ភ្នំពេញ ៖ ជនវិកលចរិតដែលគេតែងតែឃើញដើរនៅក្នុងភូមិ ក្រោយពីបាត់ខ្លួនពីរបីថ្ងៃ ស្រាប់តែគេប្រទះឃើញលង់ទឹកស្រះស្លាប់យ៉ាងអាណោចអាធម៌បំផុត ដោយមានការអាណិតអាសូរ ព្រោះជនវិកលចរិតម្នាក់នេះមានលក្ខណៈស្លូតបូត មិនដែលរករឿងធ្វើបាបអ្នកណាសោះនោះ ទើបប្រជាពលរដ្ឋនិងកងកម្លាំង៩១១នាំគ្នាធ្វើបុណ្យបញ្ជូនកុសលជូនដល់សពជនវិកលចរិតរូបនេះ។
គេបានប្រទះឃើញសពជនវិកលចរិតកាលពីវេលាម៉ោង៧និង៣០នាទីព្រឹក ថ្ងៃទី៣១ ខែធ្នូ ឆ្នាំ២០១៤ នៅចំណុចស្រះទឹកមួយកន្លែង ដែលស្ថិតនៅក្នុងភូមិតាសេក សង្កាត់កំបូល ខណ្ឌពោធិ៍សេនជ័យ។ ជនរងគ្រោះមានឈ្មោះវី ភេទប្រុស អាយុជាង៤០ឆ្នាំ មិនមានទីលំនៅពិតប្រាកដតែងដើរនៅក្នុងតំបន់ខាងលើ ហើយឧស្សាហ៍រែងទឹក និងដើរបេះត្រកួន ព្រលិតឲ្យគេមិនមែនយកទៅលក់ទេ។ ប្រជាពលរដ្ឋបានឲ្យដឹងថា បុរសវិកលចរិតរូបនេះមិនដែលរករឿងនិយាយជេរបញ្ចោរអ្នកណាទេ ពោលគឺគាត់មានសភាពស្លូតបូត គេតែងឃើញគាត់ទៅផ្ទះផ្ទះអ្នកណារែងទឹកឲ្យអ្នកនោះ បេលដើរ បេះត្រកួន ព្រលិត បានយកទៅឲ្យអ្នកភូមិ ប៉ុន្តែក្នុងរយៈពេលពីរបីថ្ងៃនេះគេមិនដែលឃើញបុរសនេះដើរទៀតទេ ដោយម្នាក់នឹកស្មានថា ប្រហែលជាគាត់ចល័តទៅកន្លែងផ្សេងៗទៀត។ ប៉ុន្តែនៅព្រឹកថ្ងៃទី៣១ ខែធ្នូនេះ ស្រាប់តែគេឃើញសពជនវិកលចរិតនេះបានស្លាប់អណ្ដែតទឹកស្រះទៅវិញ ដែលភាគច្រើនគេសន្និដ្ឋានថា ពេលគាត់ចូលងូតទឹកស្រះឫបេះត្រកួនព្រលិតជាដើមនោះ ទើបបណ្ដាលឲ្យគាត់លង់ទឹកស្លាប់បែបនេះតែម្ដងទៅ។
ចំពោះការស្លាប់នេះប្រជាពលរដ្ឋសហការជាមួយទ័ព ពិសេសឆ័ត្រយោង៩១១បានស្រង់ចេញពីទឹកស្រះ រួចនាំគ្នាធ្វើបុណ្យបញ្ជូនកុសលឲ្យសពជនវិកលចរិតនៅនឹងមាត់ស្រះនោះតែម្ដងដោយមិនបាច់ឲ្យលំបាកដល់សមត្ថកិច្ចឡើយ៕
0 Comments