ភ្នំពេញ ៖ សមាជិកគណៈកម្មាធិការនាយកមួយរូបរបស់គណបក្សសង្គ្រោះជាតិ ដែលមានអតីតភាពប្រមាណ២០ ឆ្នាំហើយទើបតែទទួលបានតួនាទីជាជំនួយការលោកអនុប្រធានបក្សនោះ ត្រូវបានគណៈកម្មការវិន័យសម្រេចបណ្តេញចេញពីគណបក្ស តាមរយៈសេចក្តីសម្រេចមួយកាលពីថ្ងៃទី៣០ ខែធ្នូ ឆ្នាំ២០១៤ ដោយសារតែហានបញ្ចេញរឿងអាស្រូវថ្នាក់ដឹកនាំរបស់ខ្លួនទៅកាន់អ្នកសារព័ត៌មាន។
ការសម្រេចបញ្ចប់សមាជិកភាពនេះ បានធ្វើឡើងតាមរយៈលិខិតមួយច្បាប់ ដែលចុះហត្ថលេខាដោយលោក អ៊ូ ច័ន្ទប្ញទ្ធិ ប្រធានគណៈកម្មការវិន័យគណបក្សសង្គ្រោះជាតិ ចុះថ្ងៃទី៣០ ខែធ្នូ ឆ្នាំ២០១៤ ដោយបានបញ្ជាក់ថា "បញ្ចប់សមាជិកភាពលោកស្រី ឡាក់ សុភាព ពីគណបក្សសង្គ្រោះជាតិ" ហើយការបញ្ចប់សមាជិកភាពនេះ ដោយសារតែលោកស្រី ឡាក់ សុភាព មិនបានបកស្រាយបំភ្លឺសម្តីរបស់ខ្លួនទៅកាន់អ្នកសារព័ត៌មានវិញ ក្រោយពីលោកស្រីបានបញ្ចេញអំពើពុករលួយរបស់ថ្នាក់ដឹកនាំឲ្យអ្នកសារព័ត៌មាន ប៉ុន្តែការសម្រេចនោះ លោកស្រី ឡាក់ សុភាព អះអាងថា មិនត្រឹមត្រូវតាមនីតិវិធី និងមានភាពអយុត្តិធម៌។
លោកស្រី ឡាក់ សុភាព បានថ្លែងប្រាប់បណ្តាញសារព័ត៌មានកាលពីព្រឹកថ្ងៃទី៣០ ខែធ្នូ នៅខាងមុខវិមានរដ្ឋសភាថា លោកស្រីមានការចាប់អារម្មណ៍មួយ ដោយឃើញថា ប្រធានគណៈកម្មការវិន័យជាអ្នកសម្រេចម្នាក់ឯងបែបនេះ ពីព្រោះលោកស្រីជាសមាជិកគណៈកម្មាធិការនាយក បើត្រូវបញ្ឈប់ត្រូវធ្វើឡើងដោយអង្គសមាជបោះឆ្នោតសម្រេច ដូច្នេះការសម្រេចដកដូច្នេះមានភាពអយុត្តិធម៌ បើសិនចង់បញ្ឈប់ គឺត្រូវប្រធានគណបក្សជាអ្នកកោះប្រជុំសមាជិកគណៈកម្មាធិការនាយកទាំងអស់ ដើម្បីធ្វើការបោះឆ្នោតសម្រេចដក ទើបត្រូវតាមលទ្ធិប្រជាធិបតេយ្យ ហើយលោកស្រីប្រកាសថា នឹងប្តឹងទៅស្ថាប័នគណបក្សបន្តទៀត ដើម្បីរកយុត្តិធម៌។
លោកស្រី ឡាក់ សុភាព បានបញ្ជាក់ថា "អ្វីដែលជាបញ្ហាសំខាន់ក្នុងនាមជាសមាជិកគណៈកម្មាធិការនាយក និងជាស្ថាបនិកក្នុងផ្នែកនយោបាយ២០ ឆ្នាំនេះ ខ្ញុំមិនដើរចេញពីគណបក្សនយោបាយ ហើយខ្ញុំនៅជាសមាជិកគណៈកម្មាធិការនាយកដដែល...