លទ្ធផល​ប្រកួត​ប្រកួត​បើកឆាក​ក្នុង​ពានរង្វាន់ Smart Youth League 2019 ដែល​ធ្វើឡើង​នៅ​កីឡដ្ឋាន RSN Stadium

​ក្លិប​បាល់ទាត់​ភ្នំពេញ​ក្រោ​ន សមាជិក​ពានរង្វាន់​លី​គ​កំពូល​កម្ពុជា បាន​រៀប​ចំ​ការប្រកួត​បាល់ទាត់​ពានរង្វាន់​យុវជន Smart Youth League ឆ្នាំ​២០១៩ ដោយមាន​ការ​សហការ​ឧបត្ថម្ភ​ធំ​ដោយ​ក្រុមហ៊ុនទូរស័ព្ទ Smart Axiata ដែល​ជា​ដៃគូ​សហការ​ឧបត្ថម្ភ​ធំ​របស់​ក្លិប ខណៈ​ការប្រកួត​បានចាប់ផ្តើម​ពី​ចុង​សប្ដាហ៍​ថ្មីៗ​នេះ​។

យោង​តាម​ការ​បញ្ជាក់​របស់​ក្លិប​ភ្នំពេញ​ក្រោ​ន លើកឡើងថា​ការប្រកួត​ក្នុង​ពានរង្វាន់ Smart Youth League 2019 មាន​ក្រុម​ទាំងអស់​ចំនួន​៣៤​ចូលរួម ហើយ​ចែកចេញជា​បួន​កម្រិត​អាយុ​ខុសៗ​គ្នា​ដូចជា​ក្រុម​កីឡាករ​អាយុ​ក្រោម​១២​ឆ្នាំ ក្រុម​កីឡាករ​អាយុ​ក្រោម​១៤​ឆ្នាំ ក្រុម​កីឡាករ​អាយុ​ក្រោម​១៧​ឆ្នាំ និង​ក្រុម​កីឡាករ​អាយុ​ក្រោម​២០​ឆ្នាំ​។ ទស្សនិកជន​អាច​ចូល​ទស្សនាការ​ប្រកួត​បា​ន​ដោយ​សេរី​នៅ​កីឡដ្ឋាន RSN Stadium​។

ការប្រកួត​ក្នុង​ពានរង្វាន់ Smart Youth League 2019 ត្រូវ​បាន​បញ្ចប់​នៅ​សប្តាហ៍​ទី​១ ដោយមាន​ការប្រកួត​សរុប​ចំនួន​១៤ គូ​ហើយ​ការប្រកួត​ចំនួន​៣ ត្រូវ​បាន​ពន្យារ​ពេល​ដោយសារតែ​បញ្ហា​ភ្លៀង​ធ្លាក់​។ ចំពោះ​លទ្ធផល​នៃ​ការប្រកួត​រវាង​ក្រុម​ទាំងអស់​មាន​ដូច​ជា ប្រកួត​ក្នុង​កម្រិត​អាយុ​ក្រោម​១២​ឆ្នាំ​ក្រុមបាល់ទាត់​នគររាជ ឈ្នះ​ក្រុម Elite Soccer Coaching ២៧-០ ហើយ​ក្រុម​កីឡាករ​សហគមន៍​អាយុ​ក្រោម​១១​ឆ្នាំ ចាញ់​ក្រុម Prak Football Academy ៦​ទល់​១​។



​ប្រកួត​ក្នុង​កម្រិត​អាយុ​ក្រោម​១៤​ឆ្នាំ វិញ​ក្រុម​ក្រាំង​ពង្រ បាន​យកឈ្នះ​លើ​ក្រុម​អេ​លី​ត​អាយុ​ក្រោម​១៣​ឆ្នាំ ដោយ​លទ្ធផល ៣​ទល់​១ ហើយ​ក្រុម PSE ចាញ់ ក្រុម​យុវជន​ថ្នាល​អាយុ​ក្រោម​១៤​ឆ្នាំ ដោយ​លទ្ធផល ៨​ទល់​០ ក្រុម​កីឡាករ​សហគមន៍​អាយុ​ក្រោម​១៣​ឆ្នាំ ឈ្នះ ក្រុម​កីឡាករ​សហគម​ន៍​អាយុ​ក្រោម​១៤​ឆ្នាំ ២​ទល់​១ ក្រុម Two Lion​ឈ្នះ​ក្រុម​សាលា​អន្តរជាតិ GFL ៨​ទល់​០​។

