ភ្នំពេញ ៖ លោក ពេជ្រ កែវមុនី អភិបាល នៃគណៈអភិបាលខណ្ឌមានជ័យ កាលពីថ្ងៃទី៧មេសានេះលោកបានអញ្ជើញសាកសួរសុខទុក្ខ និងជូនថវិកាដល់ លោក សេង សាញ់ ចៅសង្កាត់ស្ទឹងមានជ័យទី១ ដែលកំពុងមានជំងឺធ្ងន់ធ្ងរ និងកំពុងសម្រាកព្យាបាលនៅមន្ទីរពេទ្យកាល់ម៉ែត។
លោក ពេជ្រ កែវមុនី បានប្រសាសន៍ថា នៅព្រឹកថ្ងៃទី៧មេសានេះ លោកបានចុះសាកសួរសុខទុក្ខដល់នាំយកថវិកាផ្តល់ជូន លោក សេង សាញ់ ចៅសង្កាត់ស្ទឹងមានជ័យទី១ ដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត ដោយរោគបេះដូងធ្ងន់ធ្ងរ ប៉ុន្តែបានធូរស្រាលឡើងវិញ បន្ទាប់ពីមានការយកចិត្តទុកដាក់ព្យាបាលយ៉ាងចំណានរបស់លោកគ្រូពេទ្យ។
លោកអភិបាលខណ្ឌបានបញ្ជាក់ថា លោក សេង សាញ់ ត្រូវបានក្រុមគ្រួសារដឹកយកមកសង្គ្រោះនៅមន្ទីរពេទ្យកាល់ម៉ែត កាលពីយប់ថ្ងៃទី៤មេសាកន្លងទៅថ្មីៗនេះ។ ហើយមុនពេលដែល លោកចៅសង្កាត់មកសម្រាកនៅមន្ទីរ គឺលោកបានមកបំពេញការងារបម្រើប្រជាពលរដ្ឋជារៀងរាល់ថ្ងៃ។
ក្នុងឱកាសនោះដែរ លោក ពេជ្រ កែវមុនី បានមានប្រសាសន៍លើកកម្លាំងចិត្តដល់លោកចៅសង្កាត់ឲ្យលោកខិតខំប្រឹងប្រែងពិសាថ្នាំពេទ្យតាមការណែនាំរបស់គ្រូពេទ្យដើម្បីឲ្យឆាប់ធូរស្បើយ និងបានទៅបម្រើការងារជូនប្រជាពលរដ្ឋវិញ ព្រោះប្រជាពលរដ្ឋត្រូវការលោកចៅសង្កាត់ខ្លាំងណាស់។
គួរបញ្ជាក់ថា ជារៀងរាល់ថ្ងៃបន្ទាប់ពីបញ្ចប់ម៉ោងការងាររដ្ឋ គឺគេសង្កេតឃើញ លោក ពេជ្រ កែវមុនី អភិបាលខណ្ឌមានជ័យ តែចុះសាកសួរសុខទុក្ខ និងនាំយកអំណោយទៅផ្តល់ជូនប្រជាពលរដ្ឋ និងមន្ត្រីអាជ្ញាធរក្នុងមូលដ្ឋានខណ្ឌមានជ័យមិនដែលបានទំនេរឡើយ។
សកម្មភាពមនុស្សធម៌របស់លោកអភិបាលខណ្ឌមានជ័យ ធ្វើឲ្យមន្ត្រីមូលដ្ឋាន ក៏ដូចជាប្រជាពលរដ្ឋមានការពេញចិត្ត និងគាំទ្រយ៉ាងខ្លាំង ព្រោះពួកគាត់ចង់បានថ្នាក់ដឹកនាំមានសន្តានចិត្តល្អបែបនេះណាស់៕
Source: Kampuchea Thmey Daily
0 Comments