អូស្ត្រាលី​ បើកចំហ​ដើម្បី​ឲ្យ​កូនកំព្រា​របស់​យុទ្ធជន​ក្រុម​រដ្ឋ​ឥស្លាម​វិល​ត្រលប់​មកវិញ

លោកនាយក​រដ្ឋមន្ត្រី Scott Morrison បាន​និយាយ​នៅ​ថ្ងៃ​សុក្រ​ថា លោក​បើកចំហ​ដើម្បី​អនុញ្ញាត​ឲ្យ​មាន​ការវិល​ត្រ​លប់នៃ​កូនកំព្រា​របស់​ជន​ជ្រុលនិយម​សញ្ជាតិ​អូស្ត្រាលី​ម្នាក់​នៅ​ក្នុង​ជំរំ​ជនភៀសខ្លួន​ស៊ី​រី​បន្ទាប់ពី​ការ​សុំ​ជំនួយ​របស់​ពួកគេ។

លោក Morrison បាន​និយាយថា រដ្ឋាភិបាល​របស់លោក​កំពុងធ្វើការ​ជាមួយ​កាកបាទក្រហម​ដូច្នេះ​កុមារ​អាច​ចាក​ចេញពី​ជំរំ Al-Hol នៅ​ភាគ​ឦសាន​ប្រទេស​ស៊ី​រី​បាន​ហើយ​មន្ត្រី​អូស្ត្រាលី​អាច​វាយតម្លៃ​ពួកគេ​បាន​។​

លោក Morrison បាន​ប្រាប់​ក្រុម​អ្នកយកព័ត៌មាន​នៅ​ទីក្រុង​កង់​បេ​រ៉ា​ថា “​កន្លែង​ដែល​ពួកគេ​អាច​នឹង​វិល​ត្រលប់​មកវិញ​បាន​គឺ​ប្រទេស​អូស្ត្រាលី​។ យើង​នឹង​សហការ​ជាមួយ​ដំណើរការ​នោះ​”​។​

លោក​បន្តថា “​ប្រជាជន​អូស្ត្រាលី​ដែល​ជាប់​ក្នុង​ស្ថានភាព​នេះ​ជាពិសេស​កុមារ​ដែល​គ្មាន​កំហុស​, យើង​នឹង​ធ្វើ​អ្វី​ដែល​ខ្ញុំ​គិត​ថា ជនជាតិ​អូស្ត្រាលី​នឹង​រំពឹង​លើ​យើង​ឲ្យ​ធ្វើ​អ្វី​ជំនួស​ពួកគេ​”​។​

លោកនាយក​រដ្ឋមន្ត្រី​បាន​បន្ថែម​ថា លោក​នឹង​មិន​ដាក់​ជីវិត​របស់​ជនជាតិ​អូស្ត្រាលី​ណាមួយ​ស្ថិតក្នុង​គ្រោះថ្នាក់​ឡើយ​ដើម្បី​ដក​អ្នកដទៃ​ចេញពី​តំបន់​ជម្លោះ​ទាំងនេះ​។ នេះ​ជា​ជំហរ​មួយ​ដែល​លោក​បានធ្វើ​ក្នុង​រយៈពេល​ប៉ុន្មាន​សប្តាហ៍​ថ្មីៗ​នេះ​។​

ការអត្ថាធិប្បាយ​របស់​លោក Morrison បាន​កើតឡើង​ខណៈដែល​នាង Hoda Sharrouf ដែលជា​កូនស្រី​អាយុ​១៦​ឆ្នាំ​របស់​អ្នក​ប្រយុទ្ធ​ក្រុម​រដ្ឋ​ឥស្លាម​សញ្ជាតិ​អូស្ត្រាលី​ឈ្មោះ Khaled Sharrouf បាន​និយាយថា នាង​មានការ​ព្រួយបារម្ភ​អំពី​សុខភាព​របស់​បងប្អូន​បង្កើត​របស់​នាង​រួមទាំង​បងស្រី​ឈ្មោះ Zaynab អាយុ​១៧​ឆ្នាំ​ផង​ដែរ​ ដែល​មាន​ផ្ទៃពោះ​ប្រាំពីរ​ខែ​និង​ឈឺ​ធ្ងន់​។​

ជោគវាសនា​នៃ​យុទ្ធជន​បរទេស​និង​ក្រុមគ្រួសារ​របស់​ពួកគេ​បាន​ក្លាយជា​បញ្ហា​ដ៏​សំខាន់​មួយ​សម្រាប់​រដ្ឋាភិបាល​នានា​នៅពេល​ជម្លោះ​ប្រឆាំង​ក្រុម IS ត្រូវបាន​បញ្ចប់​។ ជនបរទេស​នៅ​ជំរំ​នេះ​គឺមាន​ចំនួន​ពី​៣០​ទៅ​៤០​ប្រទេស​។​

កាកបាទក្រហម​បាន​និយាយ​កាលពី​ថ្ងៃ​ពុធ​ថា ខ្លួន​ចង់​ឲ្យ​កូនៗ​រាប់​រយ​នាក់​របស់​យុទ្ធជន​បរទេស​ដែល​កំពុង​រស់នៅក្នុង​ជំរំ​នេះ ​ត្រូវ​បាន​អនុញ្ញាត​ឲ្យ​វិល​ត្រលប់​ទៅផ្ទះ​វិញ​៕ AFP

​

Source: Kampuchea Thmey Daily