កំពង់ឆ្នាំង ៖ រថយន្តធុនធំ០១គ្រឿងដឹកលូជ័រឲ្យអង្គការចៃការ ដោយជិះពីភ្នំពេញទៅក្រុងកំពង់ឆ្នាំង បានបើកបុកគោទាំងព្រឹកព្រលឹមបណ្ដាលឲ្យងាប់០១ក្បាល និង របួសបាក់ជើង០២ក្បាល នៅពេលដែលម្ចាស់របស់គោដេញឆ្លងផ្លូវទៅឃ្វាលនៅឯមាត់បឹង។ ហេតុការណ៍នេះបានកើតឡើងនៅវេលាម៉ោង៦និង១៨នាទីព្រឹក ថ្ងៃទី២៦ ខែធ្នូ ឆ្នាំ២០១៤ នៅចំណុចផ្លូវបំបែកជាប់របងសាលាវិទ្យាល័យសុរាម្រិត ដែលស្ថិតនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
ស្ត្រី ឈ្មោះ ញឹក ចាន់ឌី ភេទស្រី អាយុ៥០ឆ្នាំ មានទីលំនៅក្នុងភូមិធម្មយុត្ត សង្កាត់ផ្អេរ ក្រុងកំពង់ឆ្នាំង ដែលជាម្ចាស់គោបានឲ្យដឹងថា នៅព្រឹកថ្ងៃកើតហេតុ ប្ដីរបស់គាត់ឈ្មោះ គឹម ឆៃ បានដេញគោទាំងអស់០៧ក្បាលឆ្លងផ្លូវ ដើម្បីយកទៅឃ្វាលនៅឯមាត់បឹងធំ ពេលដេញឆ្លងផ្លូវជិតផុតទៅហើយ ក៏ស្រាប់តែមានរថយន្តធុនធំ០១គ្រឿងដឹកលូជ័រ មកបុកហ្វូងគោរបស់គាត់ បណ្ដាលឲ្យគោមេ០១ក្បាលបុកចំកាងរថយន្តពីមុខងាប់ភ្លាមៗ និងគោមេ០២ក្បាលទៀតរងរបួសបាក់ជើងទាំង០២ក្បាល។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានឲ្យដឹងថា ក្រោយពីភាគីទាំង០២ ចរចាគ្នារួមមកនៅចំពោះមុខសមត្ថកិច្ចក្នុងអធិការនគរបាលក្រុងកំពង់ឆ្នាំង ភាគីទាំង០២បានស្រុងស្រួលគ្នាដោយសុខចិត្ត ជួសជុលការខូចខាតរៀងៗខ្លួនគ្មានអ្នកណាសងអ្នកណានោះឡើយ ដែលគេយល់ថាមានកំហុសរៀងខ្លួន មកពីមិនយល់អធ្យាស្រ័យគ្នាទើបមានគ្រោះថ្នាក់បែបនេះ៕
0 Comments