កម្ពុជា នឹងធ្វើជាម្ចាស់ផ្ទះរៀបចំការប្រកួតកីឡាវាយកូនបាល់ យុវជន យុវនារី ឌីខេតឡន (Decathlon Junior) និង OPEN SERIES ឆ្នាំ២០១៩ ជារៀងរាល់ខែ ដោយចាប់ផ្ដើមពីខែឧសភានេះ រហូតដល់បំណាច់ឆ្នាំ២០១៩។
លោកទេព រិទ្ធីវីទ អគ្គលេខាធិការសហព័ន្ធកីឡាវាយកូនបាល់កម្ពុជា បានមានប្រសាសន៍ឲ្យដឹងក្នុងសន្និសីទកាសែតកាលពីវេលាថ្ងៃត្រង់ទី៩ ឧសភា២០១៩នៅមជ្ឈមណ្ឌលហ្វឹកហាត់កីឡាខេមបូឌានខោនទ្រីក្លិប(CCC)ថា នេះគឺជាលើកទី១ហើយ ដែលសហព័ន្ធកីឡាវាយកូនបាល់កម្ពុជា រៀបចំការប្រកួតកីឡាវាយកូនបាល់ប្រចាំខែ និងការ ប្រកួតដោយសេរី បើកទូលាយសម្រាប់អ្នកស្នេហាកីឡាវាយកូនបាល់ទាំងអស់អាចចូលរួមប្រកួតបាន។
លោកបញ្ជាក់ថា មូលហេតុដែលយើងដាក់ ឈ្មោះព្រឹត្តិការណ៍នេះថា Decathlon Junior & Open Series 2019 គឺបន្ទាប់ពីសហព័ន្ធកីឡាវាយកូនបាល់កម្ពុជា បានម្ចាស់ឧបត្ថម្ភធំរបស់យើងគឺ Decathlon នៅកម្ពុជា ដែលជាហាងលក់សម្ភារៈកីឡាគ្រប់ប្រភេទ ជួយឧបត្ថម្ភ។
ព្រឹត្តិការណ៍ប្រកួតនេះនឹងចាប់ផ្តើមនៅក្នុងខែឧសភានេះ ហើយនឹងមានការប្រកួតយុវជន យុវនារីនិងការប្រកួតបើកទូលាយ ជារៀងរាល់ខែរហូតដល់បំណាច់ឆ្នាំ២០១៩។ ការប្រកួតយុវជន យុវនារី លើកទី១ នឹងប្រព្រឹត្តទៅចាប់ពីថ្ងៃទី១៧ ដល់១៩ ខែឧសភា ឆ្នាំ២០១៩។ ចំណែកការប្រកួតបើកទូលាយលើកទី១ នឹងប្រព្រឹត្តទៅចាប់ពីថ្ងៃទី៣១ ខែឧសភា ដល់ថ្ងៃទី០២ ខែមិថុនា ឆ្នាំ២០១៩។
លោកអគ្គលេខាធិការសហព័ន្ធកីឡាវាយកូនបាល់ បានឲ្យដឹងទៀតថា ការប្រកួតនេះ នឹងមានចំណាត់ថ្នាក់ សម្រាប់កីឡាករ កីឡាការិនី គ្រប់ការប្រកួតដែលមានជារៀងរាល់ខែ ហើយនៅខែធ្នូ ឬខែមករា ឆ្នាំបន្ទាប់ យើងនឹងរៀបចំការប្រកួត ១ទៀត ដែលយើងហៅថា Decathlon Masters ដែលមានតែកីឡាករ កីឡាការិនី០៨នាក់ ដែលមានចំណាត់ថ្នាក់ប៉ុណ្ណោះទើបអាចចូលប្រកួតបាន។
ព្រឹត្តិការណ៍ប្រកួតនេះ ចូលរួមឧបត្ថម្ភធំដោយ Decathlon និង សហការឧបត្ថម្ភដោយ Pontoon ក្លឹប និងខេមបូឌាន ខនទ្រី ក្លឹប (CCC)៕
Source: Kampuchea Thmey Daily
0 Comments