នគរបាលព្រហ្មទណ្ឌកម្រិតធ្ងន់ខេត្តកំពង់ស្ពឺ បន្តការសាកសួរបំភ្លឺបន្ថែមពីប្រពន្ធឃាតក ដែលបាញ់សម្លាប់គ្រូកីឡាដោយសារភ្លើងប្រចណ្ឌ

កំពង់ស្ពឺ ៖ មន្ត្រីនគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តកំពង់ស្ពឺ កំពុងបន្តនីតិវិធីសាកសួរបំភ្លឺបន្ថែមពីស្ត្រីជាប្រពន្ធជនដៃដល់ជាឃាតកក្នុងការបាញ់សម្លាប់គ្រូបង្រៀនផ្នែកកីឡាពាក់ព័ន្ធរឿងសហាយស្មន់ជាមួយគ្នា។

លោកវរសេនីយ៍ឯកសមសាក់នាយការិយាល័យព្រហ្មទណ្ឌកម្រិតធ្ងន់ នៃស្នងការនគរបាលខេត្តកំពង់ស្ពឺបានប្រាប់នៅថ្ងៃទី០៩ ខែឧសភា ឆ្នាំ២០១៩នេះថា ករណីឃាតកម្មបាញ់សម្លាប់គ្រូបង្រៀនផ្នែកកីឡានៅអនុវិទ្យាល័យហោមសំណំស្រុកឱរ៉ាល់នោះ សមត្ថកិច្ចជំនាញកំពុងហៅប្រពន្ធឃាតកដើម្បីមកសាកសួរបន្ថែម និងស្វែងរកវត្ថុតាងផ្សេងៗទៀត។

លោកសម សាក់ បានបញ្ជាក់ថា «ជនសង្ស័យ ឈ្មោះ ជួន ធានីរាសី ភេទប្រុស អាយុ២៩ឆ្នាំ មានស្រុកកំណើត ភូមិបាឡាត ឃុំនរា ស្រុកសង្កែ ខេត្តបាត់ដំបង បច្ចុប្បន្នមានទីលំនៅ ភូមិ៤ សង្កាត់ ព្រះពន្លា ក្រុងសិរីសោភ័ណ ខេត្តបន្ទាយមានជ័យ ដែលបាញ់សម្លាប់ជនរងគ្រោះជាគ្រូបង្រៀនបានសារភាពពីមូលហេតុ នៃការបាញ់សម្លាប់ គឺដោយសាររឿងប្រចណ្ឌលួចសហាយស្មន់ជាមួយប្រពន្ធរបស់ខ្លួន»។

សូមរម្លឹកថា កាលពីវេលាម៉ោង១២និង៣៥នាទី ថ្ងៃពុធ ទី០៨ ខែឧសភា ឆ្នាំ២០១៩ កន្លងមកនេះខ្មាន់កាំភ្លើង បានជិះម៉ូតូចូលបាញ់ប្រហារលើជនរងគ្រោះឈ្មោះ ទូច វាសនា ភេទប្រុស អាយុ២៥ឆ្នាំ បណ្ដាលឲ្យស្លាប់ក្នុងថ្លុកឈាម ខណៈពេលកំពុងហូបបាយជុំគ្នាជាមួយគ្រូដទៃទៀតនៅខ្ចូស ក្នុងសាលារៀន។

ហេតុការណ៍បាញ់ប្រហារនេះ កើតមានឡើងនៅសាលាអនុវិទ្យាល័យតាំងរបង ក្នុងភូមិតាំងរបង ឃុំហោងសំណំ ស្រុកឱរ៉ាល់ ខេត្តកំពង់ស្ពឺ។

នគរបាលបានឲ្យដឹងថា ជនល្មើសមានឈ្មោះ ជួន ធានីរាសី ភេទប្រុស ឆ្នាំកំណើត ១៥-០៤-១៩៩០ មានស្រុកកំណើតភូមិបាឡាត ឃុំនរា ស្រុកសង្កែ ខេត្តបាត់ដំបង បច្ចុប្បន្នមានទីលំនៅភូមិ៤ សង្កាត់ ព្រះពន្លា ក្រុងសិរីសោភ័ណ ខេត្តបន្ទាយមានជ័យ មុខរបរ ជាងធ្វើមាស មានប្រពន្ធឈ្មោះ សុខ ស្រីនាង។

