គណបក្សរបស់លោកប្រធានាធិបតីទួរគី Recep Tayyip Erdogan បានថ្លែងកាលពីថ្ងៃអាទិត្យថា ខ្លួនបានស្នើឲ្យមានការរាប់ឡើងវិញនូវសន្លឹកឆ្នោតទាំងអស់ ដែលបានបោះនៅទីក្រុងអ៊ីស្តង់ប៊ុលដែលជារដ្ឋធានីសេដ្ឋកិច្ចរបស់ប្រទេសនេះអំឡុងការបោះឆ្នោតតំណែងអភិបាលក្រុងកាលពីសប្តាហ៍មុន បន្ទាប់ពីបេក្ខជនគណបក្សប្រឆាំងបានអះអាងទទួលជ័យជម្នះ។
អនុប្រធានគណបក្សយុតិ្តធម៌និងអភិវឌ្ឍន៍ (AKP) លោក Ali Ihsan Yavuz បានទាមទារឲ្យមានការរាប់សន្លឹកឆ្នោតឡើងវិញ។
AKP បានឈ្នះឆ្នោតភាគច្រើននៅទូទាំងប្រទេសក្នុងការបោះឆ្នោតកាលពីថ្ងៃអាទិត្យមុនប៉ុន្តែលទ្ធផលបានបង្ហាញថា គណបក្សកាន់អំណាចមួយនេះបានចាញ់ក្នុងទីក្រុងអង់ការ៉ាហើយក៏ចាញ់ផងដែរក្នុងទីក្រុងអ៊ីស្តង់ប៊ុលនៅក្នុងអ្វីដែលជាបរាជ័យដ៏អាក្រក់បំផុតរបស់ពួកគេក្នុងការគ្រប់គ្រងអំណាចរយៈពេលមួយទសវត្សកន្លះមកនេះ។
អនុប្រធាន AKP លោក Ali Ihsan Yavuz បាននិយាយថា “ថ្ងៃនេះយើងនឹងយកករណីរបស់យើងទៅសាខាខេត្តរបស់ក្រុមប្រឹក្សាបោះឆ្នោតកំពូល YSK ដើម្បីរាប់សន្លឹកឆ្នោតទាំងអស់ពីសង្កាត់របស់ទីក្រុងអ៊ីស្តង់ប៊ុលឡើងវិញ”។
អាជ្ញាធរបោះឆ្នោតបានធ្វើការរាប់សន្លឹកឆ្នោតឡើងវិញរួចទៅហើយនៅក្នុងសង្កាត់ជាច្រើននៃទីក្រុងអង់ការ៉ានិងអ៊ីស្តង់ប៊ុលដែលជាកន្លែងលទ្ធផលសរុបបង្ហាញថា បេក្ខជនបក្សប្រឆាំង CHP លោក Ekrem Imamoglu បាននាំមុខ AKP ដែលត្រូវបានតំណាងដោយអ្នកនយោបាយល្បីឈ្មោះនិងជាអតីតនាយករដ្ឋមន្ត្រីលោក Binali Yildirim ។
ប៉ុន្តែសន្លឹកឆ្នោតទាំងនោះត្រូវបានគេប្រកាសថាចាត់ទុកជាមោឃៈ។ AKP បានស្នើឲ្យមានការរាប់សន្លឹកឆ្នោតទាំងអស់ឡើងវិញក្នុងទីក្រុងអង់ការ៉ាប៉ុន្តែ YSK កាលពីថ្ងៃអាទិត្យបានច្រានចោលសំណើសម្រាប់សង្កាត់ចំនួន១៣ក្នុងចំណោមសង្កាត់ទាំង២៥។
កាលពីថ្ងៃសៅរ៍ អ្នកនាំពាក្យគណបក្សលោក Omer Celik បានទទូចថា AKP នឹងទទួលយកលទ្ធផលនៃការរាប់សន្លឹកឆ្នោតឡើងវិញនៅក្នុងទីក្រុងអ៊ីស្តង់ប៊ុលក៏ដូចជាទីក្រុងអង់ការ៉ាផងដែរទោះជាគណបក្សណាត្រូវបានគេប្រកាសថាជាអ្នកឈ្នះក៏ដោយ។
ការចាញ់ក្នុងទីក្រុងអ៊ីស្តង់ប៊ុលគឺជាការខកចិត្តមួយចំពោះលោក Erdogan ដែលបានកសាងអាជីពនយោបាយរបស់លោកក្នុងនាមជាអភិបាលក្រុងនេះមុនពេលក្លាយជានាយករដ្ឋមន្ត្រីនិងជាប្រធានាធិបតី៕ AFP
Source: Kampuchea Thmey Daily
0 Comments