ព្រៃវែង ៖ នៅព្រឹកថ្ងៃទី២៥ ខែមេសា ឆ្នាំ២០១៩ នាយកដ្ឋានព័ត៌មាន នៃក្រសួងកិច្ចការនារី សហការជាមួយមន្ទីរកិច្ចការនារីខេត្តព្រៃវែង និង មន្ទីរអប់រំយុវជន និងកីឡា បានរៀបចំវេទិកាយុវជនរួមគ្នាដើម្បីកាត់បន្ថយអំពើហិង្សា ក្រោមអធិបតីភាពលោកជំទាវ ប៊ុន ពុទ្ធី អនុរដ្ឋលេខាធិការ នៃក្រសួងកិច្ចការនារី ដែលប្រារព្ធធ្វើនៅវិទ្យាល័យ ហ៊ុន សែន កំពង់លាវ ក្រុងព្រៃវែង ដែលមាន សិស្សានុសិស្សចូលរួមប្រមាណ១៦០នាក់។
លោកជំទាវ ប៊ុន ពុទ្ធី អនុរដ្ឋលេខាធិការ នៃក្រសួងកិច្ចការនារី បានលើកឡើងថា វេទិកានេះ គឺមានសារៈសំខាន់ខ្លាំងណាស់ក្នុងការបញ្ជ្រាបចំណេះដឹងដល់យុវជនដែលជាទំពាំងស្នងឫស្សី ដើម្បីយល់ដឹងអំពីអំពើហិង្សាផលប៉ះពាល់ នៃអំពើហិង្សា ដែលកើតមានឡើងចំពោះបុរសទៅលើស្ត្រី ម្តាយទៅកូន ពីគ្រូទៅសិស្ស និងសិស្ស និងសិស្សដូចគ្នា ឬក៏អំពើហិង្សានៅក្នុងក្រុមគ្រួសារណាមួយនោះ។
លោកជំទាវបន្តថា ការចុះផ្សព្វផ្សាយអំពីបញ្ហាអំពើហិង្សានេះ គឺមានគោលបំណង បង្កើន និងបញ្ជ្រាប ការយល់ដឹងដល់យុវជន ធ្វើយ៉ាងណា រួមគ្នាកាត់បន្ថយអំពើហិង្សា នៅក្នុងប្រទេសកម្ពុជាយើងឲ្យបានជាដាច់ខាត។ និងដើម្បីឲ្យសិស្សានុសិស្សយល់ដឹង និងចេះដោះស្រាយនូវអំពើហិង្សានៅក្នុងក្រុមគ្រួសារ ឬចំពោះខ្លួន ដែលនឹងអាចកើតមានឡើង។ បើមានអំពើហិង្សានេះ កើតឡើងហើយនោះ គឺ ជះឥទ្ធិពលអាក្រក់យ៉ាងខ្លាំង អាចឈានទៅដល់ការបែកបាក់គ្រួសារ និងបាត់បង់អនាគតដល់កូនៗនោះផងដែរ។
លោកជំទាវ ក៏សូមអរគុណដល់សិស្សានុសិស្ស យុវជន ដែលបានចំណាយពេលវេលាសិក្សារៀនសូត្រ ដើម្បីមកទទួលយកនូវចំណេះដឹងទាក់ទងអំពីបញ្ហា នៃអំពើហិង្សានៅក្នុងថ្ងៃនេះផងដែរ៕
Source: Kampuchea Thmey Daily
0 Comments