គណបក្ស​សង្គមនិយម​កំពុងកាន់​អំណាច​របស់​អេ​ស្ប៉ា​ញ​ឈ្នះ​ការបោះឆ្នោត

គណបក្ស​សង្គមនិយម​របស់​នាយករដ្ឋមន្ត្រី​អេ​ស្ប៉ា​ញ​លោក Pedro Sanchez បានឈ្នះ​ការបោះឆ្នោត​កាលពី​ថ្ងៃអាទិត្យ​ដោយ​គ្មាន​សំឡេង​ភាគច្រើន​នៅក្នុង​ទិដ្ឋភាព​នយោបាយ​ដែល​បែកបាក់​មួយ​ដោយសារតែ​ការចូល​ក្នុង​សភា​របស់​គណបក្ស​ស្តាំនិយម​។​

លទ្ធផល​នេះ​បាន​បង្កើន​ភាពវឹកវរ​នៃ​អស្ថិរភាព​មួយ​ផ្សេងទៀត​សម្រាប់​ប្រទេស​អេ​ស្ប៉ា​ញ​ដោយ​លោក Sanchez ត្រូវ​ពឹង​ផ្អែកលើ​សម្ព័ន្ធភាព​ជាមួយ​គូប្រជែង​នៅក្នុង​បរិយាកាស​មួយ​ដែល​បាន​អួរ​អាប់​ចាប់តាំងពី​ការប៉ុនប៉ង​អបគមន៍​បរាជ័យ​រប​ស់​តំបន់​កាតា​ឡាន​ក្នុង​ឆ្នាំ​២០១៧​។​

គណបក្ស​សង្គមនិយម (PSOE) របស់លោក Sanchez បានទទួល​សមាជិកសភា​ចំនួន​១២៣​រូប​ក្នុងចំណោម​៣៥០​រូប​ឬ​ស្មើនឹង​ជិត​២៩​ភាគរយ​នៃ​សន្លឹកឆ្នោត​ពោលគឺ​តិចជាង​សំឡេង​ភាគច្រើន​ដាច់ខាត​ប៉ុន្ដែ​ប្រសើរ​ជាង​អាសនៈ​៨៥​ដែល​ខ្លួន​ទទួលបាន​ក្នុង​ឆ្នាំ​២០១៦​។​

លោក​បាន​ប្រាប់​ក្រុម​អ្នកគាំទ្រ​ពី​យ៉រ​នៃ​ទីស្នាក់ការ​កណ្តាល​របស់​គណបក្ស​ក្នុង​ទីក្រុង​ម៉ា​ឌ្រី​ដ​កាលពី​ល្ងាច​ថ្ងៃអាទិត្យ​ថា “​គណបក្ស​សង្គមនិយម​បានឈ្នះ​ការបោះឆ្នោត​ទូទៅ​ហើយ​នៅពេលនោះ អនាគត​បានឈ្នះ​ហើយ​អតីតកាល​បាន​បាត់បង់​”​។​

អ្នកចាញ់​ដ៏​ធំ​គឺ​គណបក្ស​អភិរក្សនិយម Popular Party (PP) ដែល​ទទួលបាន​អាសនៈ​៦៦​បើ​ប្រៀបធៀប​នឹង​អាសនៈ​ចំនួន​១៣៧​នៅក្នុង​ការបោះឆ្នោត​លើក​មុន​ដែល​ធ្វើ​ឲ្យ​ខ្លួន​គ្រប់គ្រង​ប្រទេស​អេ​ស្ប៉ា​ញ​ជាមួយ​រដ្ឋាភិបាល​សំឡេង​ភាគតិច​។​

លោក Sanchez ដែល​បាន​ឡើងកាន់​អំណាច​កាលពី​ខែមិថុនា​បន្ទាប់ពី​ការទម្លាក់​នាយករដ្ឋមន្ត្រី​អភិរក្ស​លោក Mariano Rajoy នៅក្នុង​ការបោះឆ្នោត​សម្តែង​ការមិនទុកចិត្ត​គឺអាច​នឹង​ស្វែងរក​ការ​ចងសម្ព័ន្ធភាព​ជាមួយ​គណបក្ស Podemos និង​ក្រុម​តូចៗ​ដូចជា​គណបក្ស​បំបែក​ខ្លួន​កាតា​ឡាន​ជាដើម​ដូចដែល​លោក​បានធ្វើ​កាលពី​១០​ខែ​មុន​។​

លោក​ក៏​អាច​ព្យាយាម​ចងសម្ព័ន្ធ​ជាមួយ​គណបក្ស Ciudadanos ផងដែរ​ដែល​ទទួលបាន​៥៧​អាសនៈ​។ ជាមួយគ្នា ពួកគេ​នឹង​បង្កើតបាន​សំឡេង​ភាគច្រើន​ដាច់ខាត​ប៉ុន្តែ​អ្នកបោះឆ្នោត​មកពី​គណបក្ស​ទាំងពីរ​ទំនងជា​នឹង​ខឹងសម្បា​ចំពោះ​ទង្វើ​បែបនេះ​៕ AFP

​

Source: Kampuchea Thmey Daily