ប្រកួត​ក្នុង​កម្រិត​អាយុ​ក្រោម​១៧​ឆ្នាំ វិញ​ក្រុម​អគ្គិសនី​កម្ពុជា​អាយុ​ក្រោម​១៦​ឆ្នាំ យកឈ្នះ​លើ​ក្រុម​អេ​លី​ត​អាយុ​ក្រោម​១៧​ឆ្នាំ ដោយ​លទ្ធផល ១​ទល់​០ ហើយ​ក្រុមយុវជន​សម្ព័ន្ធ បាន​យកឈ្នះ​លើ​ក្រុម សាលា​ព្រះខ័ន​រាជ​ស្វាយរៀង ២​ទល់​១ ក្រុម​យុវជន​កងទ័ព​ជើង​ទឹក យកឈ្នះ​លើ​ក្រុម​អេ​លី​ត​អាយុ​ក្រោម​១៥​ឆ្នាំ ដោយ​លទ្ធផល ២​ទល់​០ ក្រុម Transformer ចាញ់​ក្រុមយុវជន​ថ្នាល​អាយុ​ក្រោម​១៦​ឆ្នាំ ២​ទល់​០​។ ដោយឡែក​ប្រកួត​ក្នុង​កម្រិត​អាយុ​ក្រោម​២០​ឆ្នាំ ក្រុម​កីឡាករ​សហគម​ន៍​អាយុ​ក្រោម​១៩​ឆ្នាំ B បាន​ចាញ់​ក្រុម Bayon Empire FT ៨​ទល់​១ ហើយ​ក្រុមយុវជន​ថ្នាល​អាយុ​ក្រោម​១៨​ឆ្នាំ ឈ្នះ​ក្រុម​អាទិច្ចវង្ស​១៨ ទល់​០ ក្រុម King of Eagle ស្មើ​ជាមួយ ក្រុម​កីឡាករ​សហគម​ន៍​អាយុ​ក្រោម​១៩​ឆ្នាំ A ០​ទល់​០ និង​ក្រុម​ក្រុម​ជើងព្រៃ ចាញ់​ក្រុម PSE ៣​ទល់​១​។

ចំណែក​លក្ខខណ្ឌ​មួយចំនួន​ដែល​ក្រុម​ទាំងអស់​ ត្រូវ​បំពេញ​ដើម្បី​ចូលរួម​ក្នុង​ការប្រកួត​ពានរង្វាន់ Smart Youth League​ បាន​គឺ​មាន​ដូចជា​ក្រុម​ដែល​ចូលរួម​តម្រូវ​ឲ្យ​តម្កល់​ប្រាក់​ទៅតាម​កម្រិត​របស់​ខ្លួន​ដែល​ក្រុម​កីឡាករ​អាយុ​ក្រោម ១០​ឆ្នាំ និង​១២​ឆ្នាំ ត្រូវ​តម្កល់​៥០​ដុល្លារ​, ក្រុម​កីឡាករ​អាយុ​ក្រោម ១៤​ឆ្នាំ និង​នារី ត្រូវ​តម្កល់​៧០​ដុល្លារ​, ក្រុម​កីឡាករ​អាយុ​ក្រោម ១៧​ឆ្នាំ ត្រូវ​តម្កល់​១២០​ដុល្លារ និង​ក្រុម​កីឡាករ​អាយុ​ក្រោម ២០​ឆ្នាំ ត្រូវ​តម្កល់​២០០​ដុល្លារ។ សូម​បញ្ជាក់​ថា ប្រាក់​ទាំងអស់​នឹងត្រូវ​ប្រគល់​ជូន​ដល់​ក្រុម​ទាំងអស់​វិញ​ នៅ​ពេល​ដែល​ចប់​កម្មវិធី​ប្រកួត ឬ ក្រុម​ទាំងអស់​គោរព​ទៅតាម​បទបញ្ញត្តិ​នៃ​ការប្រកួត​បាន​ត្រឹមត្រូវ​៕

Source: Kampuchea Thmey Daily