ក្រុមយក្សអេស្ប៉ាញ Barcelonaបានយកឈ្នះក្រុម Man Utd១-០នៅការប្រកួតជើងទី១វគ្គ៨ក្រុមចុងក្រោយ Champions Leagueរបស់ពួកគេនៅក្នុងទឹកដី Old Traffordដោយសារតែគ្រាប់បាល់ចូលទីខ្លួនឯងរបស់កីឡាករ Luke Shawកាលពីថ្ងៃពុធ។
កីឡាករ Luke Shawបានធ្វើឲ្យបាល់ផ្លាតពីការតែតបាល់របស់កីឡាករ Luis Suarez ចូលទៅក្នុងសំណាញ់ទីខ្លួនឯងក្រោយលេងបាន១២នាទីប៉ុណ្ណោះ ជាហេតុធ្វើឲ្យក្រុម Barcelonaរកបានគ្រាប់បាល់ក្រៅទឹកដីដ៏ចាំបាច់ ដែលនឹងធ្វើឲ្យពួកគេមានប្រៀបខ្លាំង និងក្លាយជាក្រុមឈានមុខគេនៅការប្រកួតជើងទី២។
ការតែតបាល់របស់ខ្សែប្រយុទ្ធអ៊ុយរុយហ្គាយម្នាក់នេះ បានផ្លាតត្រូវស្មាកីឡាករ Shaw ធ្វើឲ្យផុតដៃអ្នកចាំទី David De Gea ដើម្បីធ្វើឲ្យក្រុមភ្ញៀវនាំមុខ ថ្វីត្បិតតែមន្ត្រីរត់ខ្សែបន្ទាត់លើកទង់ថាជាបាល់អកហ្ស៊ើក៏ដោយ ក៏គ្រាប់បាល់ត្រូវបានអនុញ្ញាតឲ្យក្រោយពីពិនិត្យមើលវីដេអូជំនួយការអាជ្ញាកណ្តាល VAR។
ទោះបីជាយ៉ាងណាក៏ដោយ ក្រោយពីក្រុម Man Utdបានផ្លាស់ប្តូរជោគវាសនារបស់ខ្លួនបានយ៉ាងអស្ចារ្យនៅជុំមុនជាមួយក្រុម Paris St Germain នោះ ច្បាស់ណាស់ថា ក្រុម Barcelonaមិនអាចមើលស្រាលលើគូប្រកួតមួយនេះបានឡើយ ហើយក្រុមរបស់លោក Ole Gunnar Solskjaer នឹងប្រឹងប្រែងលេងអស់ពីលទ្ធភាពរបស់ពួកគេជាក់ជាពុំខាននោះឡើយ ដើម្បីអាចឆ្លងផុតបាន។
សូមបញ្ជាក់ថា ក្រុម Barcelonaមិនធ្លាប់ដែលមានប្រវត្តិចាញ់គេម្តងណាឡើយនៅក្នុងទឹកដីខ្លួនចំនួន៣០ប្រកួតកន្លងមកនេះ នៅ Champions League ចាប់តាំងពីឆ្នាំ២០១៣រហូតមក ខណៈដែលក្រុម Man Utdបានបង្ហាញទម្រង់លេងមួយដែលមិនគំរាមកំហែងដូចគ្នាដល់គូប្រកួតអេស្ប៉ាញរបស់ខ្លួននៅការប្រកួតមួយនេះ៕
Source: Kampuchea Thmey Daily
0 Comments