មេដឹកនាំអឺរ៉ុបនឹងព្យាយាមនាំយកគូសត្រូវស៊ែប៊ីនិងកូសូវ៉ូឲ្យត្រលប់ទៅរកតុចរចាវិញនៅឯកិច្ចប្រជុំកំពូលក្នុងតំបន់មួយនៅទីក្រុងប៊ែរឡាំងនៅថ្ងៃចន្ទដោយសង្ឃឹមថានឹងចាប់ផ្តើមឡើងវិញនូវកិច្ចពិភាក្សាមួយស្តីពីជម្លោះធ្ងន់ធ្ងរបំផុតមួយក្នុងតំបន់បាល់កង់។
អធិការបតីអាល្លឺម៉ង់លោកស្រី Angela Merkel និងប្រធានាធិបតីបារាំងលោក Emmanuel Macron កំពុងធ្វើជាម្ចាស់ផ្ទះទទួលអ្នកជិតខាងទាំងពីរដែលទំនាក់ទំនងរបស់ពួកគេបានប្រែក្លាយកាន់តែអាក្រក់នៅក្នុងរយៈពេលប៉ុន្មានខែថ្មីៗនេះជាមួយមេដឹកនាំតំបន់បាល់កង់ខាងលិចផ្សេងទៀតនិងសមាជិកសហភាពអ៊ឺរ៉ុបគឺក្រូអាតនិងស្លូវេនី។
ការិយាល័យប្រធានាធិបតីបារាំងបាននិយាយក្នុងសេចក្តីសង្ខេបមួយមុនកិច្ចប្រជុំកំពូលថា ការប្រមូលផ្តុំគ្នានេះនឹងផ្តោតទៅលើស្ថេរភាពនៃតំបន់នេះជាពិសេសផ្តោតលើការស្វែងរកផ្លូវមួយដើម្បីបើកការចរចាឡើងវិញរវាងប្រទេសស៊ែប៊ីនិងកូសូវ៉ូ។
គំនិតផ្តួចផ្តើម Macron-Merkel បានធ្វើឡើងបន្ទាប់ពីកិច្ចពិភាក្សាដែលដឹកនាំដោយសហភាពអឺរ៉ុបរវាងប្រទេសស៊ែប៊ីនិងកូសូវ៉ូត្រូវបានផ្អាកកាលពីឆ្នាំមុន។
ចំណុចស្នូលនៃជម្លោះនេះគឺជាការបដិសេធរបស់រដ្ឋាភិបាលក្រុង Belgrade ទៅលើឯករាជ្យភាពរបស់កូសូវ៉ូដែលជាអតីតខេត្តមួយត្រូវបានបំបែកចេញនៅក្នុងសង្គ្រាមបង្ហូរឈាមឆ្នាំ១៩៩៨-១៩៩៩។
កិច្ចសន្ទនាដែលដឹកនាំដោយទីក្រុង Brussels បានដួលរលំជាច្រើនខែបន្ទាប់ពីកិច្ចពិភាក្សាអំពីការផ្លាស់ប្តូរព្រំដែនដែលអាចធ្វើទៅបានរវាងប្រទេសជិតខាងទាំងពីរដើម្បីធ្វើជាមធ្យោបាយឈានទៅដល់កិច្ចព្រមព្រៀងមួយបានបង្កឲ្យមានប្រតិកម្មតបយ៉ាងខ្លាំងក្លាកាលពីរដូវក្តៅមុន។
ក្រុមអ្នករិះគន់បានព្រមានថា ការគូរផែនទីឡើងវិញនឹងក្លាយជារឿងដ៏មានគ្រោះថ្នាក់នៅក្នុងតំបន់បាល់កង់ដែលជាតំបន់មួយនៅតែកំពុងស្តារឡើងវិញពីសង្គ្រាមទសវត្សរ៍ឆ្នាំ១៩៩០។
បន្ទាប់មក មានការប៉ះទង្គិចផ្នែកការទូតជាបន្តបន្ទាប់រវាងរដ្ឋាភិបាលក្រុង Pristina និង Belgrade ជាពិសេសលើការសម្រេចចិត្តរបស់កូសូវ៉ូក្នុងការប្រមូលពន្ធ១០០ភាគរយលើទំនិញរបស់ប្រទេសស៊ែប៊ីនៅក្នុងខែវិច្ឆិកា៕ AFP
Source: Kampuchea Thmey Daily
0 Comments