ប្រទេស​ថៃ​ ហាត់​សម​សម្រាប់​ពិធី​គ្រង​រាជសម្បត្តិ​របស់​ព្រះមហាក្សត្រ

យោធា​ពាក់មួក​ចម្រុះ​ពណ៌​បាន​លើក​គ្រែស្នែង​ឆ្លងកាត់​សង្កាត់​វ័យ​ចំណាស់​របស់​ទីក្រុង​បាងកក​កាលពី​ថ្ងៃអាទិត្យ​ដើម្បី​ហាត់​សម​សម្រាប់​ព្រះរាជ​ពិធី​គ្រង​រាជសម្បត្តិ​របស់​ព្រះមហាក្សត្រ Maha Vajiralongkorn ដែលជា​ទស្សនីយភាព​មាន​មួយដង​ប៉ុណ្ណោះ​ក្នុង​មួយជីវិត​ដែល​ត្រូវបាន​កត់សម្គាល់​ដោយ​ដំណើរ​ដ៏​អធិកអធម​និង​ពិធី​បែប​ប្រពៃណី​បុរាណ​។​

ព្រះរាជ​ពិធី​គ្រង​រាជសម្បត្តិ​របស់​ព្រះមហាក្សត្រ​ព្រះជន្ម​៦៦​វស្សា​អង្គ​នេះ​នឹង​ប្រព្រឹត្តទៅ​ចាប់ពី​ថ្ងៃទី​៤​ដល់​ថ្ងៃទី​៦​ខែឧសភា​ហើយ​ត្រូវបាន​ចាត់ទុកថា​ជា​ព្រឹត្តិការណ៍​សំខាន់បំផុត​ប្រចាំឆ្នាំ​នៅក្នុង​ប្រទេស​ថៃ​។​

វា​គឺជា​លើកដំបូង​ក្នុង​រយៈពេល​៦៩​ឆ្នាំ​ចាប់តាំងពី​ព្រះបិតា Bhumibol Adulyadej បាន​ឡើង​គ្រងរាជ្យ​បល្ល័ង្ក​ជា​ផ្លូវការ​ក្នុង​ឆ្នាំ​១៩៥០​។ ព្រះអង្គ​បាន​សោយ​ទិវង្គត​កាលពី​ពីរ​ឆ្នាំមុន​។​

ថ្ងៃទី​២​នៃ​ពិធី​នេះ​គឺជា​ក្បួន​ដង្ហែ​ព្រះមហាក្សត្រ​ដែល​ក្នុងនោះ​ព្រះអង្គ Vajiralongkorn នឹងត្រូវ​ជិះ​គ្រែស្នែង​ដែល​សែង​ដោយ​ទាហាន​។​

ក្បួន​នេះ​នឹង​ចាក​ចេញពី​ព្រះបរមរាជវាំង​ហើយ​ហែ​ជុំវិញ​សង្កាត់​វ័យ​ចំណាស់​ជា​ប្រវត្តិសាស្ត្រ​មួយ​ដែលជា​ហេតុ​ផ្តល់​ឲ្យ​ប្រជាជន​នូវ​ឱកាស​ដើម្បី​គោរព​ដល់​ព្រះមហាក្សត្រ​ថ្មី​របស់​ពួកគេ​។​

ការហាត់​សម​កាលពី​ថ្ងៃអាទិត្យ​បានបង្ហាញ​ពី​ការទាក់ទាញ​សម្រាប់​អ្នកគាំទ្រ​រាប់សិប​នាក់​ដែល​ចង់ដឹង​ចង់ឃើញ​ពី​ពិធី​នេះ​។​

សម្លៀកបំពាក់​ចម្រុះ​ពណ៌​តាមបែប​ប្រពៃណី​ត្រូវបាន​បង្ហាញ​ខណៈ​ទាហាន​បាន​ដើរ​វាយ​ស្គរ​។​
​មេដឹកនាំ​យោធា​លោក​ប្រា​យុទ្ធ​ចាន់​អូ​ចា​ក៏បាន​ចូលរួម​នៅក្នុង​ក្បួន​ដង្ហែ​នេះ​ផងដែរ​។​

ប៉ុន្មាន​សប្តាហ៍​មុន​ដល់​ពិធី​គ្រងរាជ្យ មន្ត្រី​រដ្ឋ​បានចាប់ផ្តើម​ស្លៀកពាក់​ពណ៌​លឿង​ដែល​ត្រូវបាន​គេ​ចាត់ទុកថា​ជា​ពណ៌​របស់​ស្តេច​។ ពិធីករ​ទូរទស្សន៍​ក៏​ស្លៀកពាក់​ពណ៌​ផងដែរ​ក្នុងអំឡុងពេល​នៃ​ការផ្សាយ​ព័ត៌មាន​ពេលយប់​។​

គួរ​បញ្ជាក់ថា របប​រាជាធិបតេយ្យ​ដែលមាន​ទ្រព្យសម្បត្តិ​បំផុត​នៅលើ​ពិភពលោក​គឺ​ត្រូវបាន​គេ​ចាត់ទុកថា​ពិសិដ្ឋ​នៅក្នុង​សង្គម​ថៃ​៕ AFP

​

Source: Kampuchea Thmey Daily