ៉ាងកក់ក្តៅ និងអរគុណយ៉ាងជ្រាលជ្រៅចំពោះវត្តមានលោកស្រី ដែលជាតំណាងឲ្យត្រីភាគីនិងអង្គការ ILO ព្រមទាំងដៃគូអភិវឌ្ឍន៍នានាដែលបាន ចូលរួមសិក្ខាសា លាដ៏មានសារៈសំខាន់នាពេលនេះ ដើម្បីពិភាក្សាពិគ្រោះយោបល់និងផ្តល់ធាតុចូលបន្ថែមលើសេចក្តីព្រា ងច្បាប់ស្តីពីវិសោធនកម្មលើ មាត្រា៣ មាត្រា១៧ មាត្រា២០ មាត្រា២១ មាត្រា២៧ មាត្រា២៨ មាត្រា២៩ មាត្រា៥៤ មាត្រា៥៥ និងមាត្រា៥៩ នៃច្បាប់ស្តីពីសហជីព។
លោករដ្ឋមន្ត្រីបានរំលឹកថា ច្បាប់ស្តីពីសហជីព ដែលរួមមាន ១៧ជំពូក និង១០០មាត្រា ត្រូវបាន ប្រកាសឲ្យប្រើដោយព្រះរាជក្រមលេខ នស/រកម/០៥១៦/០០៧ ចុះថ្ងៃទី១៧ ខែឧសភា ឆ្នាំ២០១៦ ក្នុងគោលបំណងផ្តល់សិទ្ធ និងសេរីភាពដល់សហគ្រាស ឬគ្រឹះស្ថាន និងជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ និងបុគ្គលិកធ្វើការតាមផ្លូវអាកាសនិងផ្លូវសមុទ្រនិងកំណត់ពីការរៀបចំនិងការប្រព្រឹត្តទៅនៃអង្គការវិជ្ជាជីវៈរបស់កម្មករនិយោជិត និងនិយោជកនៅក្នុងព្រះរាជាណាចក្រកម្ពុជា ស្របតាមរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តី ពីការងារ ព្រមទាំងអនុសញ្ញាអន្តរជាតិខាងការងារលេខ៨៧ និង៩៨ ដែលកម្ពុជាបានផ្តល់សច្ចាប័ន។
លោករដ្ឋមន្ត្រីបានបន្តថា ច្បាប់ស្តីពីសហជីព គឺជាក្របខ័ណ្ឌគតិយុត្តិមួយដែលមានគោលដៅ ១-ការពារសិទ្ធិ និងផលប្រយោជន៍ស្របច្បាប់របស់បងប្អូនកម្មករនិយោជិត ២ធានានូវសិទ្ធសេរីភាពក្នុងការចរចាជាសមូហភាពរវាងកម្មករនិយោជិត និងនិយោជក ៣- ជំរុញឲ្យមានសុខដុមរមនាក្នុងទំនាក់ទំនងវិជ្ជាជីវៈ និង ៤-រួមចំណែកក្នុងការអភិវឌ្ឍការងារសមរម្យ បង្កើនផលិតភាព និងការវិនិយោគ។
លោករដ្ឋមន្ត្រីបានបន្ថែមថា ក្រោយពីចូលជាធរមានច្បាប់ស្តីពីសហជីពបានចូលរួមចំណែកយ៉ាងសំខាន់ក្នុងការធានាភាពសុខដុមរមនានៅក្នុងទំនាក់ទំនងវិជ្ជាជីវៈ និងការលើកកម្ពស់សិទ្ធិសេរីភាពអង្គការវិជ្ជាជីវៈ។ ជាក់ស្តែង គិតត្រឹមត្រីមាសទី១ ឆ្នាំ២០១៩ នេះ អង្គការវិជ្ជាជីវៈដែលចុះបញ្ជីនៅក្រសួងការងារនិងបណ្តុះបណ្តាលវិជ្ជាជីវៈមានចំនួន ៤ ៩៤៩ ក្នុងនោះសហជីពមូលដ្ឋានមានចំនួន ៤ ៧២២, សហព័ន្ធ សហជីពមានចំនួន ១៨៩ សហភាពសហជីពមានចំនួន ២៩ សមាគមនិយោជកមានចំនួន០៩។
បន្ថែមលើនេះ ចំនួនវិវាទការងាររួម និងកូដកម្ម-បាតុកម្មក៏មានការធ្លាក់ចុះគួរឲ្យកត់សម្គាល់ផងដែរ ដែលបណ្តាលមកពីប្រសិទ្ធភាពនៃការអនុវត្តច្បាប់ស្តីពីសហជីព និងការពង្រឹងប្រព័ន្ធអធិការកិច្ចការងារកាន់តែល្អប្រសើរ។
លោករដ្ឋមន្ត្រីបានបញ្ជាក់ថា ទន្ទឹមនឹងវឌ្ឍនភាពទាំងនេះ ក៏នៅមានសហជីព និងស្ថាប័នអន្តរជាតិមួយចំនួន មិនទាន់មានការយល់ដឹងច្បាស់អំពីខ្លឹមសារនៃបទប្បញ្ញត្តិច្បាប់ស្តីពីសហជីព ដោយបានបន្តលើក ឡើងអំពីកង្វល់ មួយចំនួនក្នុងការចុះបញ្ជីសហជីព និងការស្នើសុំបញ្ជាក់ភាពជាតំណាងបំផុតរបស់សហជីព។
លោក សុខឡោ តំណាងភាគីសមាគមនិយោជកបានស្វាគមន៍ការធ្វើវិសោធនកម្មច្បាប់ស្តីសហជីពនេះដើម្បីឆ្លើយតបទៅនឹងអនុសញ្ញាអន្តរជាតិ។តែយ៉ាងណាក៏ដោយលោកស្នើឲ្យសហជីពអនុវត្តច្បាប់ក្នុងការធ្វើកូដកម្មបាតុកម្មដើម្បីធានាបាននូវសុខដុមរមនាក្នុងវិស័យទំនាក់ទំនងវិជ្ជាជីវៈឲ្យកាន់តែប្រសើរឡើងថែមទៀត។
លោកអាត់ធនប្រធានសហភាពការងារកម្ពុជាបានស្នើឲ្យក្រសួងការងារនិងបណ្តុះបណ្តាលវិជ្ជាជីវៈធ្វើវិសោធនកម្មបន្ថែមមាត្រាចំនួន៤ទៀតរួមមានមាត្រាទី១២,១៣,១៤និងមាត្រា៤៧ដើម្បីឲ្យការអនុវត្តសិទ្ធិរបស់សហជីពបានពេញលេញព្រោះថា ការធ្វើវិសោធនកម្ម១០មាត្រារបស់ក្រសួងបានឆ្លើយតបការទាមទាររបស់សហជីពបានត្រឹមតែ៧០ទៅ៨០ភាគរយប៉ុណ្ណោះ៕
Source: Kampuchea Thmey Daily
0 Comments