ភ្នំពេញ ៖ ថ្មីៗនេះក្រោយពី ប្រជាពលរដ្ឋបានរាយការណ៍ដល់សមត្ថកិច្ចអាវុធហត្ថរាជធានីថា នៅម្តុំផ្លូវណប្រ៊ីដ ឧស្សាហ៍កើតមានករណីចោរឆក់ជាញឹកញាប់ រួចមកកម្លាំងអាវុធហត្ថរាជធានីភ្នំពេញ ក៏បានបង្កើនសកម្មភាពល្បាតពូនឆ្មក់ ដោយកម្លាំងស៊ីវិលជាប្រចាំ រហូតបានប្រទះហេតុការណ៍ជាក់ស្តែង ដោយជនសង្ស័យមួយក្រុម បានធ្វើសកម្មភាពឆក់ទូរស័ព្ទដៃ ពីបុរសម្នាក់កំពុងជិះម៉ូតូតាមដងផ្លូវ បានសម្រេចតែក៏ត្រូវកម្លាំងល្បាតរបស់អាវុធដេញបង្ក្រាបបានភ្លាមៗវិញចាប់បាន២នាក់ក្នុងចំណោម៤នាក់។
ហេតុការណ៍នោះ កើតឡើងនៅចំណុចមុខវិទ្យាល័យបុរី១០០ខ្នង ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ វេលាម៉ោងប្រមាណ ២២និង០៥នាទីយប់ថ្ងៃទី ២១ ខែមេសា ឆ្នាំ២០១៩។
មន្ត្រីអាវុធហត្ថរាជធានីបានបញ្ជាក់ថា ក្រុមជនសង្ស័យដែលធ្វើសកម្មភាពឆក់ទូរស័ព្ទពីអ្នកដំណើរនោះមានគ្នា០៤នាក់ ជិះម៉ូតូ០២គ្រឿង ដោយ០២នាក់ធ្វើសកម្មភាពឆក់ និង ០២នាក់ទៀតជិះម៉ូតូបិទគូថពីក្រោយ។ ប៉ុន្តែក្រោយធ្វើសកម្មភាពភ្លាមក៏ ត្រូវបានកម្លាំងល្បាតសម្ងាត់របស់អាវុធហត្ថរាជធានីភ្នំពេញ ដែលបន្លំជាជនស៊ីវិល ពូនឆ្មក់ក្តាប់សភាពការណ៍ បានប្រទះឃើញ ក៏ធ្វើការប្រដេញរហូតកៀរម៉ូតូចោរដួលនិងរត់ចុះទឹក ប្រឡាយចាប់បាន០២នាក់ និង០២នាក់ទៀត បត់ម៉ូតូត្រឡប់ក្រោយរត់គេចខ្លួននៅម្តុំផ្លូវណតប្រីតជិតផ្លូវវេងស្រេង។
ប្រភពបន្តថា ក្រុមនេះជាក្រុមឆក់ទ្រព្យសម្បត្តិអ្នកដំណើរដ៏សកម្មនៅភ្នំពេញទើបពេលនេះត្រូវបានបង្ក្រាបជាក់ស្ដែងដោយដកហូតបានទូរស័ព្ទដៃមួយគ្រឿងដែលទើបឆក់បានពីជនរងគ្រោះរួមនឹងម៉ូតូធ្វើសកម្មភាពផងដែរ។ ដោយឡែកបក្ខពួកដែលរត់គេចខ្លួនរួចនោះកម្លាំងអាវុធហត្ថកំពុងតាមប្រមាញ់បន្តទៀត៕
Source: Kampuchea Thmey Daily
0 Comments