សហព័ន្ធកីឡាប្រដាល់គុនខ្មែរ បានរៀបចំពិធីសូត្រមន្តសុំសេចក្តីសុខសិរីសួស្ដី ដល់មហាគ្រួសារសហព័ន្ធកីឡាប្រដាល់គុនខ្មែរ ក្នុងឱកាសដែលពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំកុរ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៩ខាងមុខនេះ នាទីស្នាក់ការសហព័ន្ធ ក្នុងពហុកីឡដ្ឋានជាតិ កាលពីរសៀលថ្ងៃទី៨ ខែមេសា ឆ្នាំ២០១៩។
លោកឧត្ដមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ព្រមទាំងសមាជិកប្រតិបត្តិសហព័ន្ធកីឡាប្រដាល់គុនខ្មែរជាច្រើននាក់ បានចូលរួមក្នុងពិធីនេះ។ លោកប្រធានសហព័ន្ធ បានបញ្ជាក់ឲ្យដឹងថា នេះជាពិធីសាសនាមួយ ដែលសហព័ន្ធតែងតែធ្វើជារៀងរាល់ឆ្នាំ ដើម្បីទទួលបាននូវសិរីសួស្ដីជោគជ័យឆ្នាំថ្មី។
ទោះបីក្នុងការគិត ឬការផ្សងរបស់មនុស្សម្នាក់ៗ តាមរយៈពិធីសាសនាមួយនេះ មិនដូចគ្នាក៏ពិតមែនតែក្នុងឋានៈដែលលោកជាប្រធានសហព័ន្ធ លោកសូមបន់ស្រន់ឲ្យទេវតាឆ្នាំថ្មីជួយតម្រែតម្រង់ដល់មន្ត្រីបច្ចេកទេសរបស់លោកឲ្យបំពេញការងារដោយយុត្តិធម៌ ប្រកបដោយវិជ្ជាជីវៈ។
លោកទទួលស្គាល់ថា សហព័ន្ធប្រដាល់គុនខ្មែរដែលរឹងមាំមកដល់ពេលនេះ គឺដោយសារកម្លាំងមហាសាមគ្គីរបស់សមាជិកប្រតិបត្តិ គ្រូបង្វឹក មន្ត្រីបច្ចេកទេស កីឡាករ សមាគម និង ក្លិប។
សហព័ន្ធបានបង្កើតឲ្យមានការប្រកួតជាច្រើន ដើម្បីជួយផ្លាស់ប្ដូរជីវភាពអ្នកប្រដាល់ គ្រូបង្វឹក មន្ត្រីបច្ចេកទេស។
លោកបញ្ជាក់ថា មានការប្រកួតគឺមានការងារធ្វើ ចូលរួមការងារគឺបានទទួលការឧបត្ថម្ភទោះបីពេលខ្លះ រាល់ការឧបត្ថម្ភវាមិនទាន់បានតាមសេចក្ដីប្រាថ្នាក៏ពិតមែន តែវាក៏ជួយបន្ធូរបន្ទុកជីវភាពបានខ្លះៗដែរ។ សូមទាំងអស់គ្នាបន្តធ្វើការងារជាមួយគ្នាក្រោមឆ័ត្រ នៃគ្រួសារប្រដាល់គុនខ្មែរ។
ពិធីសូត្រមន្តចម្រើនព្រះបរិត្តនេះ រៀបចំឡើងតាមទំនៀមទម្លាប់ព្រះពុទ្ធសាសនា ដើម្បីឧទ្ទិសកុសលផលបុណ្យជូនចំពោះដួងវិញ្ញាណក្ខន្ធ បុព្វការីជន ជីដូនជីតា ឪពុកម្ដាយ និងញាតិការទាំង៧សន្តាន ព្រមទាំងអតីតកីឡាករ កីឡាការិនី ដែលបានចែកឋានទៅកាន់បរលោកខាងមុខ សូមរំដោះរួចចាកផុតពីកម្មពារ វេរាទាំងឡាយ និងបានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ។
ម្យ៉ាងវិញទៀតពិធីនេះ ក៏បានឧទ្ទិសបួងសួងដល់គុណបុណ្យព្រះរតនត្រ័យ ព្រះពុទ្ធ ព្រះធម៌ ព្រះសង្ឃ ជាពិសេសទេវតាឆ្នាំថ្មី ដែលនឹងយាងមកគ្រប់គ្រងថែរក្សាទឹកដី នៃព្រះរាជាណាចក្រកម្ពុជា នៅពេលឆាប់ៗខាងមុខនេះ សូមប្រោះព្រំប្រសិទ្ធិពរជ័យ បវរសួស្ដី មហាប្រសើរ និងបរមសុខគ្រប់ប្រការដល់ថ្នាក់ដឹកនាំ និង មន្ត្រីសហព័ន្ធកីឡាប្រដាល់គុនខ្មែរទាំងអស់។
ជាមួយនឹងពិធីសូត្រមន្តចម្រើនព្រះបរិត្តនេះ សហព័ន្ធកីឡាប្រដាល់គុនខ្មែរ នៅបានរៀបចំពិធីជួបជុំពិសាអាហារសាមគ្គី ព្រមទាំងមានការផ្តល់អំណោយឧបត្ថម្ភដល់ព្រឹទ្ធាចារ្យកីឡាផងដែរ៕
Source: Kampuchea Thmey Daily
0 Comments