នារីម្នាក់ ជិះម៉ូតូលឿនប៉ះដៃចង្កូតចូលក្រោមឡានកុងតឺន័រកិនស្លាប់
ភ្នំពេញ ៖ មានករណីគ្រោះថ្នាក់ចរាចរណ៍មួយគួរឲ្យរន្ធត់លើផ្លូវ៣៧១ ក្រុមទី២ ភូមិត្នោតជ្រំ៣ សង្កាត់បឹងទំពុន ខណ្ឌមានជ័យ បណ្ដាលឲ្យនារីម្នាក់ក្នុងវ័យប្រមាណជា២៥ឆ្នាំ ត្រូវបានស្លាប់ភ្លាមៗក្នុងកន្លែងកើតហេតុ ដែលហេតុការណ៍នេះបានកើតឡើងនៅវេលាម៉ោង៦និង២០ព្រឹក ថ្ងៃទី១២ ខែមករា ឆ្នាំ២០១៥។
តាមសាក្សីនៅកន្លែងកើតហេតុបានឲ្យដឹងថា នៅមុនពេលមានគ្រោះថ្នាក់ចរាចរណ៍គេបានឃើញនារីម្នាក់ជិះម៉ូតូមួយគ្រឿងម៉ាកនិច ពណ៌ស ស៊េរីឆ្នាំ២០១៤ ពាក់ស្លាកលេខភ្នំពេញ1CC1357 បានបើកបរលើកំណាត់ផ្លូវលេខ៣៧១ ក្នុងទិសដៅពីលិចទៅកើត ក្នុងល្បឿនលឿន លុះមកដល់ចំណុចក្រុមទី២ ភូមិត្នោតជ្រំ៣ នារីរងគ្រោះក៏បានទាក់ដៃចង្កូតជាមួយនឹងម៉ូតូមួយគ្រឿងទៀតមិនស្គាល់ម៉ាក បណ្ដាលឲ្យនារីរងគ្រោះដួលលើទ្រូងផ្លូវស្របពេលរថយន្តកុងតឺន័រមួយគ្រឿងដែលបើកបរស្របទិសគ្នា បានកិនពីលើក្បាលជនរងគ្រោះបណ្ដាលឲ្យធ្លាយខួរស្លាប់នៅនឹងកន្លែង ហើយរថយន្តបង្កបានព្យាយាមបើកគេចចេញពីចំណុចកើតហេតុ ប្រមាណជាង១០០ម៉ែត្រ ក៏ត្រូវបានប្រជាពលរដ្ឋនិងសមត្ថកិច្ចដេញតាមឃាត់ជាប់ ដោយឡែកតាកុងឡានបានរត់គេចខ្លួនបាត់។ សមត្ថកិច្ចបានបញ្ជាក់ថា រថយន្តដែលកិនជនរងគ្រោះនោះ ពាក់ស្លាកលេខភ្នំពេញ3A4674 ចំណែកឯ ជនរងគ្រោះមិនទាន់ស្គាល់អត្តសញ្ញាណនៅឡើយទេ ដោយសមត្ថកិច្ចកំពុងព្យាយាមស្រាវជ្រាវតាមស្លាកលេខម៉ូតូនារីរងគ្រោះ។
បច្ចុប្បន្នសពជនរងគ្រោះបានតម្កល់ទុក រង់ចាំក្រុមគ្រួសារយកទៅធ្វើបុណ្យតាមប្រពៃណី ដោយឡែករថយន្តបង្កនិងម៉ូតូនារីរងគ្រោះ ត្រូវបានសមត្ថកិច្ចយកទៅរក្សាទុកដោះស្រាយនៅការិយាល័យយនគរបាលចរាចរណ៍ជើងគោករាជធានីភ្នំពេញ៕
នរា
0 Comments