ភ្នំពេញ ៖ កម្ពុជាបានប្តេជ្ញាបន្តសហការជាមួយអង្គការអន្តរជាតិខាងការងារដែលហៅកាត់ថាអាយឡូឲ្យកាន់តែជិតស្និទ្ធថែមទៀតដើម្បីធានានិងលើកម្ពស់សិទ្ធិនិងលក្ខខណ្ឌការងារដល់កម្មករនិយោជិតឲ្យកាន់តែប្រសើរឡើង។
លោក បណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានមានប្រសាសន៍ថា កម្ពុជានឹងបន្តអនុវត្តយ៉ាងហ្មតចត់នូវបណ្ដាអនុសញ្ញានានាដែលបានផ្ដល់សច្ចាប័នជាមួយអង្គការអាយឡូ ពិសេសអនុសញ្ញាស្នូលទាំង៨ប្រកបដោយតម្លាភាពពេញលេញ គ្មានការរើសអើងដោយឈរលើគោលការណ៍នីតិរដ្ឋដើម្បីឈានឆ្ពោះទៅរកភាពជោគជ័យក្នុងការអនុវត្តគោលដៅអភិវឌ្ឍប្រកបដោយចីរភាពរបស់អង្គការសហប្រជាជាតិ ពិសេសគោលដៅអភិវឌ្ឍទី៨។
ថ្លែងនៅក្នុងឱកាសចូលរួមកិច្ចប្រជុំជាន់ខ្ពស់នៃមហាសន្និបាតអង្គការសហប្រជាជាតិដើម្បីប្រារព្ធខួប១០០ឆ្នាំ នៃការបង្កើតអង្គការអាយឡូ (១៩១៩-២០១៩)នៅបូរីញូយ៉កសហរដ្ឋអាមេរិកកាលពីថ្ងៃទី១០មេសាកន្លងទៅនេះលោក រដ្ឋមន្ត្រីបានបន្តថា ជាក់ស្ដែងកាលពីថ្ងៃទី២៨ ខែមីនា កន្លងទៅថ្មីៗនេះ កម្ពុជាបានចុះអនុស្សរណៈជាមួយអង្គការ អាយឡូO និងដៃគូត្រីភាគីផ្សេងទៀតក្នុងការអនុវត្តកម្មវិធីការងារសមរម្យ សម្រាប់ឆ្នាំ២០១៩-២០២៣ដើម្បី បន្តអភិវឌ្ឍមុខរបរ និងការងារ និងសហគ្រាសឲ្យស្របតាមការវិវត្តន៍សង្គម និងបច្ចេកវិទ្យា ពង្រឹង និងពង្រីកកិច្ចគាំការសង្គមដល់ស្ត្រី យុវជន និងក្រុមជនងាយរងគ្រោះនិងធ្វើឲ្យប្រសើរឡើងនូវទំនាក់ទំនងវិជ្ជាជីវៈ និងសិទ្ធិការងារ ស្របតាមបទដ្ឋានអន្តរជាតិខាងការងារ ដោយរួមទាំងពលករទេសន្តប្រវេសន៍ផងដែរ។
លោករដ្ឋមន្ត្រីបានបន្តទៀតថា ទន្ទឹមនឹងនេះកម្ពុជាក៏បានគាំទ្រគំនិតផ្ដួចផ្ដើមអនាគតនៃការងាររបស់អង្គការអាយគូដើម្បីត្រៀមដោះស្រាយបញ្ហាប្រឈមនានាពិសេស ការផ្លាស់ប្ដូរជំនាញ ដែលកើតមានឡើងពីការវិវត្តនៃបច្ចេកវិទ្យាក្នុងបរិបទថ្មីនៃបដិវត្តឧស្សាហកម្មបួនចុចសូន្យ។
កម្ពុជាចូលជាសមាជិកអង្គការអន្តរជាតិខាងការងារនៅថ្ងៃទី២៤ ខែកុម្ភៈ ឆ្នាំ១៩៦៩ហើយក្នុងរយៈពេល ៥០ឆ្នាំមកនេះ កម្ពុជាបានផ្តល់សច្ចាប័នអនុសញ្ញាអន្តរជាតិខាងការងារចំនួន១៣ ក្នុងនោះមានអនុសញ្ញាស្នូលចំនួន៨ ដែលបានជួយលើកកម្ពស់សិទ្ធនិងលក្ខខណ្ឌការងារព្រមទាំងការងារសមរម្យសម្រាប់ស្ត្រី និងបុរស។
គួរបញ្ជាក់ថា បច្ចុប្បន្ននេះ រាជរដ្ឋាភិបាលបានបង្កើតការងារធ្វើជូនប្រជាពលរដ្ឋក្នុងអត្រា៩៩,៣% នៃកម្លាំងពលកម្មសរុបប្រមាណ ១០ លាននាក់ រួមមានកម្មករនិយោជិតសេដ្ឋកិច្ចក្នុងប្រព័ន្ធជិត ១ លាន ៥ សែននាក់ កម្មករនិយោជិតសេដ្ឋកិច្ចក្រៅប្រព័ន្ធជិត ២ លាន ៤ សែននាក់ វិស័យកសិកម្មប្រមាណ ជាង ៤ លាននាក់ ពលករធ្វើការនៅក្រៅប្រទេសប្រមាណ ១ លាន ២ សែននាក់ និងមន្ត្រីសាធារណៈប្រមាណជាង៥សែននាក់៕
Source: Kampuchea Thmey Daily
0 Comments