កីឡាករ Tiger Woodsដែលបានធ្វើឲ្យពិភពលោកភ្ញាក់ផ្អើល ពេលដែលលោកឈ្នះជើងឯក Masters ជាលើកទី៥របស់គាត់កាលពីខែមុននោះ បានទទួលមេដាយសេរីភាពពីប្រធានាធិបតីសហរដ្ឋអាមេរិក លោកដូណាល់ ត្រាំ នៅឯសេតវិមាន កាលពីថ្ងៃចន្ទ។
ជ័យជំនះនៅ Augusta កាលពីខែមុន បានបញ្ចប់គ្រោះរាំងស្ងួតជើងឯក១១ឆ្នាំរបស់គាត់ សម្រាប់កីឡាករវាយកូនហ្គោលវ៧យ៤៣ឆ្នាំម្នាក់នេះ ដែលមាននូវពេលវេលាដ៏អាក្រក់មួយ ពេលដែលគាត់ជួបញ្ហាអាជីព និងបញ្ហាផ្ទាល់ខ្លួន ដែលរួមទាំងការលែងលះភរិយា និងការវះកាត់ជាច្រើនលើកច្រើនសារនោះ។
កីឡាករ Woods បាននិយាយថ្លែងអំណរគុណដល់អ្នកដែលចូលរួមនៅក្នុងពិធីដែលរៀបចំឡើងនៅឯសួនផ្កាកូលាប ស្ថិតនៅឯសេតវិមាន សម្រាប់ការគាំទ្ររបស់ពួកគេ បើទោះបីជារូបលោកមិនបានឈ្នះអ្វីទាល់តែសោះ ក្នុងរយៈពេលជាច្រើនឆ្នាំកន្លងមកនេះ។
កីឡាករ Woodsបាននិយាយក្រោយលោកត្រាំបំពាក់មេដាយឲ្យនោះថា អ្នករាល់គ្នា បានមើលឃើញរឿងរ៉ាវល្អ និងអាក្រក់ ទាប និងខ្ពស់ ហើយលោកនឹងមិនមានថ្ងៃហ្នឹងទេ បើសិនជាគ្មានការគាំទ្ររបស់អ្នករាល់គ្នាទេនោះ។
សូមបញ្ជាក់ថា រង្វានមួយនេះ ត្រូវបានគេប្រគល់ជារៀងរាល់ឆ្នាំដល់ឥស្សរជនរូបណាដែលមាននូវការចែករំលែកពិសេសដល់សន្តិសុខ ឬផលប្រយោជន៍ជាតិ សន្តិភាពពិភពលោក ឬការប្រឹកប្រឹងលក្ខណៈឯកជន៕
Source: Kampuchea Thmey Daily
0 Comments