មន្ត្រីនគរបាល បានចាត់ទុកករណីនេះ ជាអំពើឃាតកម្មគិតទុកជាមុនបាញ់សម្លាប់បុរសម្នាក់ជាគ្រូបង្រៀន នៅអនុវិទ្យាល័យតាំងរបង ឃុំហោងសំណំ ស្រុកឱរ៉ាល់ ខេត្តកំពង់ស្ពឺ ស្លាប់ភ្លាមៗនៅនឹងកន្លែងកើតហេតុតែម្តង។

ជនល្មើសបានប្រើប្រាស់អាវុធខ្លី មួយដើម ម៉ាក K54 ធ្វើសកម្មភាពជិះម៉ូតូ ម៉ាក Honda C70 គប់ជ្រុង ពណ៌ទឹកប៊ិច ស្លាកលេខ 1A-8250 បន្ទាយមានជ័យ ចូលសំដៅមកអែបរបងសាលារៀនគាប់ជួនជនរងគ្រោះកំពុងហូបបាយជុំគ្នាជាមួយគ្រូបង្រៀនដទៃទៀត នៅខ្ចូសក្នុងសាលារៀន។

លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ឲ្យដឹងថា ជនល្មើសបានព្យាយាមរត់គេចខ្លួនដោយបោះចោលអាវុធខ្លីក្នុងគុម្ពស្មៅ រត់សំដៅទៅថ្នល់ជាតិ ប៉ុន្តែដោយមានកិច្ចសហការល្អ និងមានការបញ្ជាផ្ទាល់ពី លោកឧត្ដមសេនីយ៍ទោ សម សាមួន ស្នងការនគរបាលខេត្តចុះហ៊ុមព័ទ្ធរុករកនិងចាប់ឃាត់ខ្លួនជនល្មើសបានភ្លាមៗដោយប្រើពេលវេលាប្រមាណ២០នាទីប៉ុណ្ណោះ។

ក្រោយពេលឃាត់ខ្លួនដកហូតបានវត្ថុតាងរួមមាន ៖ អាវុធខ្លី K54 មួយដើម គ្រាប់០៨គ្រាប់ ម៉ូតូ មួយគ្រឿង ម៉ាក Honda គុបជ្រុង និង សម្ភារៈគ្រឿងលោហៈពណ៌លឿង ពណ៌ស ឯកសារផ្ទាល់ខ្លួនមួយចំនួនទៀត។

ឃាតកបាញ់សម្លាប់គ្រូបង្រៀនផ្នែកកីឡាបានសារភាពថា «ធ្លាប់មានគំនុំជាមួយជនរងគ្រោះចោទប្រកាន់ថា ជនរងគ្រោះទាក់ទងស្នេហាជាមួយប្រពន្ធខ្លួន បន្ទាប់ពីខ្លួនបានលះលែងប្រពន្ធអស់រយៈពេលប្រហែល៥ខែ មូលហេតុលះលែងមកពីជនរងគ្រោះ និងប្រពន្ធលួចលាក់សហាយស្មន់ជាមួយគ្នា។

តាមប្រភពព័ត៌មានពីអ្នកធ្លាប់ស្គាល់បុរសជាឃាតកធ្លាប់ចេញចូល និងស្គាល់មន្ត្រីយោធាភូមិភាគ៣មួយចំនួន។ ដូច្នេះកាំភ្លើងដែលឃាតកប្រើក្នុងការបាញ់សម្លាប់មនុស្សក៏អាចមានប្រភពចេញពីមន្ត្រីយោធាខិលខូចនោះក៏ថាបាន។

បច្ចុប្បន្ន ជនល្មើស ត្រូវបានបញ្ជូនមកកាន់ស្នងការដ្ឋាននគរបាលខេត្ត ដើម្បីសាកសួរ និងកសាងសំណុំរឿង ចាត់ការតាមនីតិវិធីច្បាប់៕