ខ្សែការពារ ហុង ផេង សមាជិកក្រុមជម្រើសជាតិកម្ពុជា ដែលចូលរួមជាមួយក្លិបបឹងកេកតាំងពីឆ្នាំ២០១៤ មកកំពុងតែកាន់តួនាទីប្រចាំក្លិបជើងឯក៣សម័យកាលមួយនេះខណៈរូបមានការជឿជាក់លើមិត្តរួមក្រុមនឹងត្រឡប់មករកភាពខ្លាំងដូចដើមវិញ ក្រោយបើកឆាករដូវកាលថ្មីប៉ុន្មានប្រកួតឈ្នះ២លើក ស្មើគ្នា១លើកនិងចាញ់១លើក។
កីឡាករដែលមានដើមកំណើតនៅខេត្តបាត់ដំបងរូបនេះ បានលើកឡើងក្រោយក្រុមរបស់ខ្លួនយកឈ្នះលើក្រុមបាល់ទាត់ខេត្តកំពង់ចាម ដោយលទ្ធផល ៧-០ នាល្ងាចថ្ងៃអាទិត្យថ្មីៗ ថាស្ថានភាពរបស់ក្រុមនឹងត្រឡប់ទៅរកភាពល្អឡើងវិញ។ ហុង ផេង បន្តថា «ការត្រៀមខ្លួនរបស់ពួកយើងក្នុងប៉ុន្មានប្រកួតដំបូងនេះ គឺបានល្អហើយ ប៉ុន្តែក្នុងបាល់ទាត់ ពេលខ្លះយើងត្រូវការសំណាងឲ្យនៅខាងយើងថែមទៀត»។
កីឡាករវ័យ២៩ឆ្នាំរូបនេះបានបន្ថែមថា «ចំពោះយុវជន និងកីឡាករថ្មីៗដែលមកចូលរួមជាមួយពួកយើងក្នុងរដូវកាលថ្មីនេះ ភាគច្រើនគឺពួកគាត់អាចយល់និងចាប់បាននូវអ្វីដែលជាការចង់បានរបស់គ្រូបង្វឹក និងក្រុម។ លទ្ធផលថ្មីៗនេះ ថ្វីត្បិតតែពួកយើងឈ្នះលើក្រុមដែលទើបបង្កើតថ្មី ប៉ុន្តែវាគឺជាលទ្ធផលដ៏ល្អ ដែលកីឡាកររបស់យើង ពុំមើលងាយលើគូប្រកួត ហើយតែងតែព្យាយាមពេញ ៩០នាទី»។ កាលពីពាក់កណ្ដាលឆ្នាំ២០១៨ ខ្សែការពារ ហុង ផេង បានសម្រេចបន្តកិច្ចសន្យារបស់ខ្លួនជាមួយក្រុមជើងឯកឆ្នាំចាស់បឹងកេតអែហ្វស៊ី ដល់ដំណាច់ឆ្នាំ២០២០ ខាងមុខ។
កីឡាករ ហុង ផេង ធ្លាប់បានចូលរួមជាមួយក្រុមបក្សីចាំក្រុង មុនឆ្នាំ២០១១ ខណៈចាប់ពីឆ្នាំ២០១១ ដល់២០១៤ រូបគេបានចូលរួមជាមួយក្រុមភ្នំពេញក្រោន និងចាប់ពីឆ្នាំ២០១៤ ទល់បច្ចុប្បន្នចូលរួមជាមួយក្រុមបឹងកេត។ គិតពីឆ្នាំ២០១៤ ដល់បច្ចុប្បន្នរូបគេក៏ត្រូវបានគ្រូបង្វឹកក្រុមជម្រើសជាតិកម្ពុជា កោះហៅឲ្យចូលរួមក្នុងក្រុមជាប្រចាំផងដែរ។ កាលនៅជាមួយក្រុមភ្នំពេញក្រោន រូបគេធ្លាប់ជួយក្រុមឈ្នះពានរង្វាន់លីគកំពូលកម្ពុជា នៅឆ្នាំ២០១១ និងឆ្នាំ២០១៤ ខណៈពេលចូលរួមជាមួយក្រុមបឹងកេត ធ្លាប់បានឈ្នះពានរង្វាន់នេះចំនួន២លើកទៀតគឺនៅឆ្នាំ២០១៦ និង២០១៧ កាលពីឆ្នាំ២០១៥ រូបគេក៏ជាផ្នែកជួយឲ្យក្រុមឡើងដល់វគ្គផ្តាច់ព្រ័ត្រពានរង្វាន់ 2015 Mekong Club Championship តែបានត្រឹមជើងឯករងផងដែរ។
គួរបញ្ជាក់ថា ក្រោយប្រកួតសប្តាហ៍ទី៤នេះ បឹងកេត មាន ៧ពិន្ទុក្នុងដៃក្រោយយកឈ្នះលើក្រុមភ្នំពេញក្រោន ៣-២ តែចាញ់អគ្គិសនីកម្ពុជា ១-០ ហើយស្មើអង្គរថាយហ្គឺរ ១-១ និងឈ្នះកំពង់ចាម ៧-០។ សម្រាប់ប្រកួតបន្តនៅក្នុងសប្ដាហ៍ទី៥ ក្រុមបឹងកេត ត្រូវប៉ះម្ចាស់ផ្ទះក្រសួងការពារជាតិ នៅវេលាម៉ោង៦ល្ងាចថ្ងៃទី២៧ ខែមេសាឆ្នាំ២០១៩ លើទីលានកីឡដ្ឋានកងយោធពលខេមរភូមិន្ទ (ស្តាតចាស់)៕
Source: Kampuchea Thmey Daily
0 Comments