ភ្នំពេញ ៖ ខណៈរាជរដ្ឋាភិបាលអាណត្តិទី៦ ដែលមានប្រមុខរដ្ឋាភិបាល សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រកាសជារឿយៗ ថានឹងធ្វើការកំណែទម្រង់ស៊ីជម្រៅលើគ្រប់វិស័យ តាំងពីអាណត្តិទី៥មក ដោយមិនមានការយល់យោគ ឬលើកលែងដល់មន្ត្រីថ្នាក់ណានោះទេ ឲ្យតែប្រព្រឹត្តប្រាសចាកច្បាប់ ឬប្រព្រឹត្តអំពើពុករលួយ នឹងចាប់មកដាក់ទោសទណ្ឌ មិនទុកឲ្យក្រុមមន្ត្រីខិលខូចទាំងនោះរាំងខ្ទប់ ដល់ដំណើរការអភិវឌ្ឍន៍ប្រទេសជាតិឡើយ ប៉ុន្តែបើទោះបីយ៉ាងនេះក្តីក៏មន្ត្រីមួយក្តាប់តូចនៅតែធ្វើសកម្មភាពរាំងខ្ទប់ដល់ដំណើរការកសាងអភិវឌ្ឍន៍ប្រទេសជាតិប្រឆាំងនឹងប្រសាសន៍របស់ប្រមុខដឹកនាំដដែល។
ជាក់ស្តែង ថ្មីៗនេះ មានមន្ត្រីដែលបម្រើការនៅមន្ទីរសាធារណការ និងដឹកជញ្ជូនខេត្តកណ្តាល បានខ្សឹបប្រាប់ភ្នាក់ងារកាសែតកម្ពុជាថ្មីថា សកម្មភាពប្រព្រឹត្ត អំពើខុសឆ្គងនឹងអនុក្រឹត្យរបស់រាជរដ្ឋាភិបាល និងប្រកាសរបស់ក្រសួងសាធារណការ និងដឹកជញ្ជូន គឺកំពុងតែប្រព្រឹត្តអំពើពុករលួយដល់ឆ្អឹងហើយ អ្នកដែលបង្កធ្វើព្យុះភ្លៀងនោះ ត្រូវបានគេស្គាល់ឈ្មោះយ៉ាងច្បាស់ គឺ លោក ជួរ ឈនឡេង មានមុខងារជាអនុប្រធាន មន្ទីរសាធារណការ និងដឹកជញ្ជូនខេត្តកណ្តាលតែម្តង និងជាប្រធានស្ថានីយជញ្ជីងនៅផ្លូវជាតិលេខ៣ចំណុចភូមិកំពង់ទួលស្រុកកណ្តាលស្ទឹងខេត្តកណ្តាល និងលោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្តាល ដែលអ្នកទាំង២នាក់នេះ១ខែៗកើបលុយរាប់ម៉ឺនដុល្លារ ហើយការដែលគេហ៊ានប្រព្រឹត្តបែបនេះ ព្រោះមានភ្លើងខៀវពីប្រធានគណៈកម្មការត្រួតពិនិត្យយានយន្តដឹកលើសទម្ងន់កំណត់។
ប្រភពបានបន្តថា នៅពេលគេទូទាត់លុយម្តងៗ គេបានឃុបឃិតស៊ីលុយជាលក្ខណៈប្រព័ន្ធតែម្តង ហើយ លោក ជួរ ឈនឡេង នេះ បានបញ្ចេញអំនួតអួតក្អេងក្អាង ជាមួយអ្នកផឹកស៊ីរួមតុខ្លួនថា ខ្លួនជាមនុស្សមានវាសនាខ្ពស់ ធ្វើការចំកន្លែងខ្លាញ់ មិនហត់ទេ តែរកចំណូល១ខែៗបានរាប់លានរៀល ហើយសព្វថ្ងៃនេះ ខ្លួនគោរពកោតខ្លាចតែ លោក ចៅហ្វាយខេត្ត និងប្រធានរបស់ខ្លួនតែប៉ុណ្ណោះ ព្រោះគាត់ទាំងពីរនាក់ជាខ្នងបង្អែកយ៉ាងរឹងមាំរបស់ខ្លួន ក្រៅពីនោះមិនព្រឺរោម ឬចាវអ្នកណាឡើយ ។
