សៀមរាប ៖ មន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាប បន្តចុះអនុវត្តន៍វិធានការណ៍ជីវសុវត្ថិភាពតាមបណ្ដាទីសត្តឃាតនានា និងតាមដងផ្លូវក្នុងខេត្តសៀមរាប ដើម្បីទប់ស្កាត់ការរីករាលដាលនៃជំងឺឆ្លងសត្វគ្រប់ប្រភេទ និងធានាបានសុខសុវត្ថិភាពទាំងមនុស្ស និងសត្វ ហើយក្នុងនោះក៏ដើម្បីទប់ស្កាត់ជំងឺប៉េស្តអាហ្វ្រិក ASFកំពុងឆ្លងមកកម្ពុជាក្នុងខេត្តរតនគិរីជាប់ព្រំប្រទល់នឹងប្រទេសវៀតណាម។
លោក យឿន សែ មន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្តសៀមរាបបាន បានឲ្យដឹងកាលពីរសៀលថ្ងៃទី៨ ខែមេសា ឆ្នាំ២០១៩នេះថា ក្រុមការងារតែងតែចុះអនុវត្តន៍វិធានការណ៍ជីវសុវត្ថិភាពតាមបណ្តាទីសត្តឃាតនានា និងតាមដងផ្លូវក្នុងខេត្តសៀមរាប ដើម្បីទប់ស្កាត់ការរីករាលដាលនៃជំងឺឆ្លងសត្វគ្រប់ប្រភេទ និងធានាបានសុខសុវត្ថិភាពទាំងមនុស្ស និងសត្វ។
យោងតាមប្រកាសលេខ ១៧៣ ប្រក កសក ចុះថ្ងៃទី០២ មេសាឆ្នាំ ២០១៩ របស់ក្រសួងកសិកម្មរុក្ខាប្រមាញ់ និងនេសាទ ស្តីពីការកំណត់តំបន់ផ្ទុះជំងឺប៉េស្តជ្រូកអាហ្វ្រិក មន្ត្រីបច្ចេកទេសនៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយខេត្តចុះអនុវត្តការងារបច្ចេកទេសនៅតំបន់ផ្ទុះជំងឺ។ សម្លាប់សត្វឈឺ សត្វងាប់ដោយជំងឺ ដុតកម្ទេចចោល។ ហាមមិនឲ្យទិញ លក់ ពិឃាតសត្វឈឺ។ ហាមនាំសត្វចេញ ឆ្លងកាត់តំបន់ផ្ទុះជំងឺក្នុងរង្វង់២គីឡូម៉ែត្រ។ វិធានការបន្ត ផ្សព្វផ្សាយដល់អ្នកចិញ្ចឹមជ្រូក ហាមនាំកាកសំណល់ផ្ទះបាយមកធ្វើជាចំណីជ្រូក ហាមនាំសាច់ជ្រូកពីកន្លែងផ្សេងមកហូបកន្លែងកសិដ្ឋានជ្រូក។ ការពារសត្វជាកត្តាចង្រៃ ចេញ ចូលកសិដ្ឋាន។ មិនឲ្យមនុស្សក្រៅចូល ឬទស្សនកិច្ចសិក្សា។ យកឧបករណ៍ ឬរបស់របរប្រើប្រាស់ផ្ទាល់ចូលក្នុងកសិដ្ឋាន។ ហាមមធ្យោបាយដឹកជញ្ជូនចូលក្នុងកសិដ្ឋាន ហាមយកសត្វថ្មីចូលក្នុងកសិដ្ឋាន ហាមយកទឹកខាងក្រៅ/សាធារណៈប្រើប្រាស់ក្នុងកសិដ្ឋាន ហាមលក់ ឬនាំសត្វឈឺចេញពីកសិដ្ឋាន អ្នកថែទាំជ្រូកចេញ ចូលកសិដ្ឋានត្រូវឆ្លងកាត់កន្លែងសម្លាប់មេរោគ។
សេចក្តីប្រកាសដដែល ក៏បានចាត់វិធានការតំបន់គ្មានជំងឺ បែងចែកមន្ត្រីបច្ចេកទេសប្រចាំការតាមស្រុកគោលដៅ។ ចុះផ្សព្វផ្សាយដល់អ្នកចិញ្ចឹមជ្រូកពីវិធានជីវសុវត្ថិភាព ចុះតាមដានសុខភាពជ្រូក បើសង្ស័យយកវត្ថុវិភាគទៅមន្ទីរពិសោធន៍ ពង្រឹងចរាចរសត្វ អោយមានច្បាប់ត្រឹមត្រូវ ដាក់កម្លាំងបាញ់ថ្នាំសម្លាប់មេរោគលើមធ្យោបាយដឹកជញ្ជូន តាមដងផ្លូវ និងសត្តឃាតដ្ឋាន ណែនាំដល់អាជីវករមិនឲ្យទិញ លក់សត្វសាច់សត្វ ឈឺ ឬងាប់ដោយជំងឺ និងរាយការណ៍ជាបន្ទាន់ក្នុងករណីដឹងថាសត្វឈឺឬងាប់ដោយជំងឺ។ សហការជាមួយស្ថាប័នពាក់ព័ន្ធ និងភ្នាក់ងារសុខភាពសត្វភូមិ។
ប្រធានការិយាល័យផលិតកម្ម និងបសុព្យាបាលខេត្តសៀមរាប លោក ព្រំ វិច បានឲ្យដឹងថា កម្លាំងពេទ្យសត្វខេត្តសៀមរាប ជារៀងរាល់ថ្ងៃតែងតែចុះពិនិត្យនិងបាញ់ថ្នាំការពារជាប្រចាំដើម្បីទប់ស្កាត់ជំងឺផ្សេងៗ។ លោកបន្តថា ជំងឺប៉េស្តអាហ្វ្រិក ASF បង្កដោយ វីរុស មិនឆ្លងមកមនុស្សទេ។ ជំងឺនេះមិនមែនជាជំងឺថ្មីទេ វាមានជិត១០០ឆ្នាំមកហើយ ដំបូងកើតនៅលើសត្វជ្រូកនៅអាហ្វ្រិក ទៅអឺរ៉ុប រុស្សី ចិន វៀតណាម និងឆ្លងមកកម្ពុជា នៅចុងខែមីនាឆ្នាំ២០១៩នេះនៅឃុំសោមធ ស្រុកអូយ៉ាដាវ ខេត្តរតនគិរី៕
Source: Kampuchea Thmey Daily
0 Comments