។ ដោយសារការបញ្ឈប់ដោយលោក អ៊ូ ច័ន្ទប្ញទ្ធិ ជួសគណៈកម្មាធិការវិន័យនេះ គ្មានស្របច្បាប់ អយុត្តិធម៌សម្រាប់រូបខ្ញុំ ហើយខ្ញុំមិនដើរចេញពីគណបក្ស។ ខ្ញុំសូមឲ្យបងប្អូនបង្វែរមកមើលបញ្ហានេះ ដែលគេបានចោទខ្ញុំថា ខ្ញុំបាននិយាយថា លោកប្រធាន សម រង្ស៊ី យកលុយ៤០ លានបាន២០ លាន នៅ២០ លាននោះ មិនមែនជារឿងពិតទេ គឺលោកអនុប្រធាន កឹម សុខា បានលើកនៅក្នុងអង្គប្រជុំ ហើយបានទម្លាក់កំហុសមកលើរូបខ្ញុំ រឿងអស់ទាំងនេះលោកទាំងពីរជាអ្នកលេងបាល់ ហើយចុងក្រោយលោកទាំងពីរបានទាត់បាល់មកឲ្យខ្ញុំទប់ ដែលហាក់បីដូចជាឲ្យខ្ញុំទទួលថ្មបាក់អីចឹង ខ្ញុំមិនអាចទទួលយកបាន រឿងរបស់អស់លោកជាមេដឹកនាំទេ ខ្ញុំអត់ដឹងអីទាំងអស់ ហើយក្រោយពីការប្រជុំគណៈកម្មាធិការនាយករួច ថែមទាំងបិទអង្គប្រជុំតែម្តងមិនឲ្យខ្ញុំបកស្រាយបំភ្លឺជូនអង្គប្រជុំឡើយ"។
លោកស្រី ឡាក់ សុភាព បានបញ្ជាក់ទៀតថា "នេះគឺរឿងពិត លោកអនុប្រធាន កឹម សុខា គាត់បានលើកឡើង ហើយបានបាញ់ចំពោះខ្ញុំ គាត់និយាយឈ្មោះខ្ញុំបញ្ចេញសំឡេងលើកឡើងនៅក្នុងប្រជុំថា លោកស្រី ឡាក់ សុភាព ហ្នឹង បានលើកឡើងថា លោកប្រធាន សម រង្ស៊ី ហ្នឹងបានទទួលលុយ៤០ ម៉ឺនដុល្លារ ឥឡូវទទួលបាន២០ លាននៅសល់២០ លាន ពេលនោះ គឺខ្ញុំភ្ញាក់តែម្តង ដោយខ្ញុំអត់មានដឹងអីទាំងអស់។ អីចឹងខ្ញុំចង់បញ្ជាក់ប្រាប់អ្នកសារព័ត៌មានថា ខ្ញុំអត់មានបានបំប៉ោងរឿងពុករលួយចំពោះមេដឹកនាំទេ ហើយអ្វីទាំងអស់ គឺគាត់បានលើកឡើងនៅក្នុងអង្គប្រជុំចំពោះរូបខ្ញុំផ្ទាល់តែម្តង ហើយរឿងនោះ គឺជារឿងមិនទុកចិត្តគ្នារវាងមេដឹកនាំទាំងពីរយ៉ាងម៉េចក៏ខ្ញុំមិនដឹងដែរ ហើយបែរជាយករឿងខ្ញុំទៅដាក់ជំនួសទៅវិញ។ ខ្ញុំអត់បានជម្រាបទៅលោក កឹម សុខា ថាលោក សម រង្ស៊ី ទៅយកលុយពីខាងណាៗ ខ្ញុំអត់មានបានជម្រាបទាល់តែសោះសូមបដិសេធ"។
ដោយឡែកចំពោះសំណួរថា មានបញ្ហាអំពើពុករលួយយកលុយពីក្រុមចរចានោះ លោកស្រី ឡាក់ សុភាព បានបញ្ជាក់ថា រឿងនេះសូហ្វ័រឡានរបស់លោក សម រង្ស៊ី ប្អូនប្រុសហ្នឹងគាត់និយាយប្រាប់ខ្ញុំ ថាក្រុមចរចាហ្នឹងទៅយកលុយពីគណបក្សប្រជាជន ហើយគាត់បានប្រាប់ថា កុំឲ្យខ្ញុំនិយាយ។ គាត់និយាយហ្នឹងមានហេតុផលទៀតថា មានគេតេឡេហ្វូនមកលោកប្រធាន សម រង្ស៊ី ហើយលោកប្រធាន សម រង្ស៊ី កំពុងតែអង្គុយក្នុងឡាន ហើយលោក សម រង្ស៊ី មិននឹកស្មានថា កូនចៅគាត់បែបហ្នឹងទាល់តែសោះ នេះជាការនិយាយស្តីរបស់តាកុងឡានប្រាប់ខ្ញុំ"។
