ភ្នំពេញ ៖ យុវជនសញ្ជាតិចិនហុងកុងម្នាក់ ត្រូវបានតុលាការកម្ពុជាកាត់ទោសកាលពីថ្ងៃទី២៥ ខែមេសា ឆ្នាំ២០១៩នេះ ពាក់ព័ន្ធករណីនាំចូលមកកម្ពុជានូវគ្រឿងញៀនទម្ងន់១៦,៥គីឡូក្រាម ពីប្រទេសអាល្លឺម៉ង់។ ជនត្រូវចោទ ឈ្មោះ Liu chun wa អាយុ២៥ឆ្នាំ ជនជាតិចិន រស់នៅកោះហុងកុង។
តុលាការសាលាដំបូងរាជធានីភ្នំពេញ បានចោទប្រកាន់ Liu chun wa ពីបទដឹកជញ្ជូន រក្សាទុក និងជួញដូរគ្រឿងញៀនតាមមាត្រា៤០ នៃច្បាប់ ស្ដីពីការត្រួតពិនិត្យគ្រឿងញៀនកម្ពុជា។
Liu chun wa ត្រូវបានសមត្ថកិច្ចក្រសួងមហាផ្ទៃកម្ពុជាចាប់ខ្លួន កាលពីថ្ងៃទី១៣ ខែកក្កដា ឆ្នាំ២០១៨ នៅស្ថានីយប្រៃសណីយ៍កម្ពុជា ខណៈជននេះ បានទៅទទួលយកកញ្ចប់បញ្ញើមួយមកពីប្រទេសអាល្លឺម៉ង់ដែលមានលេខកូដបញ្ជាក់ពីអត្តសញ្ញាណអ្នកមកទទួល។
ក្នុងកញ្ចប់បញ្ញើនោះ អាជ្ញាធរបានរកឃើញថ្នាំគ្រាប់សារធាតុញៀន ដល់ទៅ៥៥ភាគរយ នៃសារធាតុសុទ្ធដល់ទៅ ១៦,៥គីឡូក្រាម ដាក់បង្កប់ជាមួយនឹងចំណីសត្វ។ ក្នុងសវនាការ ជនជាប់ចោទបានបដិសេធចំពោះបទចោទប្រកាន់ពាក់ព័ន្ធនឹងគ្រឿងញៀននេះ។
ជនជាប់ចោទបាននិយាយថា នៅកោះហុងកុង ខ្លួនបានស្គាល់បុរសជនជាតិចិនម្នាក់ ឈ្មោះ ប៉ូ តាមរយៈសង្សារខ្លួន។ ក្រោយមក ឈ្មោះ ប៉ូ បានឲ្យខ្លួនមកប្រទេសកម្ពុជា ដើម្បីទទួលយកកញ្ចប់បញ្ញើមួយដែលមានលេខកូដផ្ញើមកពីប្រទេសអាល្លឺម៉ង់។
លុះដល់ថ្ងៃទី១៣ ខែកក្កដា ឆ្នាំ២០១៨ ខ្លួនគេក៏បានទៅប្រៃសណីយ៍ដើម្បីទទួលអីវ៉ាន់ ក៏ត្រូវសមត្ថកិច្ចកម្ពុជាចាប់ខ្លួនតែម្ដង។ រហូតដល់ថ្ងៃទី១៨ ខែកក្កដា ឆ្នាំ២០១៨ តុលាការ បានឃុំខ្លួនគេមកដល់ពេលកាត់ទោសនេះ។
លោក ពេជ្រ វិជ្ជាធរ ប្រធានក្រុមប្រឹក្សាជំនុំជម្រះបានសម្រេច លើកពេលទៅប្រកាសសាលក្រមរឿងក្ដីនេះនៅថ្ងៃទី១០ ខែឧសភា ឆ្នាំ២០១៩ខាងមុខ៕
Source: Kampuchea Thmey Daily
0 Comments