ប្រភពបានរៀបរាប់បន្តថា ស្ថានីយថ្លឹងរថយន្តនៅកំពង់ទួលផ្លូវជាតិលេខ៣ ដែលក្រោមការគ្រប់គ្រងរបស់មន្ទីរសាធារណការ និងដឹកជញ្ជូនខេត្តកណ្តាល ដែលបង្កើតឡើងអស់រយៈពេលជាច្រើនឆ្នាំនោះ គឺមិនមែនធ្វើសកម្មភាពថ្លឹងរថយន្តដែលដឹកលើសទម្ងន់ដើម្បីទប់ស្កាត់ការបំផ្លិចបំផ្លាញហេដ្ឋារចនាសម្ព័ន្ធផ្លូវថ្នល់ ស្របតាមអនុក្រឹតរបស់រាជរដ្ឋាភិបាលដែលកំណត់ឲ្យក្រសួងសាធារណការ និងដឹកជញ្ជូនត្រួតពិនិត្យយានយន្តដឹកលើសទម្ងន់នោះទេ តែជាជញ្ជីងថ្លឹងលុយច្រកបាវសម្រាប់បក្ខពួកមួយក្តាប់តូចទៅវិញ។
អាជីវកររកស៊ីដឹកជញ្ជូនទំនិញតាតរថយន្តធុនធំបានត្អូញត្អែរថា ស្ថានីយថ្លឹងរថយន្តកំពង់ទួលនេះ បានបង្កផលលំបាកយ៉ាងខ្លាំង កៀបសង្កត់អ្នករកស៊ីឲ្យបង់លុយច្រើនៗ បើទោះបីរថយន្តនោះដឹកទំនិញមិនលើសទម្ងន់ដែលបានកំណត់ក៏ដោយ ក៏ក្រុមកាន់កាប់ជញ្ជីងគេរកលេសតម្រូវឲ្យបង់លុយដែរ ព្រោះគេអះអាងថា ថ្លឹងខាត ហើយចំណែករថយន្តដែលដឹកលើសទម្ងន់ ក៏មិនថ្លឹងដែរ ឲ្យតែបង់លុយឲ្យគេជាការស្រេច។
មានមតិមហាជនមួយដែលដឹងរឿងនេះបានធ្វើការរិះគន់ចំៗទៅលើ លោក ជួរ ឈនឡេង និងបក្ខពួកគឺជាអ្នកឃុបឃិតឲ្យឈ្មួញ ប្រើប្រាស់រថយន្តធំៗដឹកទំនិញលើស ចំណុះឆ្លង កាត់ផ្លូវជាតិលេខ៣យ៉ាង អនាធិបតេយ្យ ដោយគ្មានវិធានការទប់ស្កាត់អ្វីទាំងអស់។ ផ្ទុយទៅវិញគេបែរជាគាបសង្កត់ប្រជាពលរដ្ឋ និងអាជីវករ ដែលដឹកជញ្ជូនទំនិញតិចតួចតាម រថយន្តដោយតម្រូវឲ្យបង់លុយថ្លៃក្បាលរថយន្តដោយមិនចាំបាច់ត្រួតពិនិត្យអ្វីទាំងអស់។ ទាក់ទង់ករណីនេះ លោក ជួរ ឈនឡេង បាននិយាយប្រាប់គេឯងថា ចង់គេនិយាយអីក៏និយាយចុះ ស្រេចតែចិត្ត លោកបានផាកពិន័យលើរថយន្តជាង២០គ្រឿងហើយ និងថ្នាក់ដឹកនាំបានសរសើរលោកណាស់។
អាជីវករសំណូមពរចំពោះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និង លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មេត្តាចុះត្រួតពិនិត្យយានយន្តដឹកលើសទម្ងន់នោះផង បើមិនដូចច្នេះទេ ច្បាស់ជាបាត់ចំណូលរដ្ឋមួយឆ្នាំៗរាប់រយលានរៀលមិនខាន។
ទាក់ទិននឹងការចោទប្រកាន់ខាងលើ កម្ពុជាថ្មីព្យាយាមសុំការបំភ្លឺពីលោកប្រធាន និងអនុប្រធាន មន្ទីរសាធារណការខេត្តកណ្តាលដែរ តែមិនអាចទំនាក់ទំនងបានទេ៕
Source: Kampuchea Thmey Daily
0 Comments