សិស្សវ័យជំទង់ម្នាក់ ត្រូវបានបាញ់ស្លាប់ ហើយមនុស្សជាច្រើននាក់ទៀត បានរងរបួសកាលពីថ្ងៃអង្គារនៅក្នុងការបាញ់ប្រហារនៅសាលារៀនមួយ ដោយសិស្សជាមិត្តក្នុងរដ្ឋ Colorado។
ការិយាល័យតម្រួតតំបន់ Douglas County បាននិយាយនៅលើបណ្តាញសង្គម Twitter ថា “វាជារឿងដ៏គួរឲ្យសោកស្តាយបំផុតដែលយើងអាចបញ្ជាក់បានថា សិស្សម្នាក់នៅសាលា STEM ត្រូវបានសម្លាប់”។ ការិយាល័យនេះបានដាក់អាយុជនរងគ្រោះថាមានអាយុ១៨ឆ្នាំ។
តម្រួត Tony Spurlock បាននិយាយថា សិស្សរងរបួសជាច្រើននាក់គឺស្ថិតក្នុងស្ថានភាពធ្ងន់ធ្ងរដោយអ្នកខ្លះត្រូវទទួលការវះកាត់ផងដែរ។ មិនមានបុគ្គលិកឬគ្រូបង្រៀនណាម្នាក់ត្រូវបានគេដឹងថារងរបួសទេ។ សិស្សរងរបួសដែលក្មេងជាងគេបំផុតគឺមានអាយុ១៥ឆ្នាំ។
ជនសង្ស័យពីរនាក់កំពុងត្រូវបានឃុំឃាំង។ ពួកគេទាំងពីរនាក់បានចូលរៀននៅសាលា។ មិនមានជនសង្ស័យបន្ថែមទៀតទេ។
តម្រួតបានបន្ថែមថា អ្នកទាំងពីរបានដើរចូលទៅក្នុងសាលា STEM ដោយចូលជ្រៅទៅខាងក្នុង និងបានទាក់ទងសិស្សនៅកន្លែងដាច់ដោយឡែកពីគ្នាចំនួន២។
តម្រួតបន្តថា “យើងមិនមានព័ត៌មានអំពីនរណាម្នាក់ដែលត្រូវគេកំណត់គោលដៅនោះទេ”។
កាំភ្លើងមួយដើមត្រូវបានរកឃើញនៅកន្លែងកើតហេតុ។
សាលា STEM School Highlands Ranch ដែលជាគ្រឹះស្ថានអប់រំថ្នាក់មតេយ្យរហូតដល់ថ្នាក់ទី១២នៅកណ្តាលរដ្ឋ Colorado ជាមួយសិស្សប្រហែល១,៨០០នាក់គឺមានទីតាំងស្ថិតនៅចម្ងាយប្រហែល៨គីឡូម៉ែត្រតាមផ្លូវពីវិទ្យាល័យ Columbine។
សាលារៀននេះត្រូវបិទទ្វារប៉ុន្មានម៉ោងនៅពេលកងកម្លាំងប៉ូលិសដ៏ធំត្រូវបានដាក់ពង្រាយនៅកន្លែងនោះ។ ការឡោមព័ទ្ធត្រូវបានដកចេញវិញនៅប្រហែលម៉ោង៣រសៀល។
វិធានការសន្តិសុខត្រូវបានធ្វើឡើងក្នុងសាលារៀននៅតាមតំបន់ជាច្រើនហើយឪពុកម្តាយរបស់សិស្សនៃសាលា STEM ត្រូវបានគេស្នើឲ្យយកកូនៗរបស់ពួកគេនៅឯទីតាំងមួយនៅជិតសាលារៀន៕ AFP
Source: Kampuchea Thmey Daily
0 Comments