ទោះបីមានការបញ្ឈប់ដោយអយុត្តិធម៌បែបនេះក្តី លោកស្រី ឡាក់ សុភាព មិនមានបំណងទៅចូលរួមជាមួយគណបក្សណាមួយ ឬបណ្តាញណាមួយនោះទេ។ ចំពោះការចូលរួមប្រជុំជាមួយបណ្តាញរបស់លោក កែម ឡី នោះលោកស្រីអះអាងថា ជាសិទ្ធិសេរីភាពរបស់លោកស្រី ដើម្បីយកគំនិតល្អៗសម្រាប់ចុះទៅមូលដ្ឋាន ចែកចាយទៅដល់សកម្មជនមូលដ្ឋាន។
ទាក់ទងនឹងការលើកឡើងនេះ លោក អ៊ូ ច័ន្ទប្ញទ្ធិ ប្រធានគណៈកម្មការវិន័យគណបក្សសង្គ្រោះជាតិបានប្រាប់កម្ពុជាថ្មីតាមទូរស័ព្ទនៅព្រឹកថ្ងៃទី៣០ ខែធ្នូ បន្ទាប់ពីបញ្ចប់សន្និសីទ របស់លោកស្រី ឡាក់ សុភាពថា ការលើកឡើងរបស់លោកស្រី ឡាក់ សុភាព ជាការមិនពិត ពីព្រោះសមាជិកគណៈកម្មការវិន័យគណបក្សមិនអាចចុះហត្ថលេខាលើក្រដាសទាំងអស់គ្នាបានទេ ហើយក្នុងនាមលោកជាប្រធានគណៈកម្មការវិន័យ លោកមានសិទ្ធិចុះហត្ថលេខាបញ្ចប់សមាជិកភាពបាន ហើយបើសាមីខ្លួនមិនពេញចិត្ត ឬមិនអាចទទួលយកបាន គឺត្រូវតវ៉ាទៅគណៈកម្មាធិការអចិន្ត្រៃយ៍គណបក្សបន្តទៀត នៅពេលនោះ គណៈកម្មាធិការអចិន្ត្រៃយ៍គណបក្សនឹងសម្រេចម្តងទៀត។
សូមបញ្ជាក់ថា ព្រឹកថ្ងៃទី២៧ ខែធ្នូ ឆ្នាំ២០១៤ លោកស្រី ឡាក់ សុភាព បានបង្ហើបប្រាប់អ្នកសារព័ត៌មាននៅពេលចូលរួមពិធីមួយ ដែលរៀបចំដោយបណ្តាញសង្គមខ្មែរដើម្បីខ្មែរថា គណបក្សសង្គ្រោះជាតិ សព្វថ្ងៃនេះកំពុងប្រេះឆាទាំងក្នុងប្រទេស និងក្រៅប្រទេស ហើយមេដឹកនាំគណបក្សសង្គ្រោះជាតិសព្វថ្ងៃនេះ ជាមេដឹកនាំពុករលួយ ដែលមិនអាចឲ្យកូនចៅជឿជាក់បាន។ លោកស្រីបានបញ្ជាក់យ៉ាងនេះថា "ខ្ញុំត្រូវទៅប្រទេសបារាំងសិន ដើម្បីទៅជួបអ្នកស្ប៉នស៊ឺនៅទីនោះ ហើយនៅពេលត្រឡប់មកវិញ ខ្ញុំនឹងជួបជាមួយបងប្អូនទាំងអស់គ្នា សូមមេត្តាអធ្យាស្រ័យទាំងអស់គ្នា តែខ្ញុំនិយាយគេដេញខ្ញុំចេញហើយ តែខ្ញុំចង់សិក្សាឲ្យបានស៊ីជម្រៅថាគាត់កែ ឬមិនកែរយៈពេលខាងមុខហ្នឹង យ៉ាងយូរខែ៥ ទេ នឹងមានការប្រជុំគណៈកម្មាធិការនាយក ក៏ដូចជាគណៈកម្មាធិការអចិន្ត្រៃយ៍អី ក្រោយពីការរៀបចំកិច្ចការបោះឆ្នោតហើយ គឺនឹងមានការប្រកាសឡើង ពេលនោះចង់មិនចង់ ខ្ញុំនឹងជួបសារព័ត៌មាន ខ្ញុំអត់ភ័យ អត់លាក់លៀមទេ ពីព្រោះខ្ញុំធ្វើដើម្បីបុព្វហេតុខ្មែរ ដើម្បីឈាមខ្មែរដូចគ្នា។ បញ្ហាសំខាន់ដើម្បីជាតិ ខ្ញុំត្រូវចោលកូននៅសហរដ្ឋអាមេរិក… "។
