ទឹកជំនន់​ក្នុងប្រទេស​ឥណ្ឌូនេស៊ី​សម្លាប់​មនុស្ស​២៩​នាក់​និង​បាត់​ខ្លួន​១២​នាក់

ក្រុមមន្ត្រី​បាន​និយាយ​កាលពី​ថ្ងៃ​ចន្ទ​ថា ទឹកជំនន់​ដែល​បណ្តាលមកពី​ភ្លៀង​ធ្លាក់​ឥតឈប់ឈរ​បានសម្លាប់​មនុស្ស​ចំនួន​២៩​នាក់​នៅក្នុង​ប្រទេស​ឥណ្ឌូនេស៊ី ​ខណៈ​មនុស្ស​ជាច្រើន​នាក់​ទៀត​នៅតែ​បាត់​ខ្លួន​។ ហេតុការណ៍​នេះ​កត់សម្គាល់​ជា​សោកនាដកម្ម​ចុងក្រោយ​បំផុត​សម្រាប់​ប្រជាជាតិ​ដែល​ងាយ​រងគ្រោះ​ដោយ​គ្រោះមហន្តរាយ​មួយ​នេះ។

ការបាក់​ដី​និង​ទឹកជំនន់​គឺជា​រឿង​ធម្មតា​ជាពិសេស​ក្នុងអំឡុង​រដូវ​មូសុង​ចន្លោះ​ខែតុលា​ដល់​ខែមេសា​នៅពេលដែល​ភ្លៀង​ធ្លាក់​បាន​វាយប្រហារ​ប្រជុំ​កោះ​អាស៊ីអាគ្នេយ៍​មួយ​នេះ​។​

កាលពី​ថ្ងៃ​ចន្ទ ទីភ្នាក់ងារ​គ្រោះមហន្តរាយ​របស់​ប្រទេស​ឥណ្ឌូនេស៊ី​បានបញ្ជាក់​ថា មាន​មនុស្ស​២៩​នាក់​បាន​ស្លាប់​ហើយ​និយាយថា យ៉ាងតិច​មនុស្ស​១៣​នាក់​បាន​បាត់​ខ្លួន​បន្ទាប់ពី​ព្យុះភ្លៀង​រយៈពេល​ច្រើន​ថ្ងៃ​វាយប្រហារ​កោះ​ស៊ូ​ម៉ា​ត្រា។

មនុស្ស​ប្រហែល​១២,០០០​នាក់​ផ្សេងទៀត​ត្រូវបាន​គេ​ជម្លៀស​ចេញពី​ខេត្ត Bengkulu ខណៈ​សំណង់​អគារ ស្ពាន​និង​ផ្លូវថ្នល់​រាប់រយ​ត្រូវបាន​រង​ការខូចខាត​។​ កន្លែង​រងគ្រោះ​ខ្លាំង​បំផុត​គឺ​ស្រុក Bengkulu Tengah ដែល​នៅ​ទីនោះ​មនុស្ស​ចំនួន​២២​នាក់​ត្រូវបាន​សម្លាប់​រួមជាមួយ​នឹង​សត្វ​រាប់រយ​ក្បាល​។​

អាជ្ញាធរ​បាន​បង្កើត​ជម្រក​បណ្តោះអាសន្ន​និង​ផ្ទះបាយ​សាធារណៈ​សម្រាប់​ជន​ជម្លៀស​។​
​ទន្ទឹមនឹង​នោះដែរ ការបាក់​ដី​ដែល​បណ្តាលមកពី​ភ្លៀង​ធ្លាក់​ខ្លាំង​នៅ​ខេត្ត Lampung នៃ​កោះ​ស៊ូ​ម៉ា​ត្រា​កាលពី​ថ្ងៃ​សៅរ៍​បានសម្លាប់​គ្រួសារ​មួយ​ដែលមាន​សមាជិក​៦​នាក់​ហើយ​រំខាន​ដល់​ការដឹកជញ្ជូន​ទៅ​តំបន់​ជិតខាង​នោះ។

ទឹកជំនន់​នៅក្នុង​ផ្នែក​ជាច្រើន​នៃ​រដ្ឋធានី​ហ្សា​ការតា​ក្នុងអំឡុងពេល​មួយ​សប្តាហ៍​នេះ​បានសម្លាប់​មនុស្ស​យ៉ាងតិច​ពីរ​នាក់​និង​បង្ខំ​ឲ្យ​មនុស្ស​ជាង​២,០០០​នាក់​ជម្លៀស​ចេញពីផ្ទះរ​បស់​ពួកគេ​។​

អ្នកក្រុង Bogor ដែលជា​ទីក្រុង​រណប​នៃ​រដ្ឋធានី​ហ្សា​ការ​តា​ក៏ត្រូវ​ប្រឈមមុខ​នឹង​សត្វ​ពស់ថ្លាន់​ចំនួន​១៤​ក្បាល​ផងដែរ​ដែល​រួច​ចេញពី​អចលនទ្រព្យ​ឯកជន​មួយ​ដោយសារតែ​ទឹក​ឡើង​ខ្លាំង​។​

នៅ​កោះ​ស៊ូ​ម៉ា​ត្រា អាជ្ញាធរ​បាន​និយាយថា ការជីក​រ៉ែ​ធ្យូងថ្ម​ខុសច្បាប់​គឺជា​ផ្នែក​មួយ​ដែល​ត្រូវ​ស្តីបន្ទោស​ចំពោះ​បំណាក់​ដី​ដោយសារតែ​វា​ធ្វើ​ឲ្យ​ដី​រលុង​ងាយ​នឹង​បាក់​នៅពេល​ភ្លៀង​ធ្លាក់​ខ្លាំង​៕ AFP

​

Source: Kampuchea Thmey Daily