លោកស្រីបញ្ជាក់ទៀតថា "ការតស៊ូរបស់ខ្ញុំជាស្ត្រីជាង២០ ឆ្នាំហើយ អីចឹងខ្ញុំមិនដែលទាមទារអំណាចពីបុគ្គលណាទេ ហើយការបានដោយមិនចំជំនាញរបស់យើង ក៏យើងមិនរីករាយ ក៏យើងមិនស្វាគមន៍ដែរ ពីព្រោះយើងគិតថា ផលប៉ះពាល់សង្គមនាពេលកន្លងមក គឺពលរដ្ឋ ដែលជាម្ចាស់អំណាចជាអ្នករងគ្រោះ ដោយសារមេដឹកនាំជាច្រើនជំនាន់ ដូច្នេះចាំខ្ញុំត្រឡប់មកពីសហរដ្ឋអាមេរិកវិញ ខ្ញុំនឹងលាតត្រដាងហើយខ្ញុំនឹងដើរចេញ ហើយមុនដើរចេញខ្ញុំធ្វើសន្និសីទកាសែត ហើយអ្វីដែលថ្មីទៀតហ្នឹង ការដែលគាត់ (លោក សម រង្ស៊ី) ទៅប្រទេសបារាំងហ្នឹង ដោយសារមានភាពចម្រូងចម្រាសគ្នាធ្ងន់ធ្ងរ គឺអត់មានស៊ីសង្វាក់គ្នាទេ ចង់និយាយថា ទាំងនៅក្នុងប្រទេស និងក្នុងប្រទេសក៏ដូចតែគ្នាទេ គឺមានការបែងចែកអំណាច អ្នកដែលធ្វើការច្រើនហើយ មានការប្រកាន់អ្នកជាប់ អ្នកអត់ជាប់ ចឹងការរើសអើងវាផុយស្រួយនៃការបែកបាក់នៅក្នុងគណបក្សតែម្តង។
លោកស្រី ឡាក់ សុភាព លើកឡើងទៀតថា "ខ្ញុំបានលើកឡើងនៅក្នុងអង្គប្រជុំក្នុងនាមខ្ញុំជាថ្នាក់ដឹកនាំនៅក្នុងគណបក្ស នៅក្នុងគណៈកម្មាធិការនាយក ចឹងខ្ញុំសុំអង្វរគាត់កុំឲ្យធ្វើ តែធ្វើបែកបាក់ គឺបែកបាក់មែន វាផុយស្រួយ ពីព្រោះយើងមិនទាន់រឹងមាំផង យើងទៅបោះឆ្នោតមូលដ្ឋាន គាត់ដឹងហើយដោយសារសិទ្ធិមនុស្ស ភ្លើងទៀន សម រង្ស៊ី ដល់បោះហែកចែកគ្នាចេញ គាត់ថាបើធ្វើអីចឹងវាត្រូវតែបែក ត្រូវតែរលាយ ហើយសំខាន់វារលាយគណបក្ស ហើយអស់លោក ជាតិៗខ្មែរទាំងមូលនឹងរលាយ ដោយសារមេដឹកនាំ…។ កន្លងមកកាលពីថ្ងៃទី៥ លោក កឹម សុខា ប្រជុំគណៈកម្មាធិការនាយក គាត់បាញ់រឿងលុយ៣០-៤០ លានដុល្លារឯណា ដែលលោក សម រង្ស៊ី បានទទួលយក ឥឡូវបាន២០ លាននៅសល់២០ លានដុល្លារ។ អីចឹងនេះជាចំណែកមួយអត់ចូលរួមសង្គម ដែលមានមេដឹកនាំពុករលួយបែបនេះបានទេ"៕
0 Comments